រូបភាពស្រីស្អាតម្នាក់ ចងពង់ងូតទឹកក្នុងថ្លុក កណ្តាលដងផ្លូវមួយកន្លែង នៅក្នុងខេត្ត Tak កាលពីពេលកន្លងមក នៅពេលនេះ បានកំពុងរីករាយភាយជាថ្មី នៅលើបណ្តាញសង្គម។ ហើយការងូតទឹកភក់ធម្មជាតិរបស់នាង ក៏ត្រូវបានមហាជនចាត់ទុកថាជាហេតុផលដ៏ល្អ ដើម្បីដាស់តឿនទៅដល់អាជ្ញាធរមូលដ្ឋាន ឲ្យចេះមើលផ្លូវខូចផង។
ស្រីស្អាតរូបនោះត្រូវបានដឹងថាមានឈ្មោះ Palm អាយុ ២៥ ឆ្នាំ បានសម្រេចចិត្តងូតទឹកភក់នៅលើផ្លូវបែបនេះ គឺក្នុងបំណងដើម្បីតវ៉ាឲ្យមានការជួសជុលផ្លូវ បន្ទាប់ពីស្ថានភាពផ្លូវមួយខ្សែនេះ ទៅកាន់ស្រុកកំណើតរបស់នាង បានកំពុងរងការខូចយ៉ាងខ្លាំង។
Palm ដែលធ្វើការនៅទីក្រុងបាងកក បាននិយាយថា នាងមកផ្ទះជាញឹកញាប់ ដើម្បីទៅលេងគ្រួសារ ហើយត្រូវបើកឡានឆ្លងកាត់ផ្លូវមួយនេះ ដែលពោរពេញដោយជង្ហក់។
ដំបូងឡើយ នាងគ្រោងបង្ហាញរូបភាពនេះឲ្យមិត្តភក្តិមើលតែប៉ុណ្ណោះ ហើយមិនមានគម្រោងបញ្ចេញរូបថតជាសាធារណៈឡើយ។ ទោះជាយ៉ាងណា រូបភាពទាំងនោះ ក្រោយល្បីខ្លាំងនៅលើបណ្តាញផ្សព្វផ្សាយសង្គម នៅពេលនេះ ទទួលបានការយកចិត្តទុកដាក់ពីភ្នាក់ងាររដ្ឋាភិបាល។
យោងតាម Palm មានជាង ១០០ គ្រួសារ នៅក្នុងស្រុករបស់នាង ដែលត្រូវពឹងផ្អែកប្រើប្រាស់ផ្លូវនេះ ព្រោះថា វានឹងជួយសម្រួលដល់ពួកគេច្រើន ប្រសិនបើផ្លូវនេះត្រូវបានជួសជុល។
ពួកគេបានត្អូញត្អែរថា រដ្ឋាភិបាលមិនបានជួសជុលផ្លូវនេះ អស់រយៈពេល ៣០ ឆ្នាំមកហើយ។ ប៉ុន្តែពេលនេះ គេបានសន្យាថានឹងជួសជុលផ្លូវក្រោយរដូវវស្សា។
ទោះជាយ៉ាងណា យោងតាមរបាយការណ៍ អភិបាលខេត្ត តាក បានបញ្ជាឱ្យស្ថាប័នពាក់ព័ន្ធ ធ្វើការជួសជុលផ្លូវដោយមិនបង្អង់យូរ ហើយរូបភាពថ្មីដែលបង្ហោះលើ Facebook ហាក់ដូចជាបញ្ជាក់ថា ការជួសជុលទាំងនោះកំពុងដំណើរការហើយ៕ រក្សាសិទ្ធិដោយ៖ លឹម ហុង
