កសិករថៃម្នាក់ ពិតជាខូចចិត្តយ៉ាងខ្លាំង ព្រោះថា បានដាំដើមទុរេនរយៈពេល ៤ ឆ្នាំ តែលទ្ធផល គឺមិនមែនសាច់សូម្បីតែមួយផ្លែ។ ទោះជាយ៉ាងណា បន្ទាប់ពីបានឃើញបែបនេះ អ្នកលេងអ៊ីនធឺណិតបានលួងចិត្តប្រាប់ដំណឹងល្អថា ឆ្នាំក្រោយត្រៀមខ្លួនជាអ្នកមាន ដោយលាតត្រដាងចំណុច ៣ យ៉ាង ដែលធ្វើឱ្យដំណាំទុរេនដាំបានផលច្រើន។
នេះបើតាមគណនី TiKTok មួយ ដែលជាម្ចាស់ចំការទុរេន នៅក្នុងខេត្ត Trat បានផុសឃ្លីបបញ្ជាក់ទាំងហួសចិត្តថា «ខ្ញុំដាំដើមទុរេនប្រភេទប៊ូតុង ដែលខំរង់ចាំ ៤ ឆ្នាំ ហើយ ប៉ុន្តែ ពេលប្រមូលផល បានរកឃើញថា ផ្លែទុរេនទាំងនោះ គ្មានសាច់ទាល់តែសោះ សូម្បីតែក្លិនក៏គ្មានដែរ។ ខ្ញុំពិតជាឆ្ងល់ខ្លាំងណាស់ ហេតុអ្វីបានជាចេញមកបែបនេះ?»។
ជាក់ស្តែង កសិកររូបនោះ ក៏បានបកផ្លែទុរេនឲ្យទៅមើល ហើយឃើញថា ខាងក្នុងពិតជាគ្មានសាច់ធុរេនទេ។ តែទន្ទឹមនឹងនោះ ក៏មានអ្នកដែលមានចំណេះដឹង បានចេញមកពន្យល់អំពីបញ្ហានេះផងដែរថាតើវាបណ្ដាលមកពីអ្វី ដោយបានចែករំលែកឲ្យដឹងថា «ខ្ញុំផ្ទាល់ក៏បានដាំទុរេនពូជនេះដែរ។ វាជារឿងធម្មតាទេ ដែលផ្លែចេញមកដំបូងគ្មានសាច់បែបនេះ។ ប៉ុន្តែបើលទ្ធផលចេញឆ្នាំក្រោយច្បាស់ជាឡូយ។ បើកគណនី ហើយរង់ចាំទទួលប្រាក់ទៅ!។
ទាក់ទងករណីនេះ ក៏ត្រូវបានភ្នាក់ងារផ្សព្វផ្សាយកសិកម្ម បានឲ្យដឹងថា ទុរេននឹងផ្តល់ផលក្រោយការដាំរយៈពេល ៥ ឆ្នាំ អាស្រ័យលើភាពចាស់ទុំរបស់ដើម។ ប៉ុន្តែបើចង់បានទុរេនមានគុណភាព ត្រូវមើល៣ចំណុចនេះ៖ ១. បង្កើនប្រសិទ្ធភាពលក្ខខណ្ឌនៃការបំប្លែង ២. រៀបចំប្រព័ន្ធទឹក ៣. ការដាក់ធុងដាំ៕ រក្សាសិទ្ធិដោយ៖ លឹម ហុង
