ទិវានៃក្តីស្រឡាញ់ ១៤ កុម្ភៈ ក្មេងប្រុសអាយុ ៨ ឆ្នាំម្នាក់ នៅទីក្រុង Yiyang ខេត្ត Hunan ប្រទេសចិន បានធ្វើឲ្យអ្នកលេងអ៊ីនធើរណែត ភ្ញាក់ផ្អើល និងហួសចិត្តយ៉ាងខ្លាំង ក្រោយពីបានដឹងថា រូបគេបានយកខ្សែកពេជ្រដ៏មានតម្លៃរបស់ម្តាយ កាដូជូនមិត្តស្រីរួមថ្នាក់។
យោងតាម Headline News នៅលើ Weibo បានឱ្យដឹងថា ម្តាយរបស់ក្មេងស្រីឈ្មោះ Tang បានទៅយកកូនស្រីបន្ទាប់ពីរៀន ហើយត្រូវបានគេប្រាប់ថា ក្មេងប្រុសម្នាក់បានឱ្យខ្សែកដល់កូនស្រីរបស់នាង។
មិត្តរួមថ្នាក់របស់ពួកគេ បានប្រាប់ស្រ្តីជាម្តាយថា ក្មេងស្រីនោះ បានបដិសេធទទួលយកកាដូពីក្មេងប្រុសនោះទេ ប៉ុន្តែ ក្មេងប្រុសនោះ នៅតែទទូចថា នាងទទួលយកកាដូខ្សែកនេះទៅ។
អ្នកស្រី Tang បានពិនិត្យមើលខ្សែក ហើយប្រាកដថាវាច្បាស់ជាថ្លៃខ្លាំងហើយ។ បន្ទាប់មក អ្នកស្រីបានសុំកូនស្រី ដើម្បីយកខ្សែកនោះមកសាលាវិញនៅថ្ងៃបន្ទាប់។
អ្នកស្រី Tang បានទាក់ទងទៅម្តាយរបស់ក្មេងប្រុសនោះ ដើម្បីសួរនាំអំពីខ្សែក ហើយចុងក្រោយ បានរកឃើញថា ក្មេងប្រុសនេះបានយកខ្សែកពេជ្រនិងផ្លាទីនតម្លៃ 20,000 យន់ (ស្មើនឹងជិត ៣,០០០ ដុល្លារ) ពីម្តាយរបស់គេដោយមិនសួរនោះទេ។
ទោះជាយ៉ាងណាក៏ដោយ ម្តាយក្មេងប្រុសបានសុំឲ្យអ្នកស្រី Tang ជួយរក្សាខ្សែកនេះផង ព្រោះកូនប្រុសរបស់គាត់បានជូនកូនស្រីរបស់នាងរួចហើយ។ ប៉ុន្តែ ក្រោយដឹងថា វាថ្លៃខ្លាំងពេក អ្នកស្រី Tang ក៏បានប្រគល់ខ្សែកនេះជូនម្តាយក្មេងប្រុសនោះវិញ នៅសាលារៀនថ្ងៃបន្ទាប់៕ រក្សាសិទ្ធិដោយ៖ លឹម ហុង
