កាលពីថ្ងៃទី១៤ ខែកុម្ភៈ ឆ្នាំ២០២៣ កន្លងទៅនេះ នៅលើបណ្តាញសង្គម ពិតជាផ្ទុះការចាប់អារម្មណ៍យ៉ាងខ្លាំង ចំពោះរឿងរ៉ាវរបស់ស្រ្តីម្នាក់ ដែលបានទៅសាក់ចិញ្ចើម ប៉ះចំជាងគ្មានជំនាញ គ្រាន់តែដេកបិទភ្នែកតែមួយភ្លែតសោះ ស្រាប់តែបើកភ្នែកមកវិញ ឃើញលទ្ធផលហើយ គាំងនិយាយមិនចេញនោះទេ។
រឿងដ៏ហួសចិត្តនេះ ត្រូវបានបង្ហោះដោយផេកហ្វេសប៊ុកជាងជំនាញសាក់ឈ្មោះថា 6 Dimensional Eyebrow Tattoo Phetchabun បានបង្ហាញរូបភាពស្រ្តីអតិថជនម្នាក់ នៅស្រុក Muang ខេត្ត Phetchabun មកទទួលសេវាកម្ម «លុប» សាក់ចិញ្ចើម។
ការងារចាក់សាក់ដ៏អស់ទាស់នេះ បានធ្វើឲ្យជាងលុបចាក់ Ajarn Pangpond ឃើញហើយពិតជាស្រឡាំងកាំង និងតក់ស្លុតជាខ្លាំង ព្រោះថា ចិញ្ចើមរបស់ស្រ្តីនោះ គឺធំពេក (២០ វិមាត្រ) មើលទៅដូចចិញ្ចើមរបស់ Shin-chan អ៊ីចឹង។ ខណៈស្រ្តីជាអតិថិជនបាននិយាយថា «ចេញពីផ្ទះ ខ្ញុំត្រូវពាក់វ៉ែនតា ហើយពេលមាននរណាម្នាក់ និយាយពីចិញ្ចើម ខ្ញុំត្រូវប្រញាប់ប្រាប់គាត់ឲ្យឈប់ កុំនិយាយដល់រឿងនេះ»។
ជុំវិញរឿងនេះផងដែរ ប៉ុស្តិ៍លេខ៣ ក៏បានលាតត្រដាងឲ្យដឹងថា តាមពិតទៅ នៅថ្ងៃចាក់សាក់នោះ មីង ឃុន បានទៅផឹកស៊ីជាមួយប្តីប្រពន្ធជាងចាក់ ដែលជាមិត្តភក្តិនឹងគ្នា បន្ទាប់ពីផឹកស៊ីរួច មីង ឃុន ក៏បានស្នើឲ្យមិត្តភក្តិជួយសាក់ចិញ្ចើម ដោយឲ្យថ្លៃសេវា ៧០០ បាត (ស្មើ ២០ ដុល្លារ)។ ប៉ុន្តែ ដោយសារស្រវឹង ដេកមួយស្របក់ ភ្ញាក់ឡើង គាត់សឹងតែតក់ស្លុតនឹងមុខខ្លួនឯងតែម្តង។
ដោយសារតែដេកមិនលក់ ព្រោះតែចិញ្ចើមបែបនេះ ស្រ្តីរូបនោះ ក៏បានទៅកាន់ហាងសាក់ថ្មី ដើម្បីឲ្យជាងជំនាញខាងលើ ជួយកែកុន ដែលមើលទៅត្រូវឆ្លងកាត់ច្រើនដំណាក់កាល និងសង្ឃឹមថា គាត់នឹងទទួលបានចិញ្ចើមស្រស់ស្អាតជាងមុន៕ រក្សាសិទ្ធិដោយ៖ លឹម ហុង
