កណ្តាល៖ ស្នងការនគរបាលខេត្តកណ្តាល បានដាក់បទបញ្ជាផ្ទាល់មាត់ថាបដិវត្តពណ៌វាបង្កមហន្តរាយវិនាសកម្មដូច្នេះហើយក្នុងនាមយើងជាកងកម្លាំងនគរបាលជាតិត្រូវការពារដាច់ខាតមិនអោយកើតមាននៅក្នុងប្រទេសកម្ពុជាយើង។ ការថ្លែងនិងអះអាងរបស់លោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដកណ្ដាល ធ្វើឡើងកាលពីព្រឹកថ្ងៃទី១៤ ខែវិច្ឆិកា ឆ្នាំ២០១៧ នៅសាលប្រជុំនៃអធិការដ្ឋាននគរបាលស្រុកមុខកំពូលនៅគ្រាដែលលោកស្នងការចុះផ្សព្វផ្សាយវិធានការរក្សាសន្ដិសុខសណ្ដាប់ធ្នាប់សាធារណៈនិងសុវត្ថិភាពសង្គម។ដោយមានកងកម្លាំងនគរបាលស្រុកពញាឮនិងស្រុកមុខកំពូលចូលរួមប្រមាណ២៣៥រូប។
នៅក្នុងកិច្ចប្រជុំផ្សព្វផ្សាយវិធានការរក្សាសន្ដិសុខ សណ្ដាប់ធ្នាប់ សាធារណៈនិងសុវត្ថិភាពសង្គម លោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដកណ្ដាល បានអះអាងនៅចំពោះមុខមន្ដ្រីនគរបាលទាំងអស់ថា ក្នុងនាមកងកម្លាំងនគរបាលជាតិប្រឆាំងដាច់ខាតចំពោះឧបាយកលផ្ដួលរំលំរដ្ឋាភិបាលស្របច្បាប់នៅកម្ពុជា និងមិនឲ្យកើតមានបដិវត្ដពណ៌នៅក្នុងប្រទេសយើងដែលកំពុងមានសន្ដិភាពនិងកំពង់មានការអភិវឌ្ឍន៍គ្រប់វិស័យក្រោមការដឹកនាំប្រទេសដ៏ឈ្លាសវៃរបស់សម្តេចតេជោហ៊ុន សែន ប្រមុខរាជរដ្ឋាភិបាលនៃប្រទេសកម្ពុជាយើង។នៅក្នុងឱកាសនោះដែរ ស្នងការខេត្ដកណ្ដាលបានជម្រុញឲ្យកម្លាំងនគរបាលទាំងអស់ ត្រូវបម្រើប្រជាពលរដ្ឋដោយឥតលក្ខខណ្ឌនិងធានាឲ្យបាននូវស្ថេរភាព សុវត្ថិភាពនៅក្នុងមូលដ្ឋាន ក្នុងនាមជាអ្នកបម្រើប្រជាពលរដ្ឋ ។ បន្ទាប់ពីស្ដាប់ការផ្សព្វផ្សាយវិធានការខាងលើរួចមក កងកម្លាំងនគរបាលទាំងអស់បានប្ដេជ្ញារក្សាសន្ដិសុខសណ្ដាប់ធ្នាប់សាធារណៈ និងការពាររដ្ឋាភិបាលស្របច្បាប់មិនឲ្យកើតមានអសន្តិសុខនិងបដិវត្តពណ៌ដែកពួកអមិត្តបង្កើតតាមគ្រប់រូបភាព។
សូមបញ្ជាក់ថា ការចុះផ្សព្វផ្សាយវិធានការរក្សាសន្ដិសុខសណ្ដាប់ធ្នាប់សាធារណៈនិងសុវត្ថិភាពសង្គមនេះ គឺធ្វើបានចំនួន៤ស្រុករួចហើយនិងបន្ដចុះធ្វើគ្រប់បណ្ដាស្រុក/ក្រុងទាំង១១នៅទូទាំងខេត្តកណ្តាល ៕ ដោយ៖បញ្ញាស័ក្តិ
