គេហទំព័រ Nextapple បានបង្ហាញវីដេអូឃ្លីបមួយនៅលើ TikTok របស់ស្រ្តីជនជាតិអាមេរិកដើមកំណើតអាហ្រ្វិកម្នាក់ ដែលបានក្លាយជាប្រធានបទបង្កការវែកញែកដ៏ចម្រូងចម្រាស នៅលើប្រព័ន្ធផ្សព្វផ្សាយសង្គម បន្ទាប់ពីនាងបានស៊ើបប្រាយ (surprise) កាដូថ្ងៃខួបកំណើតកូនស្រីអាយុ ១៦ ឆ្នាំ ជាមួយឡានទំនើប Tesla មួយគ្រឿង និងរួមជាមួយស្រោមសំបុត្រលុយផងដែរ។ ប៉ុន្តែវាប្រែជាកាដូអត់តម្លៃ និងធ្វើឲ្យស្រ្តីជាម្តាយឈឺចាប់យ៉ាងខ្លាំង នៅពេលបានឃើញឃើញប្រតិកម្មរបស់កូនស្រីដាក់បែបនេះ។
តាមរយៈវីដេអូឃ្លីប បានបង្ហាញឲ្យឃើញស្រ្តីជាម្តាយបានរៀបចំកាដូដ៏ធំមួយ គឺរថយន្តទំនើប Tesla ពណ៌ខ្មៅ ថ្មីសន្លាង១គ្រឿង មកចតនៅមុខផ្ទះរបស់នាង មុនដើរចូលក្នុងផ្ទះហៅកូនស្រីចេញក្រៅ ដោយប្រើក្រណាត់បិទភ្នែក។ ប៉ុន្តែ ស្រាប់តែនៅពេលកូនប្រុសតូចម្នាក់របស់នាង ទៅចាប់ទាញក្រណាត់ចេញពីភ្នែក ស្រាប់តែកូនស្រីបងនោះ បានផ្ទុះការមិនពេញចិត្តភ្លាមៗតែម្តង ដោយបានត្អូញត្អែរថា នាងមិនពេញចិត្ត នាងខឹងខ្លាំងណាស់ ដោយបានប្រាប់ម្តាយថា ស្រលាញ់រថយន្តម៉ាកផ្សេង។ កូនស្រីរូបនេះបាននិយាយទាំងមិនពេញចិត្តថា «ខ្ញុំមិនចូលចិត្តរថភ្លើងអគ្គិសនីទេ ខ្ញុំចង់បានរថយន្ត Mercedes Benz ពណ៌ផ្កាឈូក ខ្ញុំមិនចូលចិត្ត Tesla ទេ…»។
ទោះបីជាយ៉ាងណា ម្ដាយនៅតែព្យាយាម ដើម្បីឲ្យកូនស្រីជាទីស្រឡាញ់ទទួលយក ដោយបាននិយាយថា មានស្រោមសំបុត្រសាច់ប្រាក់មួយផងដែរ ដែលសង្ឃឹមថា កូនស្រីនឹងពេញចិត្តពុំខាន ដោយមានចំនួន ១,៦០០ ដុល្លារអាមេរិក ។ ទោះជាយ៉ាងណា កូនស្រីរូបនេះ ក៏មិនពេញចិត្តទៀតដែរ ដោយបានត្អូញត្អែរថា ចំនួននេះតិចខ្លាំងណាស់ វាមិនគ្រប់គ្រាន់សម្រាប់នាងក្នុងការប្រារព្ធខួបកំណើតរបស់នាងបានទេ។
មិនត្រឹមតែប៉ុណ្ណឹងទេ កូនស្រីរូបនេះ ក៏បានប្រាប់ម្តាយយករថយន្តនេះទៅឲ្យឆ្ងាយ និងប្រគល់កូនសោឲ្យវិញ រួចយកដៃគ្រវាត់គ្រឿងតុបតែងនៅលើក្បាលរថយន្ត ឲ្យធ្លាក់រាយប៉ាយលើដី និងបានស្រែកថា «នេះជាថ្ងៃខួបកំណើតដ៏អាក្រក់បំផុតរបស់ខ្ញុំ» មុនពេលដើរចូលក្នុងផ្ទះ ខណៈម្តាយរបស់នាងដែលកំពុងថតឃ្លីបនោះ បាននិយាយថា នាងពិតជាមានការសោកស្ដាយជាខ្លាំង។
បន្ទាប់មក ស្រ្តីជាម្ដាយ ក៏បានបង្ហោះឃ្លីបវីដេអូនេះ ដោយបានសរសេរបញ្ជាក់ថា៖ «Surprise ខួបកំណើតគម្រប់១៦ឆ្នាំរបស់កូនស្រីជាទីស្រឡាញ់របស់ខ្ញុំ ជាមួយកាដូដ៏ពិសេស ប៉ុន្តែនាងមិនបានចូលចិត្តសោះ ខ្ញុំពិតជាមានអារម្មណ៍តូចចិត្តខ្លាំងណាស់ ខ្ញុំទ្រាំមិនបានទៅនឹងទង្វើរបស់កូនស្រីមិនកតញ្ញូម្នាក់នេះទេ!»។ ឃ្លីបនេះបានរីករាលដាលយ៉ាងឆាប់រហ័ស ហើយវាត្រូវបានមើលច្រើនជាង ១៩.៧ លានដង។
ក្រោយពីបានឃើញបែបនេះ អ្នកលេងបណ្តាញសង្គមជាច្រើន បានសម្តែងការហួសចិត្តយ៉ាងខ្លាំង និងការរិះគន់ថា «នាងពិតជាសំណាងហើយ ដែលមានម្តាយចិត្តល្អបែបនេះ ប៉ុន្តែ មិននឹកស្មាននាងធ្វើឲ្យចិត្តម្តាយនាងឈឺចាប់បែបនេះ»។ ប៉ុន្តែក្នុងពេលជាមួយគ្នានោះ មនុស្សជាច្រើនបាននិយាយថា «មូលហេតុគឺដោយសារតែការចិញ្ចឹមកូនរបស់នាង ធ្វើបាបកូនខ្លាំងពេក រហូតធ្វើឲ្យកូនខូចចិត្តបែបនេះ»៕ រក្សាសិទ្ធិដោយ៖ លឹម ហុង
@neshieslife2340 Surprised my daughter with her sweet 16 gift and she didn’t even like it I’m so piss right know I can’t stand a ungrateful kids!😰😓😥😥 #spoiledkids#momlife #viralvideos ♬ original sound – Neshie’s life