ខ្សែកាប្លិ៍ទូរស័ព្ទមួយត្រូវបានតភ្ជាប់ទៅក្នុងល្អាងភ្នំ Tham Luang កន្លែងដែលកីឡាករវ័យជំទង់១២រូប និងគ្រូបង្វឹកម្នាក់ នៅតែកំពុងជាប់គាំង បន្ទាប់ពីត្រូវបានជួយសង្គ្រោះកាលពីយប់ថ្ងៃចន្ទ (០២ កក្កដា) ។
អភិបាលខេត្ដឈាងរ៉ៃ លោក Narongsak Osotthanakorn បានឱ្យដឹងនៅថ្ងៃម្សិលមិញនេះថា ក្រុមបាល់ទាត់វ័យក្មេងនឹងឆាប់បានសន្ទនាជាមួយសាច់ញាតិ បន្ទាប់ពីត្រូវជាប់គាំងក្នុងល្អាង១០ថ្ងៃមកហើយ ។
ទោះយ៉ាងណា បើតាមលោកអភិបាលខេត្ដរូបនេះ មន្ដ្រីសមត្ថកិច្ចនៅពុំទាន់មានការសម្រេចចិត្តអំពីពេលវេលានិងវិធី ដើម្បីបញ្ជូនក្មេងទាំងនោះចេញពីកន្លែងជាប់គាំងចេញមកក្រៅ។ អ្នកមុជទឹកនៃកងកម្លាំងកុម្មង់ដូ SEAL កំពុងស្ថិតនៅក្នុងល្អាងភ្នំនៅឡើយ ព្រោះពួកគេត្រូវចំណាយពេលដល់ទៅ ៦ម៉ោង ដើម្បីធ្វើដំណើរពីទីតាំងរបស់ក្មេងៗទាំងនោះមកដល់ក្រៅ។
ទឹកនៅតែបន្ដចូលក្នុងល្អាង ប៉ុន្ដែកងកម្លាំងសង្គ្រោះនៅបន្តកិច្ចប្រឹងប្រែងគ្រប់គ្រងកម្រិតទឹក ដើម្បីធានាសុវត្ថិភាពដល់ជនរងគ្រោះដែលកំពុងស្ថិតនៅលើទំនួលដីខ្ពស់មួយ។ ក្មេងៗទាំង១២នាក់ត្រូវបានផ្ដល់បន្ថែម gel បំប៉នថាមពល ដើម្បីសន្សំសំចៃស្បៀងអាហារ ដោយហេតុថា ច្រកបញ្ជូនអាហារចូលមានសភាពចង្អៀត ហើយពិបាកយ៉ាងខ្លាំង។
ក្រុមសង្គ្រោះក៏កំពុងបន្តស្វះស្វែងរកច្រកចេញផ្សេងទៀត ដើម្បីរំដោះយកជនរងគ្រោះឱ្យបានឆាប់បំផុត ៕ សូយន
