សេចក្ដីស្រឡាញ់របស់ឪពុកម្ដាយ គឺជាសេចក្ដីស្រឡាញ់ដ៏ធំធេង ដែលគ្មានអ្វីអាចប្រៀបផ្ទឹមបានឡើយ។ នៅពេលដែលកូនរបស់ខ្លួនឯង ធ្លាក់ក្នុងស្ថានការណ៍លំបាក បើមានរឿងអ្វីមួយដែលឪពុកម្ដាយអាចធ្វើបាន លោកទាំង២ នឹងសុខចិត្តលះបង់គ្រប់យ៉ាងដើម្បីជួយកូនៗរបស់ខ្លួន។
នេះគឺរឿងរ៉ាវរបស់ ស្វ៊ីវើយ ឪពុកជនជាតិចិន ក្នុងទីក្រុងគុនមីង ដែលមានកូនប្រុសម្នាក់ អាយុ ២ឆ្នាំ កើតជំងឺ Menkes Syndrome សភាវដែលបណ្ដាលមកពីភាពខុសប្រក្រតីរបស់ហ្ស៊ែន ធ្វើឱ្យការចែកចាយរបស់សារធាតុទង់ដែងក្នុងរាងកាយមានភាពខុសប្រក្រតី ដែលបណ្ដាលឱ្យប៉ះពាល់ដល់សុខភាព និងវិវឌ្ឍនាការរបស់ក្មេងយ៉ាងធ្ងន់ធ្ងរ។
អ្នកជំនាញការអះអាងថា ហាវយ៉ាង កូនប្រុសរបស់ស្វ៊ីវើយ នៅសល់ពេលវេលាតែប៉ុន្មានខែទៀតប៉ុណ្ណោះសម្រាប់ការមានជីវិតរស់នៅ តែស្វ៊ីវើយ មិនដែលចុះចាញ់ឡើយ តែគេតាំងចិត្តយ៉ាងម៉ឺងម៉ាត់ថា នឹងធ្វើគ្រប់យ៉ាងតាមដែលអាចធ្វើបាន ដើម្បីកូនប្រុសរបស់គេ ក្នុងនោះរួមទាំងការរៀនយល់ដឹងពីវិជ្ជាគីមី និងផលិតថ្នាំ ដែលរដ្ឋបាលចិន មិនអាចរៀបចំផ្ដល់ឱ្យបានដោយខ្លួនឯង។
ទោះជាអ្នកដែលជួបនឹងសភាវ Menkes Syndrome ច្រើនតែមិនសូវរស់ជីវិតលើសពីអាយុ ៣ឆ្នាំក៏ដោយ តែស្វ៊ីវើយ ក៏ព្យាយាមធ្វើនូវអ្វីដែលអាចទៅរួច ដើម្បីឱ្យកូនប្រុសរបស់គេ មានឱកាសតស៊ូជាថ្មីម្ដងទៀត។
ស្វ៊ីវើយ បានដឹងថា ថ្នាំតែ ១គត់ដែលអាចពន្យារជីវិតរបស់ហាវយ៉ាងបាន មិនមាននៅក្នុងប្រទេសចិនទេ ហើយការឆ្លងរាលដាលរបស់មេរោគកូវីដ-១៩ ធ្វើឱ្យស្ទើរតែមិនអាចទៅរួចឡើយ ដែលគេចង់សុំការជួយសង្គ្រោះពីក្រៅប្រទេស ដូច្នេះហើយទើបលោកឪពុក វ័យ ៣០ឆ្នាំរូបនេះ ចាប់ផ្ដើមចាត់ការរឿងនេះដោយខ្លួនឯង។
ស្វ៊ីវើយគ្មានបទពិសោធន៍ក្នុងផ្នែកវេជ្ជសាស្ត្រឡើយ តែគេចំណាយលុយប្រមាណជា ២០ ០០០យន់ ឬប្រមាណ ៣ ០០០ដុល្លារ ទិញឧបករណ៍ចាំបាច់ និងកែច្នៃផ្ទះរបស់គេឱ្យក្លាយជាបន្ទប់ពិសោធន៍។ បន្ទាប់ពីនោះ គេបានសិក្សាឯកសារពាក់ព័ន្ធនឹងជំងឺតំណពូជដ៏កម្រនេះតាមរយៈអ៊ីនធើណិត។
បន្ទាប់ពីនោះ គេក៏រៀនយល់ដឹងពីវិធីផលិតថ្នាំ “ខប់ភើហ៊ីសទិទីន” ដោយខ្លួនឯង ដែលវា គឺជាថ្នាំសម្រាប់ព្យាបាលអ្នកជំងឺនេះជាពិសេសតែម្ដង។
ស្វីវើយ និយាយថា “មិត្តភក្តិ និងក្រុមគ្រួសាររបស់ខ្ញុំ មិនយល់ស្របចំពោះរឿងនេះទេ ពួកគេប្រាប់ថា វាមិនអាចទៅរួចឡើយ”
“ខ្ញុំគ្មានពេលមកគិតថា តើវានឹងធ្វើបាន ឬមិនបាននោះទេ វាជារឿងដែលត្រូវតែធ្វើ ទោះជាកូនចង់កម្រើកមិនរួច ឬនិយាយមិនកើតក៏ដោយ តែគេក៏មានចិត្តវិញ្ញាណ និងអារម្មណ៍ដែរ”
ស្វ៊ីវើយ ផលិត ខប់ភើហ៊ីសទិទីន បាន ១ដបដំបូង បន្ទាប់ពីរៀបចំបន្ទប់ពិសោធន៍ហើយបានប្រមាណជា ៦ខែរួចមក។ គេចាប់ផ្ដើមសាកល្បង ជាមួយនឹងសត្វទន្សាយជាមុន រួចហើយទើបចាក់សាកល្បងលើខ្លួនឯង។ សត្វទន្សាយ មើលទៅហាក់ដូចជាមានសុខភាពល្អ ហើយរូបគេក៏ដូចគ្នាដែរ ទើបគេសម្រេចចិត្ត ផ្ដល់ថ្នាំនេះទៅកូន និងនាំកូនប្រុសទៅពិនិត្យរាងកាយនៅមន្ទីរពេទ្យ ដើម្បីឱ្យប្រាកដក្នុងចិត្តថា ថ្នាំ មិនបានបង្កគ្រោះថ្នាក់អ្វីដល់ថ្លើម និងក្រលៀនរបស់កូនប្រុសឡើយ។
ទោះជាគេធ្វើបានត្រឹមតែការពន្យារអាការរោគរបស់កូនប្រុសបាននៅពេលនេះក្ដី តែគេតាំងចិត្តថា នឹងតស៊ូតទៅទៀតឱ្យល្អបំផុតតាមដែលអាចធ្វើទៅបាន។
រឿងរ៉ាវរបស់ស្វ៊ីវើយ បានសាងក្ដីរំភើបពេញចិត្តដល់ VectorBuilder មន្ទីរពិសោធន៍តិចណូឡូជីជីវសាស្ត្រលំដាប់អន្តរជាតិ ដែលខណៈនេះកំពុងធ្វើការវិភាគពាក់ព័ន្ធនឹងការព្យាបាលហ្ស៊ែនរបស់អ្នកជំងឺ Menkes ដោយរៀបផែនការថា នឹងមានការសាកល្បងជាមួយសត្វក្នុងរយៈពេលប៉ុន្មានខែខាងមុខ។
ដោយសារតែសភាវដែលកម្រនឹងកើតចំពោះកុមារ ដែលមានត្រឹមតែ ១លើ ១០០ ០០០នាក់ប៉ុណ្ណោះ ទើប Menkes Syndrome មិនបានស្ថិតក្នុងចំណាប់អារម្មណ៍របស់ក្រុមហ៊ុនផលិតថ្នាំទាំងឡាយឡើយ តែពេលរឿងរ៉ាវរបស់ស្វ៊ីវើយ ត្រូវបានផ្សព្វផ្សាយ និងចែករំលែកចេញទៅ ធ្វើឱ្យមានមនុស្សចំនួនមិនតិចទេ បានអង្វរសុំឱ្យស្វ៊ីវើយ ជួយសង្គ្រោះកូនៗរបស់ពួកគេផង។
ស្វ៊ីវើយអាចធ្វើបានត្រឹមតែឆ្លើយបដិសេធទៅវិញយ៉ាងសុភាព ដោយសារតែច្បាប់អនុញ្ញាតឱ្យប្រតិបត្តិតែលើកូនប្រុសរបស់គេតែម្នាក់ប៉ុណ្ណោះ និងដរាបណាដែលគេមិនប្រើប្រាស់ថ្នាំនេះជាមួយអ្នកដទៃក្រៅពីកូនប្រុសខ្លួនឯង អាជ្ញាធរនឹងមិនចូលទៅជ្រៀតជ្រែកឡើយ។
បច្ចុប្បន្ន ស្វ៊ីវើយប្រើប្រាស់ពេលវេលាទៅលើការវិភាគស្រាវជ្រាវថ្នាំ ក្នុងបន្ទប់ពិសោធន៍របស់គេពេញម៉ោង រហូតធ្វើឱ្យរូបគេមិនអាចទៅធ្វើការងារណាផ្សេងបានទៀតឡើយ ដូច្នេះហើយទើបឪពុកម្ដាយរបស់គេ គឺជាអ្នកនៅរង់ចាំជួយលើរឿងលុយកាក់ការចំណាយទាំងអស់ ចំណែកភរិយារបស់គេ រស់នៅជាមួយកូនស្រីនៅឯអាផាតមិនត៍ ១ទៀតក្នុងទីក្រុងគុនមីង៕
