ថ្មីៗនេះ មានករណីថ្មីធ្វើឲ្យប្រជាពលរដ្ឋក្តៅក្រហាយខ្លាំងទៀតហើយ ទាក់ទងនឹងក្រុមជនស៊ីវិលមួយក្រុម ជិះឡាន និងម៉ូតូស្លាកលេខនគរបាល បានចុះទៅចាប់ប្រជាពលរដ្ឋ ទាំងគ្មានមូលហេតុ ហើយចុងក្រោយ បែរនិយាយថា ចាប់ច្រឡំ បន្ទាប់ពីប្រជាពលរដ្ឋនាំគ្នាតវ៉ា។
ករណីនេះ បានកើតឡើងនៅជិតកំពង់ដកោះនរា ស្ថិតនៅភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ កាលពីវេលាម៉ោងប្រមាណជាង ៥ ល្ងាច ថ្ងៃទី២២ ខែមីនា ឆ្នាំ២០២៣។
នេះតាមគណនីហ្វេសប៊ុកឈ្មោះ Sreyka Min បានបង្ហោះវីដេអូ និងរៀបរាប់ទាំងឈឺចាប់ថា៖ «សន្តិភាព នៅត្រង់ណា គ្រួសារខ្ញុំបានជួបរឿងអយុត្តិធម៍ បងប្អូនជួយស៊ែរ អោយបងប្អូនខ្មែរយើងប្រុងប្រយ័ត្ន សួរថាជាប៉ូលីសការពារប្រជាពលរដ្ឋ រឺជាអ្វីលោកអើយយយ មកចាប់បងខ្ញុំប្អូនខ្ញុំទាំងគ្មានកំហុស បានប្រជាពលរដ្ឋ គេជួយកុំអីបងខ្ញុំទៅជាយ៉ាងណាបងប្អូន សូមថ្នាក់ដឹកនាំធំៗជួយចាត់វិធានការលើក្រុមលោកប៉ូលីសទាំងអស់នេះបង គាត់បានវាយបងខ្ញុំយ៉ាងសាហាវ ហើយក្រុមប៉ូលីសគាត់បែរជាយាយថា ចាប់បងខ្ញុំច្រឡំ ហើយសុំទោសបងខ្ញុំ សួរថា សុខសុវត្ថិភាពនៅត្រង់ណាបងប្អូន ជួយសែលរកយុត្តិធម៍ដល់ប្រជាជនស្លូតត្រង់ផង»។
ក្រោយត្រូវបានដោះលែង បុរសជាជនរងគ្រោះ បានប្រាប់ឲ្យដឹងថា ក្រុមជនស៊ីវិលដើរធ្វើស៊ីទាំងនោះ ឲ្យខ្លួនសហការជាមួយ ប៉ុន្តែ ខ្លួនមិនព្រមធ្វើតាម ព្រោះមិនបានប្រព្រឹត្តអ្វីខុសផងហ្នឹង ឲ្យសហការស្អីគេ ហើយចុងក្រោយ បែរមកនិយាយសុំទោស ដោយសារចាប់ច្រឡំដ៏ហួសចិត្តខ្លាំងបំផុត។
ករណីក្រុមជនស៊ីវិលដើរ «ប្លន់» មនុស្សគ្មានកំហុសយ៉ាងស្រស់ៗ ដែលតែងកើតឡើងជារឿយៗនេះ ប្រជាពលរដ្ឋ បានបញ្ចេញកំហឹងក្តៅក្រហាយថា «មើលហើយរន្ធត់ចិត្តជំនួស, ជិតបោះឆ្នោតហើយនិយាយពីខំនោះខំ យីពួកអាមន្រ្តីគ្រាប់ល្ពៅអស់នេះ, ពួកក្រុមថោកទាប វាដើរធើស៊ីគេតាមភូមិ នេះសំណាងបានប្រជាពលរដ្ឋជួយ ចុះបើអត់មានប្រជាពលរដ្ឋ មិនចប់ហើយ!, ឃើញមុខមាត់ ស្លាកលេខច្បាស់ៗប៉ុណ្ណឹងហើយ បើចាប់មកដុះក្អែលមិនបានទៀតដឹងយាយថាម៉េចទេ, សូមអគ្គស្នងការដ្ឋាននគរបាលជាតិ ជំនាញប្រតិកម្មរហ័ស ចេញមុខបកស្រាយផង កុំអោយរាស្រ្តក្តៅក្រហាយ»។
ទន្ទឹមនឹងនេះផងដែរ ពលរដ្ឋម្នាក់ក៏បានបញ្ចេញអារម្មណ៍ពិតមួយនេះថា៖ «កាលមកនៅភ្នំពេញដំបូង ម៉ែផ្ដាំថា កូនកុំដើរលេងយប់ពេក ខ្លាចចោរ ខ្លាចអ្នកញៀនថ្នាំ វៃយកម៉ូតូ តែពេលនេះមានអារម្មណ៍ថាខ្លាចប៉ូលីសជាងចោរទៅវិញ បើជួបចោរស្រែកអោយប៉ូលីសជួយ ចុះបើជួបប៉ូលីសបែបនេះ ស្រែកអោយនរណាជួយ សន្តិភាពនេះឬ?»៕ រក្សាសិទ្ធិដោយ៖ លឹម ហុង
