កាលពីពេលថ្មីៗនេះ មានករណីគ្រោះថ្នាក់ចរាចរណ៍ដ៏ហួសចិត្តមួយ រវាងកង់បីនិងកង់ នោះគឺដោយសារកង់បី១គ្រឿង បើកបរក្នុងល្បឿន មិនប្រយ័ត្នផ្លូវរអិល ក៏រអិលបុកកង់បី១គ្រឿងទៀត ក្នុងទិសដៅស្របគ្នា ស្ថិតនៅតាមបណ្តោយផ្លូវជាតិលេខ២ (ត្រង់ចំណុចមុខអតីតរោងចក្រតេរ៉ាតិច) ក្នុងសង្កាត់ចាក់អង្រែក្រោម ខណ្ឌមានជ័យ កាលពីវេលាម៉ោង ៣ និង៤៥ នាទី ទៀបភ្លឺឈានចូលថ្ងៃទី៧ ខែមេសា ឆ្នាំ២០២៣។
យ៉ាងណាមិញ នៅក្នុងហេតុការណ៍នោះ គេក៏បានឃើញយុវជន៣នាក់ ជិះម៉ូតូ១គ្រឿងឌុបគ្នា ស្របទន្ទឹមនឹងកង់បីរងការបុកផងដែរ។ ប៉ុន្តែ អ្វីដែលធ្វើឲ្យគ្រប់គ្នាមានការងឿងឆ្ងល់ជាខ្លាំងនោះ គឺក្រោយហេតុការណ៍បានកើតឡើង នៅក្នុងវីដេអូ គេពុំឃើញយុវជនទាំងបីនោះទេ ដោយមិនដឹងជាទៅណាបាត់អស់ ដែលពិតជាចម្លែកមែនទែន។
ទោះជាយ៉ាងណា ក្រោយវីដេអូនៃករណីនេះល្បីខ្លាំង ខណៈមនុស្សជាច្រើនបានលើកឡើងថា យុវជនទាំងបីនាក់នោះ សង្ស័យប្រហែលឆ្លងភពហោះទៅណាបាត់អស់ហើយ ស្រាប់តែសម៉ីខ្លួនយុវជនម្នាក់ក្នុងចំណោមនោះ បានចេញមុខបកស្រាយ ធ្វើឲ្យមហាជនភ្ញាក់ផ្អើល និងកាន់តែឆ្ងល់ថែម។
នេះបើតាមគណនីហ្វេសប៊ុកឈ្មោះ Leng SokNov បានចេញវីដេអូប្រាប់ពីហេតុការណ៍នេះឲ្យដឹងថា នៅថ្ងៃកើតហេតុនោះ ខ្លួននិងមិត្តភក្តី២នាក់ ចេញមកពីញ៉ាំអីនៅផ្លូវ២៧១ លុះមកដល់ចំណុចកើតហេតុ (ផ្លូវចាក់អង្រែ) ហ្នឹង ក៏ស្រាប់តែកង់បី១គ្រឿងបើកមកពីខាងក្រោយយ៉ាងលឿន ក៏បានប៉ះកង់បី១គ្រឿងទៀត ដែលបើកទន្ទឹមពួកខ្លួនលាន់សូរផាំងតែម្តង។ យុវជនរូបនេះបន្តថា ពេលហ្នឹង កង់បីនោះ ក៏បានប៉ះទង្គិចខ្លួនដែលអង្គុយខាងក្រោយគេដែរ ប៉ុន្តែ ស្រាល ហើយភ្លាមៗនោះ ពួកខ្លួនក៏បានជិះទៅមុខបន្តិច និងឈប់ម៉ូតូនៅក្បែរម៉ូតូសង់កូរ៉េបុរសម្នាក់ ដែលកំពុងឈប់នៅចិញ្ចើមផ្លូវ រយៈពេលមួយភ្លែត ក៏បន្តដំណើរទៅមុខទៀត។
ទោះជាយ៉ាងណា យុវជនរូបនេះ ក៏ឆ្ងល់នឹងវីដេអូដែលកំពុងល្បីខ្លាំងនេះផងដែរ ហេតុអ្វីបានជាថតមិនឃើញពួកខ្លួនសោះអីចឹង ឬមួយក៏អប៉ីជំនឿផ្លូវងងឹតអ្វី?៕ រក្សាសិទ្ធិដោយ៖ លឹម ហុង
