១៤ កុម្ភៈ គឺជាបុណ្យនៃក្តីស្រលាញ់ Valentine’s Day ដែលអ្នកណាៗក៏ចង់ជូនមនុស្សដែលខ្លួនស្រលាញ់ នូវកាដូពិសេស និងធ្វើឲ្យរំជួលចិត្តបំផុត។ ទោះបីជាយ៉ាងណា ក៏មានអ្នកខ្លះមិនគិតឲ្យបានច្បាស់ទេ ក្នុងការជូនកាដូ ដែលរហូតធ្វើឲ្យមនុស្សដែលខ្លួនស្រលាញ់បែរជាស្រក់ទឹកភ្នែក។
តួយ៉ាងដូចករណីបុរសម្នាក់ បានបង្ហាញការសោកស្តាយយ៉ាងខ្លាំង ដោយសារជូនកាដូខុសចំពោះមិត្តស្រីរបស់ខ្លួន ដោយបានរៀបរាប់យ៉ាងវែងអន្លាយថា៖ «ជូយគិតខ្ញុំផងអ្នកទាំងអស់គ្នា! តើមានវិធីណាអាចដោះស្រាយបញ្ហាបានទេ ឥឡូវនេះខ្ញុំបានទាក់ទងគ្នាបាន ៦ ខែហើយ ខ្ញុំស្រលាញ់នាងខ្លាំងណាស់ ប៉ុន្តែដោយសារកាដូ Valentine មួយនេះ ធ្វើឱ្យអ្វីៗទាំងអស់ត្រូវដួលរលំ។
សម្រាប់ Valentine ជាលើកដំបូងនេះ ខ្ញុំឆ្ងល់ថាតើត្រូវរើសកាដូអ្វីឱ្យនាង។ ខ្ញុំក៏បានអានប្រកាសទាំងអស់នៅលើអ៊ីនធឺណិត ក្នុងនោះ ផ្កា សូកូឡា គ្រឿងអលង្ការ ស្បែកជើង ឬសម្លៀកបំពាក់ សុទ្ធតែត្រូវបានណែនាំដោយមនុស្សជាច្រើន។ ទោះយ៉ាងណាក៏ដោយ ខ្ញុំមិនមើលឃើញថា របស់ទាំងនោះពិសេសពេកទេ។
ខ្ញុំចង់ឱ្យកាដូមានផ្កា សូកូឡា និងអ្វីផ្សេងទៀតដើម្បីបង្ហាញពីអារម្មណ៍របស់ខ្ញុំ។ ដូច្នេះ ខ្ញុំស្រាវជ្រាវរហូត ហើយទីបំផុតបានឲ្យមិត្តស្រីរបស់ខ្ញុំឆ្មា១ក្បាល។
ខ្ញុំគិតថាស្រីៗប្រហែលចូលចិត្តឆ្មា ហើយប្រសិនបើមានឆ្មាមួយនៅក្បែរនាង វាប្រាកដនឹងធ្វើឲ្យនាងសប្បាយចិត្តខ្លាំងហើយ។ ដូច្នេះ ខ្ញុំបានស្វែងរកទិញឆ្មាអង់គ្លេសសក់ខ្លីមួយក្បាល ពិនិត្យសុខភាពដោយប្រុងប្រយ័ត្ន សៀវភៅចាក់វ៉ាក់សាំង ហើយរង់ចាំថ្ងៃទី១៤ ខែកុម្ភៈ ខ្ញុំនឹងផ្តល់វាដល់នាង។
នៅយប់នោះ យើងបានទៅញ៉ាំអាហារពេលល្ងាច រួចទៅមើលកុនជាមួយគ្នា។ បន្ទាប់មក ខ្ញុំក៏សម្រេចចិត្តនាំនាងមកផ្ទះ ដើម្បីជូនកាដូ ដោយសារតែសត្វឆ្មាខ្ញុំមិនអាចយកទៅតាមបាន។ ពេលនោះ ខ្ញុំក៏បានដាក់កូនឆ្មាក្នុងប្រអប់ធំមួយដែលមានធ្នូនៅខាងក្រៅ។ នៅពេលដែលខ្ញុំកាន់ប្រអប់កាដូ គូស្នេហ៍របស់ខ្ញុំញញឹមយ៉ាងស្រស់ ខ្ញុំបានគិតពីវិធីមួយដើម្បីអោយកាន់តែភ្ញាក់ផ្អើលនោះ គឺអោយគូស្នេហ៍របស់ខ្ញុំបិទភ្នែករបស់នាង រួចអោយនាងប៉ះកាដូនោះ។
ជាការពិតណាស់ ខ្ញុំស្រមៃថា មិត្តស្រីរបស់ខ្ញុំនឹងសប្បាយចិត្តខ្លាំងហើយ ជាមួយកាដូនេះ។ ប៉ុន្តែ ផ្ទុយទៅវិញ វាជាការពិតដែលគ្មានអ្នកណានឹកស្មានដល់ទេ បងប្អូនអើយ រហូតមកទល់ពេលនេះ ខ្ញុំនៅតែគិតថាខ្ញុំល្ងង់ណាស់។ នោះគឺខណៈពេលដែលគូស្នេហ៍របស់ខ្ញុំបិទភ្នែករបស់នាង ដើម្បីបើកប្រអប់កាដូ ហើយយកដៃទាំងពីររបស់នាងប៉ះវា។ ពេលប៉ះរោមឆ្មា នាងស្រាប់តែស្រែកខ្លាំងៗ ហើយដើរថយក្រោយ។ នាងបើកភ្នែកមើលឆ្មា ហើយនាងយំតែម្តង។
នៅពេលនោះ វាធ្វើឲ្យខ្ញុំនឹកឃើញនាងធ្លាប់ប្រាប់ខ្ញុំថា នាងមានជំងឺហឺត ហើយមានអាឡែស៊ីទៅនឹងរោមសត្វឆ្មាខ្លាំងណាស់។ ប៉ុន្តែពេលជ្រើសរើសកាដូ ខ្ញុំមិនបានគិតដល់រឿងនេះទេ។ ពេលនោះ នាងព្យាយាមលាងដៃ ហើយបែរខ្នងចេញពីខ្ញុំ ជាមួយទឹកមុខខឹងយ៉ាងខ្លាំង។ ខណៈភ្លាមៗនោះខ្ញុំក៏បានយកឆ្មាទៅទុក ហើយចុះមកវិញ នាងជិះតាក់ស៊ីត្រឡប់ទៅវិញបាត់ទៅហើយ។
ចាប់តាំងពីពេលនោះមក ខ្ញុំមិនអាចទាក់ទងមិត្តស្រីរបស់ខ្ញុំបានទៀតទេ ខ្ញុំសោកស្ដាយជាខ្លាំង ដែលផ្តល់របស់ត្រឹមត្រូវដែលគូស្នេហ៍របស់ខ្ញុំមិនអាចប្រើបាន។ នេះពិតជាមេរៀនមួយក្នុងជីវិតរបស់ខ្ញុំ។ ឥឡូវនេះ ខ្ញុំមិនដឹងថាត្រូវព្យាបាលដោយរបៀបណាទេ វាឈឺចាប់ណាស់»។
គួរបញ្ជាក់ថា នេះមិនមែនជាករណីទីមួយទេ ដែលការជូនកាដូដល់មិត្តស្រី ទទួលបានលទ្ធផលបែបនេះ។ ជាក់ស្តែង នៅលើបណ្ដាញសង្គម មានការបង្ហោះបង្ហាញកាដូជា “ស្បែកជើងផ្ទាត់ពណ៌ដីឥដ្ឋ” ឬជា «មេមាន់» ដែលធ្វើឱ្យមិត្តស្រីមិនអាចនិយាយចេញបាន នៅថ្ងៃបុណ្យនៃក្តីស្រឡាញ់ឆ្នាំនេះ៕ រក្សាសិទ្ធិដោយ៖ លឹម ហុង
