នៅព្រឹកថ្ងៃទី២០ ខែមីនា ប៉ូលីសស្រុក Phu Loc (Thua Thien-Hue) បានសហការជាបន្ទាន់ជាមួយប៉ូលីសស្រុក Lien Chieu (ទីក្រុង Da Nang) ដើម្បីផ្ទៀងផ្ទាត់ និងតាមចាប់គូស្នេហ៍មួយគូដែលបើកម៉ូតូ SH ប្រៀបដូចអ្នកសម្តែង “សៀក” ខណៈបើកបរនៅផ្លូវកោងដ៏គ្រោះថ្នាក់ ដែលបានបង្កការខឹងសម្បារយ៉ាងខ្លាំង ពីសាធារណជន។
ជាក់ស្តែង កាលពីព្រលប់ថ្ងៃទី១៩ ខែមីនា នៅលើបណ្ដាញសង្គម បានលេចចេញនូវវីដេអូឃ្លីបរយៈពេល ៣០ វិនាទី ដែលបង្ហាញពីទិដ្ឋភាពយុវជនម្នាក់ នៅពីក្រោយនារីជាគូស្នេហ៍ដែលពោរពេញដោយសាក់ នៅលើម៉ូតូ SH ពាក់ស្លាកលេខ Thua Thien – Hue ដោយបញ្ចេញស្ទាយល៍ចំកោងខ្លួនចំហៀងម៉ូតូខាងឆ្វេង ដៃទាំងពីរកាន់ចង្កូត ដើម្បីគ្រប់គ្រងម៉ូតូ ខណៈជើងខាងឆ្វេងឈរជាន់លើឈ្នាន់ ចំណែកជើងខាងស្តាំដាក់ជង្គង់កល់លើកែបអង្គុយខាងក្រោយ។
តែអ្វីដែលគួរឲ្យហួសចិត្តនោះ គឺខណៈដែលគូស្នេហ៍នេះ កំពុង«ធ្វើចរាចរណ៍»ជាមួយម៉ូតូ SH យ៉ាងឡូយ គេក៏បានឮសំឡេងរបស់នារីម្នាក់ បានលាន់មាត់សរសើរដោយពោលថា៖ «Idol, Idol, Idol…»។ ទោះជាយ៉ាងណា ករណីនេះបានបង្កការខកចិត្តដល់អ្នកប្រើប្រាស់ផ្លូវ និងសាធារណជន។
បច្ចុប្បន្ន ភ្នាក់ងារនគរបាលស្រុក Phu Loc កំពុងស្រាវជ្រាវជាបន្ទាន់ ដើម្បីស្វែងរកគូស្នេហ៍ជាម្ចាស់ម៉ូតូ SH នៅក្នុងឃ្លីប ព្រោះថា នេះគឺជាទង្វើដែលបង្កឱ្យមានគ្រោះថ្នាក់ចរាចរណ៍ ហើយគួរតែត្រូវដោះស្រាយឱ្យបានម៉ឺងម៉ាត់ ទៅតាមច្បាប់៕ រក្សាសិទ្ធិដោយ៖ លឹម ហុង