ថ្មីៗនេះ គេហទំព័រ HK01 បានបង្ហាញរឿងរ៉ាវដ៏ភ្ញាក់ផ្អើលមួយ ដែលបានកើតឡើងនៅក្នុងពិធីមង្គលការមួយ នៅក្នុងទីក្រុង Zhenxiang ក្នុងខេត្ត Yunnan ភាគខាងត្បូងប្រទេសចិន។ នោះគឺនៅពេលដែលនារីមួយក្រុមដែលប្រកាសថាជា «អតីតមិត្តស្រីរបស់កូនកំលោះ» បានប្រមូលផ្តុំគ្នានៅមុខរោងការ ធ្វើឲ្យកូនកំលោះកូនក្រមុំ រួមទាំងភ្ញៀវជាច្រើនដែលមកចូលរួម ភ្ញាក់ផ្អើល ស្រឡាំងកាំងគ្រប់គ្នាតែម្តង។
យោងតាមសារព័ត៌មានក្នុងស្រុក បានឲ្យដឹងថា ហេតុការណ៍ដ៏មិននឹកស្មានដល់នេះ បានកើតឡើងកាលពីថ្ងៃទី៥ ខែកុម្ភៈ ខណៈពេលដែលគូស្វាមីភរិយាថ្មីថ្មោងកំពុងដឹកចាប់ដៃគ្នាចូលរោងការនោះ ស្រាប់តែលេចមុខនារីមួយក្រុមមានគ្នា១០នាក់ បានលេចមុខក្នុងពិធីដោយទឹកមុខញញឹមយ៉ាងរីករាយ រួមជាមួយផ្ទាំងក្រណាត់ពណ៌ក្រហមដែលមានអក្សរពណ៌លឿងសរសេរថា «យើងជាក្រុមអតីតមិត្តស្រីរបស់ Chen Song ដែលបានបោះបង់ចោលពួកយើងមកដល់នៅថ្ងៃនេះ»។ ហើយពិតណាស់ នៅពេលដែលឃើញបែបនេះ ទាំងកូនកំលោះកូនក្រមុំ បានបញ្ចេញទឹកមុខខ្មាសអៀនជាខ្លាំង ហើយស្ថានភាពពេលនោះក៏សង្កេតឃើញហាក់ដូចជាតានតឹង។
បន្ទាប់ពីវីដេអូឃ្លីបនេះត្រូវបានផ្សព្វផ្សាយនៅលើបណ្តាញសង្គម វាបានក្លាយជាប្រធានបទនៃការពិភាក្សា។ ទោះយ៉ាងណា ក្រោយមក ប្រព័ន្ធផ្សព្វផ្សាយអនឡាញ ក៏បានស៊ើបអង្កេតរកការពិត ហើយបានរកឃើញថា មនុស្សម្នាក់ដែលបានចូលរួមក្នុងពិធីមង្គលការ បានបង្ហើបថា ក្រុមនារីទាំងនោះគឺពិតជាបានធ្វើរឿងនេះឡើងនៅក្នុងពិធីមង្គលការនោះមែន។ ប៉ុន្តែនៅពេលគាត់សួរទៅនារីមួយក្រុមនោះ ដែលថាជាអតីតមិត្តស្រីរបស់កូនកំលោះ បែរជាឆ្លើយថាសុទ្ធតែជាការសម្តែង។
ចំណែកអ្នកលេងម្នាក់ទៀត ក៏បានអះអាងថា ពួកនាងគឺជាបងប្អូនជីដូនមួយកូនកំលោះ។ រីឯអ្នកបង្ហោះឃ្លីបនេះ ក៏បានចេញមុខបកស្រាយថា ពួកនាងគឺជាក្រុមមិត្តភក្តិ ដែលបានធ្វើរឿងបង្កការភ្ញាក់ផ្អើលនេះ គ្រាន់តែជាការលេងសើចប៉ុណ្ណោះ។
ទោះជាយ៉ាងណា ការរិះគន់ក្នុងពិភពអនឡាញ បានកើនកំដៅ ខណៈមហាជនជាច្រើនបាននិយាយបែបនេះថា «តើបំប្លែងបែបនេះមែន!?, បើជាការលេងសើច ហេតុអ្វីមុខកូនក្រមុំមើលទៅដូចជាមិនសប្បាយចិត្តសោះអ៊ីចឹង, អូហ៍! នេះជារឿងកំប្លែង? មើលមិនឃើញមានអ្នកណាសើចបន្តិចផង!»។ ខណៈអ្នកលេងអ៊ីនធើរណែតមួយចំនួនក៏បានសរសើរក្នុងន័យចំអកថា «ប្រសិនបើវាជាការពិតមែន កូនកំលោះពិតជាអស្ចារ្យណាស់ ដែលមានអតីតមិត្តស្រីច្រើនអនេក មកជួបជុំគ្នាយ៉ាងសុខស្រួលបែបនេះ ប៉ុន្តែ ម្នាក់ៗក្នុងពិធីមុខមិនរីកសោះ!!»៕ រក្សាសិទ្ធិដោយ៖ លឹម ហុង
