បុរសជាច្រើននៅក្នុងប្រទេសនេះ មិនអាចរៀបការ ឬត្រូវលុបចោលអាពាហ៍ពិពាហ៍របស់ពួកគេ ដោយសារពួកគេមិនអាចបំពេញតម្រូវការកូនក្រមុំខ្ពស់ ដែលកំណត់ដោយគ្រួសារកូនក្រមុំ។ បញ្ហាប្តីប្រពន្ធក៏បណ្តាលដោយសាររឿងគួរឱ្យអស់សំណើចជាច្រើនដូចជារឿងខាងក្រោមនេះជាដើម។
លោក Liu រស់នៅក្នុងខេត្ត Liaoning ប្រទេសចិន បន្ទាប់ពីបញ្ចប់ការសិក្សានៅវិទ្យាល័យ លោកបានទៅទីក្រុងជាមួយមិត្តភក្តិដើម្បីធ្វើការ។ ដោយសារតែគាត់មិនមានសញ្ញាបត្រកម្រិតខ្ពស់ លោក Liu អាចដាក់ពាក្យធ្វើជាកម្មករបានតែប៉ុណ្ណោះ ដោយអាចរកចំណូលបានក្នុងមួយខែប្រហែល 6,000 យន់ (ជាង 800$)។
ស្ថានភាពគ្រួសាររបស់លោក Liu មិនល្អទេ ឪពុកម្តាយរបស់គាត់ជាកសិករ ហើយគាត់ត្រូវធ្វើការសន្សំលុយខ្លះៗសម្រាប់ខ្លួនឯង និងផ្គត់ផ្គង់ប្អូនប្រុស២នាក់។ ដោយសារស្ថានភាពបែបនេះ លោក Liu មិនអាចលៃលកប្រាក់សម្រាប់អាពាហ៍ពិពាហ៍បានឡើយ។ ពេលឪពុកម្ដាយរបស់លោក Liu ទៅពឹងអ្នកផ្គូរផ្គង ដើម្បីរកប្រពន្ធឲ្យ គាត់បានប្រាប់ថា៖ «ផ្ទះខ្ញុំអត់មានឡានទេ ហើយខ្ញុំមានបងប្អូន២នាក់ តើមាននារីណាចង់រៀបការជាមួយខ្ញុំទេ?»។
ទោះជាយ៉ាងណា នៅទីបំផុត តាមការទទូចពីម្តាយរបស់លោក Liu អ្នកផ្គូរផ្គងបានជួយគាត់ស្វែងរកនារីសមរម្យម្នាក់នៅក្នុងភូមិ ដែលមានឈ្មោះថា ស៊ុន។ បន្ទាប់ពីជួបគ្នាលើកដំបូង អ្នកទាំងពីរមានអារម្មណ៍ថា មានភាពចុះសម្រុងនឹងគ្នា ទើបពួកគេសម្រេចចិត្តស្រលាញ់គ្នាយ៉ាងលឿន។
កន្លះឆ្នាំក្រោយមក ពេលគ្រួសារទាំងពីរពិភាក្សាគ្នាអំពីរឿងអាពាហ៍ពិពាហ៍ គ្រួសាររបស់នាង ស៊ុន បានសុំតម្លៃកូនក្រមុំចំនួន ៣៨ ម៉ឺនយន់ (ជាង ៥ ម៉ឺនដុល្លារ)។ សម្រាប់គ្រួសារលោក Liu នេះលុយច្រើនពេកហើយ មិនងាយរកបានទេ។ លោក Liu និងក្រុមគ្រួសាររបស់គាត់ បានទៅដើរប្រមែប្រមូលលុយគ្រប់ទីកន្លែង ប៉ុន្តែនៅតែខ្វះខាតចំនួន 150,000 យន់ (២ម៉ឺនដុល្លារ) ទៀត។ ក្នុងជីវភាពដ៏លំបាក លោក Liu បានសម្រេចចិត្តយ៉ាងម៉ឺងម៉ាត់ ត្រូវយកប្រាក់កម្ចីដែលមិនមានសុវត្ថិភាពសម្រាប់បង្រ្គប់។
បន្ទាប់ពីលោក Liu ប្រមូលបានលុយចំនួន 380,000 យន់ ហើយពិធីមង្គលការរបស់គាត់ និងនាង ស៊ុន ត្រូវបានប្រារព្ធឡើងដោយជោគជ័យ។ ឪពុកម្តាយលោក Liu សប្បាយចិត្តជាខ្លាំងពេលឃើញកូនប្រុសបង្កើតគ្រួសារដ៏នឹកស្មានមិនដល់។ តែទោះជាយ៉ាងណា ក្រោយរៀបមង្គលការមិនបានប៉ុន្មានថ្ងៃផង ក៏មានបញ្ហាកើតឡើង។
លោក Liu បានប្រាប់ប្រពន្ធរបស់គាត់ថា គាត់ត្រូវការលុយខ្លះដើម្បីសងបំណុល។ ទោះជាយ៉ាងណា ពេលនាង ស៊ុន បានដឹងរឿងជំពាក់លុយ នាងក៏បដិសេធភ្លាមៗ ដោយនិយាយថា តម្លៃកូនក្រមុំជារបស់នាង។ លោក Liu បានបញ្ជាក់ថា ឥឡូវពួកគេជាប្តីប្រពន្ធត្រូវជួយគ្នាជំពាក់បំណុលគេ។ នាង ស៊ុន បានសួរលោក Liu ថា គាត់ជំពាក់លុយប៉ុន្មាន គាត់បានកុហកថាគាត់ជំពាក់តែពីរបីម៉ឺនយ័នប៉ុណ្ណោះ។
ទោះយ៉ាងណា នៅទីបំផុត លោក Liu បានប្រាប់ការពិតដល់ប្រពន្ធថា «ចំនួន 380,000 យន់ ដែលខ្ញុំឲ្យអ្នក គឺជាប្រាក់កម្ចីដើម្បីរៀបការ ឥឡូវនេះយើងជាគ្រួសារតែមួយ គឺចំនួនបំណុលរបស់ខ្ញុំ។ ហេតុនេះ រឿងនេះក៏ជាចំណែករបស់អ្នកផងដែរ»។
នៅពេល អ្នកស្រី ស៊ុន បានដឹងថា ប្តីរបស់គាត់បានខ្ចីលុយគេរហូតចំនួន ១៥ម៉ឺនយន់ នាង ស៊ុន មិនអាចទទួលយកបានទេ។ បន្ទាប់មក អ្នកទាំងពីរបានឈ្លោះប្រកែកគ្នាយ៉ាងខ្លាំង រហូតលោក Liu សម្រេចចិត្តលែងលះគ្នាក្រោយរៀបការបានត្រឹមតែ៧ថ្ងៃប៉ុណ្ណោះ ហើយបានសុំឲ្យនាង ស៊ុន ប្រគល់លុយមង្គលការទាំងអស់មកវិញ។ ទោះជាយ៉ាងណា នាង ស៊ុន មិនយល់ស្របនឹងរឿងនេះឡើយ ដោយបាននិយាយថា លោក Liu បានខ្ចីលុយដើម្បីរៀបការ ដូច្នេះគាត់ត្រូវតែទទួលខុសត្រូវ ក្នុងការសងបំណុលនេះដោយខ្លួនឯង គឺមិនមានអ្វីពាក់ព័ន្ធជាមួយនាងនោះទេ។ ហើយប្រសិនបើលោក Liu មិនអាចលៃលកលុយកូនក្រមុំបានទេ គាត់គួរតែចរចាជាមុន កុំខ្ចីលុយគេច្រើនបែបនេះ ហើយឥឡូវ បែរបង្ខំនាងឱ្យសងបំណុលទៅវិញ។
នាង ស៊ុន បាននិយាយថា នាងពិតជាខូចចិត្តយ៉ាងខ្លាំង ព្រោះគិតថាបានរៀបការជាមួយប្តីដែលគាប់ចិត្ត ប៉ុន្តែមិននឹកស្មានថា នឹងត្រូវជំពាក់បំណុលគេសោះ។ ពេលនេះលោក Liu និងនាង ស៊ុន លែងលះគ្នាហើយ ចំណែកបញ្ហារឿងលុយកាក់ ត្រូវសមត្ថកិច្ចដោះស្រាយតាមច្បាប់៕ រក្សាសិទ្ធិដោយ៖ លឹម ហុង
