អាពាហ៍ពិពាហ៍ ត្រូវបានគេចាត់ទុកថាជាសុបិនរបស់ស្ត្រីជាច្រើន ដើម្បីក្លាយជាកូនក្រមុំតែងខ្លួនយ៉ាងស្រស់ស្អាត ដូច្នេះហើយ នារីត្រូវតែថែរក្សាខ្លួនចាប់តាំងពីក្បាលដល់ចុងជើង ដើម្បីចេញមកស្អាតតាមតែអាចធ្វើទៅបាន ក្នុងថ្ងៃព្រឹត្តិការណ៍ផ្ទាល់ខ្លួនរបស់អ្នក។
ប៉ុន្តែ បើអ្នកកើតជំងឺអុតស្វាយភ្លាមៗ មុនពេលរៀបការ? ដូចរឿងកូនក្រមុំម្នាក់នេះ តើពិបាកចិត្តយ៉ាងណា!?។ ជាក់ស្តែង នារីជាកូនក្រមុំម្នាក់ បានចែករំលែកបទពិសោធន៍ជីវិតរបស់នាង បន្ទាប់ពីនាងកើតជំងឺអុតស្វាយ មុនពេលរៀបការដែលបន្សល់ទុកស្លាកស្នាមជាច្រើន នៅលើរូបរាងកាយ ហើយនៅសល់តែ ៥០ ថ្ងៃទៀតប៉ុណ្ណោះ សម្រាប់ការព្យាបាល ឬប្រហែល១ខែ។
នៅលើគណនី TikTok របស់ខ្លួនឈ្មោះ lomklang កូនក្រមុំរូបនេះបានឲ្យដឹងថា ពេលនេះកើតជំងឺអុតស្វាយហើយ បន្សល់ទុកស្លាកស្នាមជាច្រើននៅលើផ្ទៃមុខ។ ខ្ញុំទទួលស្គាល់ថា ខ្ញុំព្រួយបារម្ភខ្លាំងណាស់ ដោយព្យាយាមធ្វើអ្វីៗគ្រប់យ៉ាង ដើម្បីឱ្យវាប្រសើរឡើង រួមមានការលាបថ្នាំដើម្បីកាត់បន្ថយស្លាកស្នាម លេបថ្នាំវីតាមីន ម៉ាសបិទមុខ និងធ្វើការព្យាបាលដោយមេសូព្យាបាល (Mesotherapy) ដើម្បីបំប៉នមុខឱ្យភ្លឺថ្លា ហើយស្លាកស្នាមក៏បានថយចុះទៅតាមនោះផងដែរ។
ប៉ុន្តែ អ្វីដែលធ្វើឱ្យនាងស្រស់ស្អាតបំផុត ក្នុងថ្ងៃមង្គលការនោះ គឺនាងបានជួបជាមួយអ្នកតុបតែងមុខដ៏ល្អឥតខ្ចោះ ដែលធ្វើឱ្យនាងមើលទៅស្រស់ស្អាត និងភ្លឺថ្លា ដូចជាមិនធ្លាប់មានជំងឺអុតស្វាយពីមុនមកអ៊ីចឹង។ ជាមួយរូបភាពដ៏ពេញចិត្តខ្លាំងបំផុតនេះ នាងក៏បានសរសេរសារនៅលើឃ្លីបថា «អរគុណសម្រាប់ការតស៊ូ និងឆ្លងកាត់វា។ អរគុណអ្នកផាត់មុខដែលបង្កើតភាពស្រស់ស្អាតដ៏អស្ចារ្យមួយនេះ»៕ រក្សាសិទ្ធិដោយ៖ លឹម ហុង