ប៉ូលិស និងអ្នកស្រុក នៅក្នុងទីក្រុង Hamamatsu របស់ជប៉ុន ពិតជាមានការងឿងឆ្ងល់យ៉ាងខ្លាំង ចំពោះគ្រាប់ដែកដ៏ធំមួយ ដែលបានបោកបក់លើឆ្នេរសមុទ្រ Enshu ក្នុងតំបន់។
វត្ថុដ៏ធំចម្លែកនេះ ដែលមានអង្កត់ផ្ចិតប្រហែល ១.៥ ម៉ែត្រ និងប្រហោងខាងក្នុង និងពណ៌ត្នោតទឹកក្រូច ជាមួយនឹងបំណះច្រែះនៅលើនោះ ត្រូវបានរកឃើញដោយស្ត្រីម្នាក់ ខណៈវានៅលើដីខ្សាច់ត្រឹមតែប៉ុន្មានម៉ែត្រពីច្រាំង កាលពីដើមសប្តាហ៍នេះ (១២ កុម្ភៈ) ។ ចំណែកអាជ្ញាធរបាននិយាយថា ពួកគេមិនបានដឹងថាវាជាអ្វីទេ គ្រាន់តែថាវាមិនផ្ទុះ។
ក្តីបារម្ភដំបូងមួយចំនួនដែលថាវាអាចជាអណ្តូងរ៉ែ ឬ torpedo គឺត្រូវបានច្រានចោល បន្ទាប់ពីអ្នកជំនាញបានប្រើប្រាស់បច្ចេកវិទ្យាកាំរស្មីអ៊ិច ដើម្បីពិនិត្យមើលផ្នែកខាងក្នុងរបស់វត្ថុនេះ និងបានរកឃើញថាវាជាប្រហោង ហើយបានបញ្ជាក់ថា វាមិនជាប់ពាក់ព័ន្ធនឹងសកម្មភាពចារកម្មពីបរទេសនោះដែរ។
យោងទៅតាមអ្នកដែលមានបទពិសោធន៍មួយចំនួន បានឲ្យដឹងថា វត្តមានរបស់ដៃលើកពីរនៅលើផ្ទៃរបស់វា (ដែលបង្ហាញថាវាអាចត្រូវបានភ្ជាប់ទៅនឹងអ្វីផ្សេងទៀត) បានជំរុញឱ្យមានការពន្យល់ដ៏សាមញ្ញ និងគួរឱ្យជឿជាក់ជាងនេះ ថាវាគ្រាន់តែជាយុថ្កាដែលរសាត់ប៉ុណ្ណោះ។
ទោះជាយ៉ាងណា មន្ត្រីជប៉ុននៅតែបិទតំបន់នោះ ហើយបានហៅអ្នកជំនាញគ្រឿងផ្ទុះដែលមានឈុតការពារ ដើម្បីស៊ើបអង្កេតបន្ថែមទៀត។ ប៉ុន្តែក្រោយមក សេចក្តីរាយការណ៍បាននិយាយថា អាជ្ញាធរនៅមិនទាន់ដឹងថា វត្ថុនោះជាអ្វី និងមកពីណានោះទេ។
បុរសក្នុងតំបន់ម្នាក់ដែលតែងតែដើរលេងនៅលើឆ្នេរខ្សាច់ បាននិយាយថា គាត់មិនយល់ថាហេតុអ្វីបានជាបាល់ដែកនេះ ក្លាយជាចំណុចនៃការចាប់អារម្មណ៍យ៉ាងដូច្នេះ។ គាត់បានប្រាប់ទូរទស្សន៍ NHK ថា «វាបាននៅទីនោះអស់រយៈពេលមួយខែហើយ។ ខ្ញុំព្យាយាមរុញវាទៅហើយ ប៉ុន្តែវាមិនកម្រើកសោះ»។
តែយ៉ាងណា អ្នកនិយមលេងអ៊ីនធឺណិតមិនទទួលយកការពន្យល់សាមញ្ញនេះទេ។ មនុស្សជាច្រើនបានគិតថា វាស្រដៀងនឹងយានអវកាស Xayda ក្នុងរឿងកំប្លែងដ៏ល្បី Dragon Ball ។ រីឯអ្នកផ្សេងទៀតក៏ជឿថា វាជា UFO ដែលធ្លាក់ពីលើមេឃ។ លើសពីនេះ ក៏នៅមានអ្នកទ្រឹស្តីផ្សេងៗទៀតថា វាជាស៊ុត Godzilla ឬអាចជាពងនាគ។
ទោះជាយ៉ាងណា សម្រាប់ពេលនេះ បាល់ដែកដ៏អាថ៌កំបាំងមួយនេះ ត្រូវបានបញ្ជូនទៅកាន់កន្លែងផលិតក្នុងស្រុក ហើយវានឹងត្រូវ «វិនាស» បើគ្មានអ្នកណាមកទាមទារនោះទេ៕ រក្សាសិទ្ធិដោយ៖ លឹម ហុង
— Populism Updates (@PopulismUpdates) February 22, 2023