ក្រុមមុជទឹកពិសេស Navy Seal នៅក្នុងរូងភ្នំ Tham Luang លិចលង់ដោយទឹកជំនន់ កាលពីរសៀលថ្ងៃចន្ទនេះ បានចូលដល់ផ្នែកមួយក្នុងចម្ងាយ ៥០០ ម៉ែត្រ ប៉ុណ្ណោះ ពី «បន្ទប់» មួយ ដែលមានគំនរថ្មកាន់តែច្រើន ត្រូវបានហៅដោយអ្នកជីករូងថា “Pattaya Beach” ដែលអាចផ្តល់ទីជម្រកមួយដល់ក្មេងប្រុសចំនួន ១២ នាក់ និងគ្រូបង្វឹកបាល់ទាត់ម្នាក់របស់ពួកគេ ដែលបានជាប់គាំងនៅក្នុងរូងភ្នំនេះអស់រយៈពេលជាង១សប្តាហ៍ នៅពេលភ្លៀងធ្លាក់ដ៏ខ្លាំងក្លា ធ្វើឲ្យលិចលង់រូងនេះ និងរារាំងពួកគេពុំអាចចាកចេញក្រៅវិញបាន ។
ដំណើរការសង្គ្រោះនេះ បានឆ្ពោះទៅមុខដ៏យឺតយ៉ាវ ព្រោះតែក្រុមមុជទឹកត្រូវបានពង្រីកផ្នែកចង្អៀត ដែលលាតសន្ធឹងប្រវែង ១០០ ម៉ែត្រ ហើយ ម្យ៉ាងវិញទៀត ពួកគេក៏ពុំអាចឆ្លងកាត់បានដោយគ្មានបំពង់ខ្យល់របស់ពួកគេ ដែលត្រូវជាប់គាំងបានឡើយ ។
អភិបាលខេត្តឈៀងរ៉ៃ លោក Narongsak Osotthanakorn មុននេះបាននិយាយថា ក្រុមសង្គ្រោះបានគ្រប់គ្រងចូលដល់ផ្លូវប្រសព្វបំបែកជា៣ “Sam Yak” ហើយឥឡូវនេះ ផ្នែកដ៏សំខាន់បំផុតនោះ គឺផ្លូវក្រោមដីស្មុគស្មាញដ៏ងងឹតឈឹងមួយទៀត ដែលស្ថិតនៅខាងមុខ ។
លោកបានប្រាប់អ្នកសារព័ត៌មាននៅថ្ងៃចន្ទនេះថា «ឧបសគ្គមួយដែលយើងបានរកឃើញ គឺរូងដ៏តូចបំផុតមួយ ដែលយើងត្រូវការពង្រីក ដើម្បីមនុស្សអាចឆ្លងកាត់បាន» ។
គួរបញ្ជាក់ថា “Pattaya Beach” គឺមានចម្ងាយប្រហែល២គីឡូម៉ែត្រ ពីកន្លែងបញ្ជាឆ្ពោះទៅមុខរបស់ក្រុមមុជទឹក នៅក្នុងបន្ទប់ទី៣នៃបណ្តាញរូបភ្នំដ៏វែងបំផុតនេះ ពោលគឺវាមានចម្ងាយប្រហែលជា ៥ គីឡូម៉ែត្រ ពីច្រកចូលរូបភ្នំនៅក្នុងឧស្យានព្រៃ Tham LUang Khun Nam Nang Nong ស្ថិតក្នុងស្រុក Mae Sai ភាគខាងបង្អស់របស់ថៃ ។
លោកឧបនាយករដ្ឋមន្ត្រីថៃ លោក Prawit Wongsuwon បាននិយាយនៅក្នុងទីក្រុងបាងកកថា ក្រុមអ្នកជួយសង្គ្រោះសង្ឃឹមថានឹងមកដល់ “Pattaya Beach” នៅថ្ងៃចន្ទនេះ ប៉ុន្តែ ដោយសារតែចរន្តទឹកដ៏ខ្លាំងនៅច្រកដ៏តូចចង្អៀតនេះ ដែលមូលហេតុបង្កជាឧបសគ្គដ៏ធំមួយ សម្រាប់ក្រុមសង្គ្រោះបន្តដំណើរទៅមុខ ៕ ឧត្តម