វីដេអូឃ្លីបបង្ហាញនារីវ័យក្មេងដ៏ក្លាហានម្នាក់ បានដោះអាវវាយទៅលើបុរសម្នាក់យ៉ាងចាស់ដៃ នៅកណ្តាលដងផ្លូវ ដោយចោទថា បុរសនោះបានរំលោភបំពានផ្លូវភេទរបស់នាង បានបង្កភាពច្របូកច្របល់យ៉ាងខ្លាំង នៅលើបណ្តាញសង្គម។
ហេតុការណ៍ដ៏ញាក់សាច់នេះ ត្រូវបានគេដឹងថាបានកើតឡើងនៅកណ្តាលទីក្រុង Ribeirao Preto ភាគអាគ្នេយ៍ប្រទេសប្រេស៊ីល។ វីដេអូបានបង្ហាញពីនារីវ័យក្មេង បានចាប់ផ្តួលបុរសរូបនោះទៅនឹងដី ហើយយកជើងជាន់ឈ្លី និងវាយតប់យ៉ាងសន្ធាប់ បន្ទាប់ពីចោទបុរសនោះថា បានបៀតបៀនផ្លូវភេទនាងនៅទីសាធារណៈ។
មហាជនបាននិយាយថា នាងបានវាយបុរសនោះ ខណៈស្រែកថា នាងមានអារម្មណ៍ខឹងយ៉ាងខ្លាំង ដោយសារតែនាងត្រូវបានគេយាយីពេលកំពុងធ្វើការ។ លើសពីនេះ នារីក្លាហានរូបនេះ ក៏បាននិយាយទាំងកំហឹងឈឺចាប់ទៀតថា៖ «ខ្ញុំធុញទ្រាន់នឹងការត្រូវបានចាត់ទុកដូចជាវត្ថុផ្លូវភេទ អ្នកចង់បានដើមទ្រូងមែនទេ?»។ បន្ទាប់មក នារីរូបនេះក៏បានដោះអាវចេញភ្លាមៗ បញ្ចេញដើមទ្រូង ហើយបន្តវាយតប់បុរសនោះ ធ្វើឱ្យអ្នកទស្សនាភ្ញាក់ផ្អើលយ៉ាងខ្លាំង។
ចំណែកបុរសរូបនោះមិនបានឆ្លើយតបអ្វីទេ ដោយគ្រាន់តែសុំឱ្យនាងបញ្ឈប់ទង្វើរបស់នាងថា៖ «ខ្ញុំមិនបានធ្វើអ្វីខុសទេ ខ្ញុំគ្រាន់តែដើរផ្សារជាមួយប្រពន្ធប៉ុណ្ណោះ»។
អ្នកឈរមើលមួយចំនួន បានគាំទ្រសកម្មភាពខាងលើ ថែមទាំងលើកទឹកចិត្តការ «ផ្តល់មេរៀន» យ៉ាងចាស់ដៃមួយនេះ របស់នាងទៀតផង។ ប៉ុន្តែ ទន្ទឹមគ្នានេះ ក៏មានប្រជាពលរដ្ឋមិនតិចនាក់ទេដែលចេញមុខជំទាស់ ដោយពួកគេគិតថានារីម្នាក់នេះ ធ្វើទង្វើនេះមិនសមហេតុផល ហើយក៏គ្មានសិទ្ធិវាយមនុស្សដែរ។
ទោះយ៉ាងណា វីដេអូនៃហេតុការណ៍នេះ ក្រោយមកត្រូវបានគេកំណត់ថា គ្រាន់តែជាការសម្តែងរបស់ក្រុមរៀបចំឆាកប៉ុណ្ណោះ។
ជាក់ស្តែង Fausto Ribeiro ដែលជាប្រធានក្រុមដែលបង្កើតវីដេអូនេះ បាននិយាយថា «យើងចង់បង្ហាញពីស្ថានភាព និងរបៀបដោះស្រាយបញ្ហាដែលស្ត្រីតែងតែជួបប្រទះក្នុងជីវិត។ ស្ត្រីពិតជាមានសិទ្ធិ និងសមត្ថភាពក្នុងការទប់ទល់នឹងការយាយី។ យើងក៏ចង់បានបុរសទទួលខុសត្រូវបន្ថែមទៀត ចំពោះសកម្មភាព និងលទ្ធផលរបស់ពួកគេ៕ រក្សាសិទ្ធិដោយ៖ លឹម ហុង
