អាមេរិកត្រូវបានគេគិតថា កំពុងថ្លឹងថ្លែងរៀបចំជំនួបលើកទី២ ជាមួយមេដឹកនាំកូរ៉េខាងជើង នៅទីក្រុង New York។
តាមគេហទំព័រ Axios ជំនួបកំពូលលើកទី២ រវាងអាមេរិកនិងកូរ៉េខាងជើងអាចនឹងស្របគ្នាជាមួយពេលវេលាប្រព្រឹត្តទៅនៃមហាសន្និបាតពេញអង្គរបស់អង្គការសហប្រជាជាតិនៅខែកញ្ញាខាងមុខ។ ប៉ុន្ដែជំនួបនេះអាចប្រព្រឹត្តទៅបានប្រសិនបើក្រុងព្យុងយ៉ាងបង្ហាញឱ្យឃើញជំហានលូតលាស់ក្នុងការរំសាយអាវុធនុយក្លេអ៊ែរនិងកាំជ្រួចអន្តរទ្វីប។
មេដឹកនាំកូរ៉េខាងជើងនិងប្រធានាធិបតីអាមេរិក នាជំនួបដំបូងថ្ងៃទី១២មិថុនា នៅសិង្ហបុរី
ជំនួបទី២ មានគម្រោងប្រព្រឹត្តទៅ៣ខែក្រោយមេដឹកនាំទាំងពីរជួបគ្នាលើកដំបូងនៅសិង្ហបុរី។ តាមព័ត៌មានមួយចំនួនចេញផ្សាយនៅចុងសប្ដាហ៍កន្លងមកលើកឡើងថា កូរ៉េខាងជើងកំពុងបន្តការងារនៅក្នុងឃ្លាំងនុយក្លេអ៊ែរ ហើយប្រឹងប្រែងលាក់ទុកកាំជ្រួច។
ទោះបីជាកូរ៉េខាងជើងបានផ្អាកសាកល្បងនុយក្លេអ៊ែនិងកាំជ្រួច បើតាម NBC News នោះពុំមានភស្ដុតាងបង្ហាញឱ្យឃើញថាពួកគេកំពុងកាត់បន្ថយចំនួនអាវុធឬផ្អាកការផលិតទេ។នៅមានភស្ដុតាងបញ្ជាក់ថាពួកគេកំពុងប្រឹងប្រែងបោកបញ្ឆោតអាមេរិក។
បណ្ដារូបភាពផ្កាយរណបថ្មីៗក៏បង្ហាញឱ្យឃើញការដែលកូរ៉េសាងសង់រួចរាល់និងបើកទូលាយវិទ្យាស្ថាននិងវត្ថុធាតុគីមីនៅទីក្រុងHamhung ដែលជាំកន្លែងត្រូវបានគេចាត់ទុកថាកំពុងផលិតកាំជ្រួចនិងឥន្ធនៈរឹង៕
សូយន