យោងតាមសារព័ត៌មាន CBS News បុរសម្នាក់ឈ្មោះ Jhonatan Acosta អាយុ ៣០ ឆ្នាំ ត្រូវបានរកឃើញកាលពីថ្ងៃសៅរ៍ (២៥ ខែកុម្ភៈ) បន្ទាប់ពីរស់នៅតែម្នាក់ឯងក្នុងតំបន់ភាគនិរតី ក្នុងព្រៃទឹកភ្លៀងដ៏ធំសម្បើមរបស់អាមេរិកខាងត្បូង។ គាត់បានវង្វេងក្នុងដំណើរបរបាញ់ជាមួយមិត្តភ័ក្តិ ៤ នាក់។
Jhonatan បាននិយាយថា គាត់បានយកទឹកពីស្បែកជើងកវែងរបស់គាត់ ហើយបានបង្ខំចិត្តផឹកកាកសំណល់របស់គាត់ដើម្បីរស់។ ឧប្បត្តិហេតុនេះ បានធ្វើឱ្យ Jhonatan ក្លាយជាអ្នករស់រានមានជីវិតយូរអង្វែងបំផុតនៃព្រៃអាម៉ាហ្សូន – ជាព្រៃដែលល្បីល្បាញគ្រោះថ្នាក់ និងគួរឱ្យភ័យខ្លាចបំផុតនៅលើផែនដី។
ប្រព័ន្ធផ្សព្វផ្សាយ Bolivian បានរាយការណ៍ថា Jhonatan ត្រូវបានរាយការណ៍ថា បានបាត់ខ្លួនដោយក្រុមគ្រួសាររបស់គាត់ នៅចុងខែមករា។ គាត់កំពុងធ្វើដំណើរបរបាញ់ជាមួយមិត្តភ័ក្តិ៤នាក់ នៅក្នុងព្រៃអាម៉ាហ្សូន ប៉ុន្តែបានបាត់ខ្លួនពីក្រុមកាលពីថ្ងៃទី២៥ ខែមករា។
Jhonatan បានប្រាប់ទូរទស្សន៍ Unitel TV ថា «ខ្ញុំអាចមានជីវិតមកទល់ពេលនេះ គឺដោយសារខ្ញុំបង្ខំចិត្តហូបសត្វល្អិត ផឹកទឹកនោមខ្លួនឯង និងថែមទាំងហូបដង្កូវទៀតផង។ ខ្ញុំក៏ត្រូវបានសត្វព្រៃវាយប្រហារផងដែរ»។
បុរសជនជាតិបូលីវីរូបនេះ បាននិយាយថា គាត់បានប្រឈមមុខជាមួយសត្វខ្លារខិន ពេលដែលគាត់ជាប់គាំងតែម្នាក់ឯង ហើយប្រាប់ថា គាត់ងាកទៅហូបឫសដើមឈើឆៅ។ ប៉ុន្តែពេលទឹកអស់ គាត់ត្រូវផឹកកាកសំណល់ខ្លួនឯង។
Jhonatan បាននិយាយថា៖ «ខ្ញុំបានសុំព្រះឲ្យមានភ្លៀង។ បើមិនបានភ្លៀងទេ ខ្ញុំមិនរួចជីវិតទេ»។
ដោយពិបាកចិត្ត លោក Jhonatan បានដើរប្រហែល ៤០ គីឡូម៉ែត្រ ដើម្បីស្វែងរកកន្លែងរស់នៅ ប៉ុន្តែគាត់បានដឹងភ្លាមៗថា គាត់កំពុងដើរវិលវល់ជុំវិញប៉ុណ្ណោះ។ នៅពេលយប់ Jhonatan ត្រូវបានសត្វគ្រប់ប្រភេទខាំ។
ទោះបីបាត់មុខយូរយ៉ាងនេះក៏ដោយ ក៏មិត្តភក្តិ និងក្រុមគ្រួសាររបស់ Jhonatan មិនដែលអស់សង្ឃឹម ក្នុងការជួបគាត់ម្តងទៀតឡើយ។ ហើយបន្ទាប់មក អព្ភូតហេតុបានលេចចេញមក។
មួយខែបន្ទាប់ពី Jhonatan បានបាត់ខ្លួន អ្នកដែលស្វែងរកគាត់ ស្រាប់តែឮសំឡេងស្រែករកជំនួយ៖ «សូមជួយយកខ្ញុំចេញពីទីនេះផង!»។
Jhonatan បានប្រាប់ពីពេលដែលគាត់ត្រូវបានគេជួយសង្គ្រោះថា គាត់បានលឺសំលេងនៃក្រុមស្វែងរក នៅជិតតំបន់ដែលគាត់បានបាត់ខ្លួន ហើយកំពុងព្យាយាមរកវិធីដើម្បីទទួលបានការចាប់អារម្មណ៍របស់ពួកគេ។
ដំបូងឡើយ អ្នកដែលកំពុងស្វែងរកគាត់គិតថា នោះគឺជាសមាជិកម្នាក់ទៀតនៃក្រុមដែលសុំជំនួយ ប៉ុន្តែពួកគេបានដឹងភ្លាមៗថាមិនមែនជាករណីនោះទេ នៅពេលដែលពួកគេឃើញ Jhonatan មានសក់រញ៉េរញ៉ៃ និងមុខមាត់ឡើងស្រមិះស្រមុះ។
យោងតាមប្រព័ន្ធផ្សព្វផ្សាយក្នុងស្រុក ក្រុមស្រាវជ្រាវ ដំបូងមានការភ័យខ្លាច ដោយសារតែ Jhonatan មើលទៅខុសប្លែកពីបុរសដែលបានបាត់ខ្លួនកាលពីមួយខែមុន ហើយមានកាំភ្លើងខ្លីនៅក្នុងដៃទៀតផង។ Jhonatan ត្រូវបានស្វាគមន៍មកផ្ទះជាមួយនឹងការអបអរសាទរ និងបាញ់កាំជ្រួចនៅក្នុងទីក្រុង Baures នៅយប់ថ្ងៃទី ២៥ ខែកុម្ភៈ ពោលគឺមួយខែបន្ទាប់ពីការបាត់ខ្លួនរបស់គាត់។
ប្រភពមួយបានប្រាប់ប្រព័ន្ធផ្សព្វផ្សាយក្នុងស្រុកថា «យើងតែងតែមានជំនឿ។ ជាសំណាងល្អ គាត់មិនបានកាន់កាំបិតទេ ហើយកាំភ្លើងក្នុងដៃរបស់គាត់ ក៏ត្រូវបានខូចខាត ប៉ុន្តែគាត់អាចការពារខ្លួនឯងបាន» ។
ប្អូនប្រុសរបស់ Jhonatan ឈ្មោះ Horacio Acosta បានប្រាប់ប្រព័ន្ធផ្សព្វផ្សាយក្នុងស្រុកថា «ថ្ងៃនោះ យើងបានទៅជាមួយជនជាតិដើមភាគតិច Ayoreos និងមនុស្សពីរបីនាក់ ដើម្បីជួយក្នុងការស្វែងរក។ មានមនុស្សប្រហែល ១៧ នាក់, យើងបំបែកការស្វែងរកនៅតំបន់ផ្សេងៗគ្នា។ ៤ នាក់មកពី ទីក្រុង បានរកឃើញគាត់ ដំបូងពួកគាត់ខ្លាចមិនហ៊ានចូលទៅជិតបងប្រុសខ្ញុំទេ ព្រោះគាត់មើលទៅមានសភាពទ្រុឌទ្រោម…»។
Horacio បាននិយាយថា វាគឺជា «អព្ភូតហេតុ» ។ គាត់បានបន្ថែមថា «ការពិត គឺថាខ្ញុំមានអារម្មណ៍សប្បាយរីករាយ ធូរស្រាល សំណាងខ្លាំងណាស់ នេះជាអព្ភូតហេតុមួយ យើងត្រូវគោរពឱកាសនេះ នៅពេលដែលបងប្រុសរបស់ខ្ញុំបានកើតជាថ្មី ពួកយើងត្រូវតែរួបរួមគ្នា កាន់តែជិតស្និទ្ធ។ អ្វីគ្រប់យ៉ាងដែលយើងធ្លាប់ឆ្លងកាត់ មិនមែនស្អាតទេ»។
Jhonatan ត្រូវបានគេយកទៅមន្ទីរពេទ្យដើម្បីទទួលការព្យាបាលដោយខ្វះជាតិទឹក ខណៈរាងកាយរបស់គាត់ «ស្គម» ខ្លាំង។ គាត់បានប្រាប់ប្រព័ន្ធផ្សព្វផ្សាយក្នុងស្រុកថា គាត់ហៀបនឹងបាត់បង់ក្តីសង្ឃឹមទាំងអស់ នៅពេលត្រូវបានរកឃើញ៕ រក្សាសិទ្ធិដោយ៖ លឹម ហុង
