ថ្មីៗនេះ រូបភាពមុន និងក្រោយ នៃការកាប់ដើមឈើ នៅតាមបណ្តោយឆ្នេរកែប ដែលធ្លាប់ជាទីកន្លែងសម្រាប់ភ្ញៀវទេសចរជ្រកម្លប់ បានក្លាយជាប្រធានបទបង្កការវែកញែកឡើងចម្រូងចម្រាស់ ផ្អើលពេញបណ្តាញសង្គមទៀតហើយ។
បើតាមប្រភពចែករំលេក បានបញ្ជាក់ប្រាប់ឲ្យដឹងថា ការកាប់ដើមឈឺដែលភាគច្រើនជាប្រភេទដើមឆ័ត្រ ដែលមានអាយុកាលច្រើនឆ្នាំទាំងនោះ គឺដើម្បីធ្វើការអភិវឌ្ឍន៍កែលម្អ រៀបកាឡាថ្មី និងដាំដើមល្មើជំនួសវិញ។
ទោះយ៉ាងណា ពលរដ្ឋជាច្រើន ជាពិសេសអ្នកដែលធ្លាប់ទៅលេងឆ្នេរកែប បានសម្តែងការសោកស្តាយ ដោយបានលើកឡើងថា «ចប់ហើយកែបយើងឥឡូវ អត់មានដើមកាប៉ាងជ្រកទៀតទេ, ក្តៅណាស់បង កាប់ចោលចឹងបើទុកគ្រាន់បានម្លប់ជ្រកខ្លះ,…»។ រីឯអ្នកខ្លះទៀត ក៏បានរិះគន់ក្នុងន័យចំអកថា «កាយផ្លូវដាក់លូ កាប់ដើមឈើ ដាំកូនឈើ បើមិនធ្វើវាអត់អីធ្វើ,…»។
តែទន្ទឹមនឹងមានមតិរិះគន់ ក៏មានអ្នកលេងមួយចំនួន បានឆ្លើយតបទៅវិញឲ្យដឹងថា «គេកាប់ចោល គេមានហេតុផល ឥឡូវគេកំពុងរៀបចំអភិវឌ្ឍតំបន់មួយចំនួន បើមិនដឹងច្បាស់ទេ ចាំមើលលិទ្ធផលគេសិនទៅ អ្នកធ្វើចាំតែខុស អ្នកថាចាំតែថា ធ្វើជាមនុស្សត្រូវចេះបើកចិត្តឲ្យទូលាយកុំឃើញរឿងបន្តិចទើសៗ ទាំងមិនទាន់ដឹងរឿងច្បាស់។ កន្លែងដែលកំពុងអភិវឌ្ឍន៍តែងតែបាត់បង់ទ្រង់ទ្រាយដើមខ្លះៗហើយ, អជ្ញាធរខេត្តកែបបានបង្ហាញរួចហើយថានិងមានការកែប្រែឆ្នេរកែប ឬរៀបចំឆ្នេរឱ្យមានសោភ័ណភាពជាងមុន មានបានមើលសេចក្ដីប្រកាសរបស់អជ្ញាធរឬនៅ?»៕ រក្សាសិទ្ធិដោយ៖ លឹម ហុង
