ប៉ុន្មានថ្ងៃចុងក្រោយនេះ បណ្តាញទំនាក់ទំនងសង្គមរបស់ប្រទេសម៉ាឡេស៊ី បានផ្ទុះឡើងក្តៅគគុក បន្ទាប់ស្រ្តីអ្នកជំនួញរូបស្រស់ស្អាតម្នាក់ បានចែករំលែកពីទង្វើផិតក្បត់ របស់ប្តីរបស់នាង និងបុគ្គលិកក្រោមបង្គាប់ លួចមានទំនាក់ទំនងស្នេហានឹងគ្នា។ ជាក់ស្តែង នាងបានបង្ហាញភស្តុតាងទាំងអស់ ដែលពួកគេទាក់ទងគ្នា ចាប់តាំងពីរូបថតរហូតដល់សារដ៏ស៊ីជម្រៅរវាងថៅកែប្រុស និង «បុគ្គលិក»។
យោងតាមព័ត៌មានដែលចុះផ្សាយក្នុងកាសែតរបស់ប្រទេសម៉ាឡេស៊ី ស្ត្រីជាប្រពន្ធបាននិយាយថា នាងគឺជាអ្នកជំនួញដ៏ល្បីម្នាក់ និងអ្នកនិយមលេង TikTok ផងដែរ។ នាងបានបង្កើតក្រុមហ៊ុនមួយ ហើយជារឿយៗជាមួយប្តីរបស់នាងផ្ទាល់ លក់ផលិតផលរបស់ក្រុមហ៊ុន ដែលមានជំនួយការពាក់ព័ន្ធនឹងបុគ្គលិកស្រីម្នាក់របស់ក្រុមហ៊ុន ដែលហៅថា A ជាបណ្តោះអាសន្ន។
ស្ត្រីជាប្រពន្ធបានបន្តថា ដោយឃើញនាង A ខំប្រឹងធ្វើការប៉ុន្មានខែមកនេះ ដោយតែងធ្វើការថែមម៉ោងជាញឹកញាប់ ធ្វើឲ្យពេញចិត្តខ្លាំង នាងក៏បានបរិច្ចាគរថយន្ត Mercedes មួយគ្រឿងដល់រូបនាងទៀតផង។
ប៉ុន្តែក្រោយមក ស្ត្រីជាប្រពន្ធបានដឹងថា នាង A បានលួចលាក់ជាមួយប្តីរបស់នាង អស់រយៈពេលជាងមួយឆ្នាំមកហើយ បន្ទាប់ពីនាងសម្រាលបានកូនទីបីកាលពីឆ្នាំមុន។ នៅពេលដែលនាងរវល់មើលថែកូនតូច ប្តីរបស់នាងតែងតែចំណាយពេលមួយយប់ជាមួយ “កូនចៅ” នេះនៅឯសណ្ឋាគារ។ ការពិតទាំងអស់ ត្រូវបានលាតត្រដាងតាមរយៈសារដែលបុរសជាប្តីឆាតទៅកាន់នាង A។ រាល់ព្រឹក ពួកគេផ្ញើពាក្យសួរសុខទុក្ខគ្នាទៅវិញទៅមក បន្ទាប់មកណាត់ជួប និងធ្វើអ្វីៗនៅក្នុងការិយាល័យ។
កាន់តែឈឺចាប់ខ្លាំងទៀតនោះ គឺសូម្បីតែប្តីទៅទិញកាដូខួបកំណើតឲ្យប្រពន្ធ ក៏ទៅជាមួយនាង A ដែរ និងសូម្បីតែអ្នកទាំងពីរក៏មិនខ្លាចក្នុងការឆែកឆេររបស់ប្រពន្ធ និងថតរូបស្និទ្ធស្នាលជាមួយគ្នាទៀតផង។ រឿងនេះបានធ្វើឱ្យប្រពន្ធម្នាក់នេះឈឺចាប់ជាងនារីណាៗដែលមានប្តីមិនស្អាត ព្រោះនាងត្រូវបានមនុស្សក្បត់ដែលខ្លួនស្រលាញ់ និងទុកចិត្តបំផុត។ មិនត្រឹមប៉ុណ្ណឹងទេ គូស្នេហ៍មួយគូនេះ ក៏បានដើរលេងជាមួយគ្នាយ៉ាងមានសេចក្តីសុខនៅកោះបាលី ប្រទេសឥណ្ឌូនេស៊ី ខណៈដែលស្ត្រីជាប្រពន្ធរវល់មើលកូនតូចៗចំនួន៣នាក់ នៅឯផ្ទះ។
ដោយសារតែរឿងដ៏អាក្រក់ខាងលើនេះ ប្រពន្ធបានបញ្ចេញអ្វីៗគ្រប់យ៉ាងជាសាធារណៈ។ ក្នុងនោះ នាងមានវីដេអូកាមេរ៉ាសុវត្ថិភាព ដែលបង្ហាញពីប្តីរបស់នាងធ្វើបាបនាង ហើយបើតាមនាងថា នេះជាទង្វើចុងក្រោយ មុនពេលនាងបញ្ចប់រឿងទាំងអស់ជាមួយប្តីដែលមិនសក្តិសម។
ស្ត្រីជាប្រពន្ធក៏បានឲ្យដឹងថា បន្ទាប់ពីត្រូវបានគេលាតត្រដាងហើយ ប្តីរបស់នាងបានអង្វរនាងថា គាត់នឹកនាង និងចង់ជួបនាងវិញ ប៉ុន្តែនាងអះអាងថា វានឹងមិនអាចទៅរួចបានឡើយ។ ឥឡូវនេះ នាងកំពុងស្នើសុំមេធាវីដើម្បីបញ្ចប់នីតិវិធីចុងក្រោយនៃការលែងលះ ហើយនឹងទទួលបានការឃុំគ្រងកូនៗទាំងបីនាក់។ នាងក៏បានបិទរាល់ការទាក់ទងជាមួយប្តីដ៏អាក្រក់នោះផងដែរ។
ទន្ទឹមនឹងនោះ បុរសជាប្តីក៏បានផុសនៅលើបណ្ដាញសង្គមចែករំលែកថា ចាប់តាំងពីរុះរោយមក មិនត្រឹមតែខូចកេរ្តិ៍ឈ្មោះប៉ុណ្ណោះទេ តែមុខជំនួញក៏កាន់តែយ៉ាប់យ៉ឺន ព្រោះតែមានអតិថិជនជាច្រើន មិនចង់គាំទ្រអ្នកផិតក្បត់៕ រក្សាសិទ្ធិដោយ៖ លឹម ហុង
