វីដេអូដ៏រន្ធត់មួយ ដែលត្រូវបានអ្នកប្រើប្រាស់បណ្ដាញសង្គមចែករំលែក បង្ហាញពស់ថ្លាន់ដ៏ធំគួរឱ្យខ្លាចមួយក្បាល វារឡើងលើភ្លៅក្មេងស្រីជំទង់ម្នាក់ ខណៈនាងកំពុងលេងទូរស័ព្ទនៅមុខផ្ទះ ដោយបង្ហាញថា នាងស៊ាំនឹង “សត្វចិញ្ចឹម” នេះខ្លាំងណាស់ បានធ្វើឲ្យអ្នកនិយមលេងអ៊ីនធឺណេត ភ្ញាក់ផ្អើលជាខ្លាំង។
ក្មេងស្រីនេះ ត្រូវបានគេដឹងថា នាងជាជនជាតិឥណ្ឌូនេស៊ី ឈ្មោះ Jalwa Ismah Kamal អាយុ ១៧ ឆ្នាំ រស់នៅក្នុង Central Java ។ កាលពីប៉ុន្មានឆ្នាំមុន នាងធ្លាប់ល្បីនៅលើពិភពអ៊ីនធឺណិត បន្ទាប់ពីប្រព័ន្ធផ្សព្វផ្សាយក្នុងស្រុក បានរាយការណ៍ថា នាងរក្សាទុកពស់ថ្លាន់យក្សចំនួន៦ក្បាល ជាសត្វចិញ្ចឹម និងបង្ហាញថាពួកវាស្និទ្ធស្នាលជាមួយនាងយ៉ាងខ្លាំង។
បច្ចុប្បន្ននេះ ពស់ថ្លាន់យក្សដែលចិញ្ចឹមដោយ Kamal វាមានទំហំធំជាងច្រើនឆ្នាំមកនេះ ប៉ុន្តែវាហាក់ដូចជាមិនបំភ័យនាងទាល់តែសោះ។ ផ្ទុយទៅវិញ នាងកាន់តែស្រលាញ់ និងចងសម្ព័ន្ធភាពជាមួយវា ក្លាយជាមិត្តក្នុងជីវិតប្រចាំថ្ងៃដ៏មិននឹកស្មាន។ ជាក់ស្តែង នាងតែងបង្ហោះវីដេអូបង្ហាញពីក្តីស្រលាញ់ចំពោះពួកវា និងចែករំលែកសកម្មភាពជាមួយពួកវាលើ Instagram។
តែបើទោះជាពស់ថ្លាន់របស់ក្មេងស្រីនេះ ហាក់បីដូចជាស្លូតបូត និងបង្កគ្រោះថ្នាក់យ៉ាងក៏ដោយ ប៉ុន្តែអ្នកដែលបានឃើញវាមានការបារម្ភ ចំពោះសុវត្ថិភាពរបស់វាយ៉ាងខ្លាំង។ ព្រោះថា មិនត្រឹមតែខ្លួននាងប៉ុណ្ណោះទេ ប៉ុន្តែក៏ចំពោះអ្នកភូមិដែលរស់នៅក្នុងសហគមន៍ផងដែរ។
មតិអ្នកប្រើប្រាស់សង្គមម្នាក់ បាននិយាយថា «ថ្ងៃណាមួយក្មេងស្រីនេះ ឬអ្នកណាម្នាក់ អាចស្លាប់ក្នុងពោះរបស់ពស់ថ្លាន់នេះ»។ ម្នាក់ទៀតនិយាយថា «ពស់ជាអ្នកប្រមាញ់តាមសភាវគតិ ហេតុនេះ មិនគួរចិញ្ចឹមនៅក្នុងផ្ទះនោះទេ»៕ រក្សាសិទ្ធិដោយ៖ លឹម ហុង
