គេហទំព័រ CTWANT នៅថ្ងៃទី១២ ខែកុម្ភៈ ឆ្នាំ២០២៣ បានលាតត្រដាងថា រឿងដ៏ភ្ញាក់ផ្អើលរបស់បុរសម្នាក់នៅក្នុងប្រទេសចិន បានកំពុងក្លាយជាប្រធានបទត្រូវបានគេពិភាក្សាយ៉ាងទូលំទូលាយ នៅលើបណ្តាញសង្គម បន្ទាប់ពីបុរសរូបនោះបានឃើញឃ្លីបវីដេអូនៃការផ្សាយពាណិជ្ជកម្មទេសចរណ៍សម្រាប់ភូមិបុរាណ Miao Xijiang ក្នុងខេត្ត Guizhou បង្ហាញក្រុមនារី Miao ដែលមានមុខមាត់ស្អាត និងសុភាពរមទម្យ ស្ថិតក្នុងស្លៀកសំលៀកបំពាក់កុលសម្ព័ន្ធក្នុងស្រុក សម្តែងរបាំប្រពៃណី ដើម្បីស្វាគមន៍ភ្ញៀវទេសចរ។
រូបភាពផ្សាយពាណិជ្ជកម្មដ៏ទាក់ទាញភ្នែកនោះ បានធ្វើឱ្យគាត់ពេញចិត្ត និងចាប់អារម្មណ៍យ៉ាងខ្លាំង ហើយទីបំផុត គាត់ក៏សម្រេចថានឹងទៅជួបនឹងរូបពិត និងទស្សនាការសម្តែងរបស់ពួកគេផ្ទាល់ ដោយសុខចិត្តបើករថយន្តធ្វើដំណើរចម្ងាយជាង ២០០០ គីឡូម៉ែត្រ រហូតមកដល់ទីធ្លានៃទិដ្ឋភាពដូចមានបង្ហាញក្នុងឃ្លីបវីដេអូ។ តែទោះជាយ៉ាងណា គាត់ពិតជាស្រឡាំងកាំងនិយាយមិនចេញនោះទេ ព្រោះថា នារី Miao ដ៏ស្រស់ៗស្អាតដែលគាត់ចង់រកនោះ ប្រែក្លាយជាស្ត្រីចំណាស់មួយក្រុមក្នុងភូមិទៅវិញ ដោយបានចេញមករាំស្វាគមន៍ភ្ញៀវទេសចរ…។
បន្ទាប់ពីឃ្លីបវីដេអូរបស់បុរសរូបនេះ ត្រូវបានផ្សព្វផ្សាយតាមបណ្តាញសង្គម វាបានទាក់ទាញមនុស្សជាច្រើន មើលហើយអស់សំណើច និងព្រមជាមួយការចូលទៅបញ្ចេញមតិសើចចំអកយ៉ាងដូច្នេះថា «ការផ្សាយពាណិជ្ជកម្មប្រហែលជាមិនកុហកទេ គាត់មកយឺតពេក ក្មេងស្រីទាំងនោះចាស់ៗអស់ហើយ, សង្ស័យពួកនាងត្រូវគេចាប់ពង្រត់បាត់ទេដឹង, អ៊ីចឹងហើយ បានជាគេព្រមានកុំឲ្យសូវជឿរូបភាពក្នុងការផ្សាយពាណិជ្ជកម្មពេក ឃើញទេ ខាតពេលវេលាឥតប្រយោជន៍!»។
តែទន្ទឹមនឹងមានអ្នកថា នេះជាការផ្សាយពាណិជ្ជកម្មបោកប្រាស់ ក៏មានអ្នកប្រើប្រាស់សង្គមមួយចំនួន ដែលអះអាងថាជាអ្នកស្រុក ចូលមកបញ្ចេញមតិ និងផ្តល់ព័ត៌មានថា ភូមិនោះស្ថិតនៅក្នុងតំបន់ភ្នំ ជិតស្និទ្ធនឹងធម្មជាតិ ដូច្នេះហើយ អ្នកភូមិពិតជាមានសម្បុរស្បែកល្អ មិនកុហកទេ ប៉ុន្តែយុវជនយុវនារីមានទំនោរទៅធ្វើការនៅបរទេស។ ហើយដល់ពេលមានពិធី ឬពិធីសំខាន់ ពួកគេនឹងមកជួយវិញ។ តែបើជាថ្ងៃធម្មតា មីងៗមកពីគ្រួសារផ្សេងគ្នា នឹងមកជួយសម្តែងជំនួស»៕ រក្សាសិទ្ធិដោយ៖ លឹម ហុង
