ស្ទឹងត្រែង ៖ កម្លាំងនគរបាលBLOសហការជាមួយកម្លាំងនគរបាលមន្ទីរប្រឆាំងគ្រឿងញៀននៃការិល័យ (ក៩) របស់អគ្គស្នងការនគរបាលជាតិ បានបង្ក្រាបករណីគ្រឿងញៀន ១ករណី ដោយឃាត់ខ្លួនជនជាតិឡាវ ១នាក់ និងដកហូតវត្ថុតាងគ្រឿងញៀនប្រហែល៣គីឡូក្រាម នៅរសៀលថ្ងៃទី២៩ ខែមិថុនា ឆ្នាំ២០១៨ វេលាម៉ោង ១និង៣០នាទី នៅចំណុចស្ពានទី២ស្ថិត នៅភូមិខាំផាន់ សង្កាត់សាមគ្គី ក្រុងសទឹងត្រែង ខេត្តស្ទឹងត្រែង។
បើតាមប្រភពពីរសមត្ថកិច្ច បានឲ្យដឹងថា ប្រតិបត្តិការក្នុងការចុះបង្ក្រាបនោះ បានឃាត់ខ្លួនជនសង្ស័យចំនួន១នាក់ និងដកហូតវត្ថុតាងគ្រឿងញៀនប្រហែល៣គីឡូក្រាម។ ជនសង្ស័យឈ្មោះថង លូនប៉ាសឺត ជាជនជាតិឡាវ ភេទប្រុស អាយុ៥០ឆ្នាំរស់នៅ ប៉ាកសេ ខេត្តចំប៉ាសាក់ ប្រទេសឡាវ។ វត្ថុតាងដកហូតរួមមានៈសារធាតុញៀនប្រភេទម៉េតំហ្វេតាមីន ៣កញ្ចប់ធំ ប្រមាណ៣គីឡូក្រាម និងទូរស័ព្ទ មួយគ្រឿង ប្រើប្រាស់លេខ ០២០២៨៣៣៣៣៨៦ រថយន្តមួយគ្រឿង ម៉ាកហុងដា ពណ៌ស ស្លាកលេខឡាវ ។ បច្ចុប្បន្ន ត្រូវសមត្ថកិ្ចបាននាំខ្លួនជនសង្ស័យ និងវត្ថុតាង យកមកស្នងកានគរបាលខេត្តស្ទឹងត្រែង ដើម្បីបន្តនីតិវិធីច្បាប់។
ប្រភពដដែលបន្តថា ក្រោយការបង្ក្រាបកម្លាំងមន្ទីរ”ក៩” និងកម្លាំងBLO ដោយសហការជាមួយកម្លាំងនគរបាលឡាវ បន្តឃាត់ខ្លួនមេខ្លោង ឈ្មោះ ចាវ ពែន ភេទប្រុស អាយុ៣១ឆ្នាំ ជនជាតិ ឡាវ មានទីលំនៅ ភូមិ ចាប់សាន់ខាខន ស្រុកប៉ាក់សេ ខេត្តចំប៉ាសាក់ និងដកហូតបានរថយន្ត ២គ្រឿង នៅលើទឹកដីឡាវ៕ ដោយ៖បញ្ញាស័ក្តិ
