វីដេអូ TikTok មួយថ្មីៗនេះ ដែលកំពុងតែល្បីខ្លាំង បង្ហាញឲ្យឃើញក្មេងស្រីតូចម្នាក់ ដែលរត់ចេញពីសាលារបស់នាង បានធ្វើឲ្យគ្រប់គ្នានៅលើបណ្តាញសង្គម ភ្ញាក់ផ្អើល និងអស់សំណើចយ៉ាងខ្លាំង។
ជាក់ស្តែង នៅក្នុងវីដេអូ ត្រូវបានឃើញក្មេងស្រីតូចនោះ ហាក់ដូចជាកំពុងលេងក្រវ៉ែលក្បែររបង ខណៈពេលដែលនាងកំពុងរៀបចំផែនការចាកចេញ។ ហើយនៅទីបំផុត ក្មេងស្រីនោះក៏ស្រាប់តែឡើងផ្លោះខ្លួនតាមចន្លោះរនាំងទ្វាររបង ឆ្លងទៅផ្នែកខាងទៀតបានសម្រេច។
ទោះជាយ៉ាងណា បន្ទាប់ពីក្មេងស្រីនោះរត់គេចខ្លួន គ្រូម្នាក់បានលេចមុខនៅកន្លែងកើតហេតុ និងព្យាយាមឱ្យឆ្មាំចាប់ក្មេងស្រីនោះ។ បន្ទាប់មក ស្រ្តីជាសន្តិសុខសាលា ក៏បានចាប់នាំនាងត្រឡប់ទៅក្នុងថ្នាក់របស់នាងវិញផងដែរ។
វីដេអូនេះ ចាប់តាំងពីនោះបានរីករាលយ៉ាងលឿន ហើយបច្ចុប្បន្ន មានអ្នកចូលមើលជាង ១,៥ លានដង នៅលើ TikTok។ អ្នកនិយមលេងអ៊ីនធឺណិតបានចូលទៅបញ្ចេញមតិ ដើម្បីចែករំលែកគំនិតរបស់ពួកគេ ចំពោះសកម្មភាពព្យាយាមរត់គេចពីសាលារបស់ក្មេងស្រី។ ក្នុងនោះ អ្នកលេងម្នាក់បានសរសើរថា «ឲ្យតូច តែមិននឹកស្មានអាចផ្លោះរបងរួចទេ»។ រីឯអ្នកផ្សេងទៀត បាននិយាយថា៖ «វាគ្រាន់តែជាថ្ងៃដំបូងប៉ុណ្ណោះ ឆ្លាតណាស់ក្មួយស្រី»។
ទន្ទឹមនឹងនេះ អ្នកប្រើប្រាស់ផ្សេងទៀត បានចែករំលែកពីបទពិសោធន៍ស្រដៀងគ្នានេះ ដែលពួកគេកាលពីអតីតកាល ក៏ធ្លាប់ផ្លោះរបងរត់ចេញពីសាលាថា៖ «ដូចខ្ញុំដែរ ខ្ញុំរត់ចេញបែបនេះ ព្រោះខ្ញុំហែកសៀវភៅមិត្តខ្ញុំ ពេលនោះខ្ញុំបារម្ភខ្លាចគ្រូស្តីបន្ទោសឲ្យ, យើងដូចគ្នា តែខុសគ្នាតែមួយគត់ គឺខ្ញុំមិនបានចាប់បាន លើកលែងតែឪពុករបស់ខ្ញុំបានរកឃើញខ្ញុំនៅតាមផ្លូវ ខណៈពេលដែលគាត់កំពុងតែទិញ nasi lemak»៕ រក្សាសិទ្ធិដោយ៖ លឹម ហុង
