ជាធម្មតា នៅពេលដែលយើងចូលហាងគុយទាវ ឬហាងអាហារដ្ឋានផ្សេងៗ នោះប្រដាប់ដាក់គ្រឿង គឺតែងត្រូវបានឃើញជាកំប៉ុង ឬ ចានតូចៗប៉ុណ្ណោះ ។ តែអ្វីដែលភ្ញាក់ផ្អើលខ្លាំងនោះ គឺហាងអាហារមួយនៅក្នុងប្រទេសថៃ បែរជាគិតឃើញនូវរឿងដ៏ព្រឺព្រួចមួយនេះ ដោយច្នៃ «មឈូស និងកោដ» តូចៗ សម្រាប់ដាក់គ្រឿង ស្លាបព្រា ឈើចាក់ឆ្មេញ និងចង្កឹះជាដើម។
ហាងគុយទាវតាមជញ្ជើមផ្លូវនាពេលរាត្រីដ៏ចម្លែកនេះផងដែរ ត្រូវបានដឹងថា មានទីតាំងស្ថិតនៅជាប់សាលារៀន វត្ត Saket ក្នុងស្រុក Pom Prap Sattru Phai ទីក្រុង Bangkok ប្រទេសថៃ។
បើតាមម្ចាស់ហាង បាននិយាយបែបនេះថា «កុំភ័យខ្លាចអី ព្រោះមឈូសតូច និងកោដ្ឋ គឺថ្មី មិនត្រូវបានគេប្រើពីមុននោះទេ តែវាគឺជាចម្លងគំរូធ្វើពីវត្ថុពិតៗ។ ខ្ញុំមានគំនិតនេះ ព្រោះផ្លូវនេះ ធ្លាប់សម្បូរកន្លែងកប់ខ្មោច។ ហេតុដូច្នេះ ក៏ធ្វើឲ្យប្លែកទៅ!!។
ទោះយ៉ាងណា អ្នកលេងបណ្តាញសង្គម ក្រោយពីបានឃើញរូបភាពដ៏ព្រឺព្រួចនេះ បាននាំគ្នាបញ្ចេញមតិលេងសើចផ្សេងៗគ្នាថា៖ «ហូបបណ្តើរ ស្រណោះរឿងជីវិតបណ្តើរ.…, អត្តន័យគឺ ស៊ីទៅទាន់នៅរស់ ស៊ីតិចក៏ងាប់ ស៊ីច្រើនក៏ងាប់ អត់ស៊ីក៏ងាប់, ឃើញចឹងអី ខំស៊ីជាងមុនទៀត ព្រោះខ្លាចងាប់បាត់លែងបានស៊ី, កុំខ្លាចអីបង មុននឹងក្រោយដូចតែគ្នាគ្រាន់តែយូរនឹងឆាប់ប៉ុណ្ណោះ ហូបអោយហើយទៅទាន់នៅរស់,…»៕ រក្សាសិទ្ធិដោយ៖ លឹម ហុង
