ថ្មីៗនេះ បណ្តាញទំនាក់ទំនងសង្គមហ្វេសប៊ុក ក្នុងប្រទេសវៀតណាម បានកំពុងចែករំលែកវីដេអូឃ្លីបប្រមាណជាង ១០ នាទី ដែលបង្ហាញទិដ្ឋភាពស្ត្រីវ័យកណ្តាលម្នាក់ ដែលស្ថិតក្នុងស្ថានភាពដៃជាប់ខ្នោះ បានជេរប្រមាថធ្ងន់ៗ ទៅលើប៉ូលិសចរាចរ ដែលកំពុងបំពេញភារកិច្ច បង្កឲ្យមានការភ្ញាក់ផ្អើលយ៉ាងខ្លាំង។
យោងតាមខ្លឹមសារនៃវីដេអូឃ្លីបនេះ ស្ត្រីវ័យកណ្តាលពាក់អាវពណ៌ខ្មៅ ដែលកំពុងជាប់ខ្នោះដៃនោះ បានស្រែកជេរប្រមាថទៅលើមន្ត្រីនគរបាលចរាចរ និងទាហានជាច្រើននាក់ ដែលកំពុងបំពេញកាតព្វកិច្ច។ មិនត្រឹមតែប៉ុណ្ណោះ ស្រ្តីរូបនេះក៏បានយកដងខ្លួន ទៅបំបុកមន្ត្រីប៉ូលិសថែមទៀតផង។
ចំពោះទង្វើដ៏ឈ្លើយ និងមិនស្គាល់ច្បាប់របស់ស្ត្រីរូបនេះ ឃើញថាមានអ្នកប្រើបណ្ដាញសង្គមជាច្រើន សម្តែងការហួសចិត្តយ៉ាងខ្លាំង។ តាមរយៈការផ្ទៀងផ្ទាត់ ហេតុការណ៍នេះបានកើតឡើង កាលពីវេលាម៉ោង១១និង៣០នាទី ថ្ងៃទី១៦ កុម្ភៈ ស្ថិតទីក្រុង Canh Nang ស្រុក Ba Thuoc ខេត្ត Thanh Hoa ។
អត្តសញ្ញាណស្ត្រីក្នុងឃ្លីបនោះ ត្រូវបានគេស្គាល់ថាមានឈ្មោះ អិន ធីន អាយុ ៤៤ ឆ្នាំ មានទីលំនៅក្រុងខាញ់ណាង ស្រុកបាធឿក ខេត្តថាញ់ហ្វា។
នៅពេលនោះ ក្រុមល្បាត និងត្រួតពិនិត្យ ដើម្បីធានាសន្តិសុខ និងសណ្តាប់ធ្នាប់ នៃក្រុមនគរបាលចរាចរណ៍ – នគរបាលស្រុក Ba Thuoc ដែលបំពេញបេសកកម្មនៅក្រុង Canh Nang បានប្រទះឃើញស្ត្រីម្នាក់នេះ បើកម៉ូតូមិនពាក់មួកសុវត្ថិភាពទេ។ ដូច្នេះ ប៉ូលិសក៏បានធ្វើការឃាត់ ដើម្បីធ្វើកំណត់ហេតុបទល្មើសរដ្ឋបាល។
ទោះយ៉ាងណា ស្រ្តីរូបនេះ បានរារាំងកម្លាំងនគរបាលចរាចរណ៍ មិនឲ្យបំពេញតួនាទីរបស់ពួកគេ និងចាប់ផ្តើមជេរប្រមាថខ្លាំងៗតែម្តង។ ប៉ុន្តែ ខណៈកម្លាំងនគរបាលចរាចរ បានគ្រប់គ្រង និងវាយខ្នោះ ស្រាប់តែស្ត្រីរូបនេះ បានយកដងខ្លួនរបស់នាង ទៅបំបុកនគរបាលម្នាក់ ដោយមិនខ្លាចញញើតឡើយ។ តែយ៉ាងណា ទីបំផុត សមត្ថកិច្ចបានក៏ប្រគល់ខ្លួនស្រ្តី ទៅឱ្យនគរបាលស្រុកបាធឿក ដើម្បីដោះស្រាយផងដែរ៕ រក្សាសិទ្ធិដោយ៖ លឹម ហុង
