មហាជននៅលើបណ្តាញសង្គម ពិតជាសម្តែងការហួសចិត្ត និងនាំគ្នាស្អប់យ៉ាងខ្លាំង ក្រោយពីបានឃើញវីដេអូម្ចាស់ការ៉ាស់សាំងចំនួន ២ កន្លែង បានបង្ហោះឲ្យឃើញឡាន Rang Rover តែមួយ ចាក់សាំងរួច ដាក់មេប្រូចមិនទូទាត់លុយ ដោយម្នាក់ៗបានរិះគន់ដាក់ឲ្យធ្ងន់ៗថា «ជិះឡានថ្លៃ តែចរិកថោកណាស់»។
តែអ្វីដែលមិននឹកស្មានដល់នោះ គឺថាពេលនេះ ត្រូវបានដឹងហើយ តាមពិត អ្នកបើកឡានទំនើប Range Rover នោះ គឺជាចោរលួចឡានប៉ុណ្ណោះ ដែលទើបតែត្រូវបានប៉ូលិសធ្វើការឃាត់ខ្លួនបានកាលពីប៉ុន្មានម៉ោងមុន បន្ទាប់បើកគេចខ្លួនទៅដល់ខេត្តបន្ទាយមានជ័យ។
នេះបើតាមមានព័ត៌មានលើបណ្តាញសង្គម បានឲ្យដឹងថា ស្របពេលដែលម្ចាស់ការ៉ាស់សាំងទាំងពីរ បានបង្ហោះសារឲ្យឡានទំនើបខាងលើចូលខ្លួនមកទូទាត់លុយ ខណៈម្ចាស់ឡានក៏បានប្តឹងសមត្ថកិច្ច ហើយទីបំផុត កម្លាំងនគរបាលចរាចរណ៍ជើងគោកខេត្តប្រចាំគោលដៅខេត្តបន្ទាយមានជ័យ ធ្វើការស្ទាក់ឃាត់បានតែម្តង ក្រោយរូបគេបានលួចរថយន្តស៊េរីទំនើបនេះ ពីការ៉ាស់ជួសជុលបាញ់ថ្នាំរបស់មេជាងខ្លួននៅភ្នំពេញ ហើយបានបើកតាមផ្លូវភ្នំពេញ កំពង់ធំ សៀមរាប ដល់ខេត្តឧត្តរមានជ័យ មកចាក់សាំងនៅឃុំរហាល ស្រុកព្រៈនេត្រព្រៈ ចាក់សាំងហើយអត់លុយអោយគេ បើករថយន្តរត់ទិសដៅមកក្រុងសិរីសោភ័ណ តែម្តង។
ជនសង្ស័យមានឈ្មោះ ទូ គីម អាយុ ៣៣ ឆ្នាំ រស់នៅភូមិ១៣ ខណ្ឌទួលគោក រាជធានីភ្នំពេញ បានលួចរថយន្តមេជាងរបស់ខ្លួនម៉ាក Range Rover ពាក់ផ្លាកលេខភ្នំពេញ 2BT-5818 ចេញពីការ៉ាសជួសជុល និងបាញ់ថ្នាំរថយន្តមួយកន្លែង នៅរាជធានីភ្នំពេញ កាលពីយប់ថ្ងៃទី២០ ខែមេសា ឆ្នាំ២០២៣៕ រក្សាសិទ្ធិដោយ៖ លឹម ហុង
