រូបភាពនារីម្នាក់ ស្ថិតក្នុងសម្លៀកបំពាក់រ៉ូបកូនក្រមុំ ដើរជូតទឹកភ្នែកនៅកណ្តាលផ្លូវទាំងកណ្តាលយប់ បានធ្វើឲ្យអ្នកលេងអ៊ីនធឺណិតនៅប្រទេសវៀតណាម ភ្ញាក់ផ្អើល និងអាណិតអាសូរជាខ្លាំង បន្ទាប់ពីបានដឹងរឿងរ៉ាវរបស់នាង ដែលត្រូវបានលាតត្រដាង។
នេះបើតាមគេហទំព័រ SAOstar នៅថ្ងៃទី៩ ខែមីនា ឆ្នាំ២០២៣ បានបញ្ចេញរឿងរ៉ាវរបស់នារីជាកូនម្នាក់ ឲ្យដឹងថា បន្ទាប់ពីពិធីមង្គលការត្រូវបានបញ្ចប់ កូនក្រមុំមកពី Ninh Binh បានដឹងថា ប្តីរបស់នាងដែលទើបបានស្បថស្បែ គឺគ្រាន់តែជាបោកប្រាស់ចិត្តនាងប៉ុណ្ណោះ ព្រោះរូបគេជាកូនកំលោះបានទៅដេកជាមួយមិត្តស្រីរួមការងារ មុនថ្ងៃរៀបការតែ១ថ្ងៃប៉ុណ្ណោះ។
ក្រោយពីបានដឹងរឿងដ៏ខ្លោចចិត្តនេះរួចហើយ នារីជាកូនក្រមុំ មិនបាននិយាយអ្វីទាំងអស់ និងសម្រេចចិត្តចាកចេញពីរោងការ វិលត្រឡប់ទៅផ្ទះម្ដាយខ្លួនវិញ ទោះត្រូវដើរចម្ងាយផ្លូវជាង ៧គីឡូម៉ែត្រ ទាំងកណ្ដាលយប់ សូម្បីតែសម្លៀកបំពាក់អាពាហ៍ពិពាហ៍ ក៏មិនបានផ្លាស់ប្ដូរ។
ទន្ទឹមនឹងរូបភាពដ៏គួរឲ្យស្រណោះនេះផងដែរ ឃើញថាបានធ្វើឲ្យអ្នកលេងអ៊ីនធើរណែតជាច្រើន សម្តែងក្តីអាណិតអាសូរ ដោយក្នុងនោះ អ្នកលេងបណ្តាញសង្គមម្នាក់ បានបញ្ចេញមតិលើកឡើងជាមួយកំហឹងឈឺចាប់ជំនួសថា៖ «សំណាងខ្លាំងណាស់ ដែលនាងមិនទាន់ចាប់ផ្ដើមរស់នៅជាមួយមនុស្សប្រុសម្នាក់នេះ ហើយគ្មានកូននៅជាមួយគ្នា បើឆ្លងកាត់រហូតដល់មានកូន វានឹងឈឺចាប់ទាំងម្តាយទាំងកូនហើយ។
រីឯអ្នកដទៃទៀត ដែលមានការព្រួយបារម្ភពីសុវត្ថិភាពរបស់នាង បានលើកឡើងថា «កូនក្រមុំគួររកឡានជិះ ជំនួសការដើរនៅលើដងផ្លូវទាំងកណ្តាលយប់បែបនេះ ព្រោះវាមើលទៅ ពិតជាប្រឈមនឹងគ្រោះថ្នាក់ណាស់!»៕ រក្សាសិទ្ធិដោយ៖ លឹម ហុង
