រឿងរ៉ាវរវាងអ្នកលក់នៅកែប និងគ្រួសារមួយទៅលេងថ្ងៃចូលឆ្នាំ កាលពីពេលថ្មីៗនេះ ដែលបានចោទប្រកាន់ថា អ្នកលក់រកស៊ីកោរមិនដាក់ទឹក (ពេលអូសដៃចូលប្រាប់តម្លៃផ្សេង ដល់ពេលគិតលុយ បែរគិតតម្លៃផ្សេង១ទ្វេជាពីរ) គឺនៅតែជាប្រធានបទក្តៅ ដែលមហាជននៅលើបណ្តាញសង្គម កំពុងតាមដាន ខណៈអ្នកលក់ចេញមុខបកស្រាយ និងសូម្បីចង់ស្វែងរកមុខគ្រួសារនោះ ដើម្បីចូលមកតតាំងគ្នាតាមផ្លូវច្បាប់ ដោយអះអាងថា ខ្លួនមិនបានលក់កោរទេ ព្រោះគ្រួសារនោះពុំបានហូបអីអស់មួយរៀល។
ទាក់ទងរឿងនេះ នៅថ្ងៃទី២០ ខែមេសា ឆ្នាំ២០២៣ គណនីហ្វេសប៊ុកឈ្មោះ SaMuth Tuoch ដែលបានអះអាងថា អ្នកដំណាក់ចង្អើរ ខេត្តកែប ដែរ បានបង្ហោះវីដេអូគ្រួសាររបស់គាត់បញ្ចេញកំហឹងទៅកាន់អ្នកលក់ និងបញ្ជាក់ប្រាប់យ៉ាងដូច្នេះថា៖ «បងប្អូនណាចង់ចូលហូបអីនៅកែប សូមបញ្ជាក់តម្លៃឲ្យច្បាស់បើមិនដូច្នោះទេ ទ្វេមួយជាពីរមិនដូចពាក្យយើងនិយាយទេ។ ដូចរឿងមួយនេះពេលយើងទៅដល់អូសដៃយើងទៅអង្គុយគាត់និយាយផ្សេង ពេលដែលគិតលុយគាត់គិតផ្សេង ខុសពាក្យដែលយើងនិយាយមុន សូមបងប្អូនប្រុងប្រយ័ត្នតំបន់ទេសចរណ៍កែប»។
ក្រោយគណនីខាងលើ បានបង្ហោះរឿងនេះឡើង ឃើញថាមានអ្នកលេងបណ្តាញសង្គមជាច្រើន ដែលធ្លាប់ជួបករណីដ៏ហួសចិត្តបែបនេះ បានទទួលស្គាល់ថា អ្នកលក់នៅកែបមួយចំនួន គឺពិតជារកស៊ីកោរភ្ញៀវអ៊ីចឹងមែន។ ជាក់ស្តែង បងប្អូនដែលបានស្គាល់រសជាតិអ្នកលក់នៅទីនោះធ្វើស៊ី បានប្រាប់ឲ្យដឹងថា៖ «កាលខ្ញុំទៅលេងក៏ចឹងដែរ តម្លៃតូបព្រមព្រៀងគ្នាក្នុងតម្លៃហ្នឹង ពេលគិតលុយនិយាយតម្លៃផ្សេង ហើយធ្វើជានិយាយថាមេអត់ចុះទៀតទេបង។ ចុះកាលខាងដើមហេតុអី ព្រមព្រៀងជាមួយភ្ញៀវក្នុងតម្លៃប៉ុន្នឹង ហើយពេលគិតលុយម៉េចគិតផ្សេងចឹង?, ថ្ងៃមុនខ្ញុំអាឡៃរវល់និយាយថ្លៃតូបជាមួយម្ចាស់តូបអត់ទាន់ត្រួវគ្នា ប្តីខ្ញុំគាត់ក៍ទៅអង្អុយអង្រឹងគេ ម្ចាស់តូបទាថ្លៃអង្រឹង 60000រៀល ហួសចិត្ត ម្ចាស់តូបទាថ្លៃតួបមួយ 30 ដុល្លារ ខ្ញុំអត់អង្គុយចឹងគេយកថ្លៃអង្រឹង ខ្ញុំខ្ចិលនិយាយអោយអស់ 60000រៀល អីឡូវខានទៅលេងបីឆ្នាំហើយ លឺឈ្មោះខេត្តកែបស្អប់តាហ្មង»។
ទោះជាយ៉ាងណា ក្រោយព័ត៌មាននៃរឿងនេះបានផ្ទុះឡើង ស្រាប់តែស្រ្តីម្ចាស់តូប បានចេញមុខផ្តល់បទសម្ភាសន៍មួយ ដើម្បីបង្ហាញពីភាពស្អាតស្អំរបស់ខ្លួនថា គាត់ពុំបានកោរ ដូចអ្វីដែលគ្រួសារនោះបានបង្ខូចបង្កាច់ទេ ព្រោះពួកគេពុំបានហូបអីអស់មួយរៀលផងហ្នឹង ដោយគាត់បាននិយាយហាក់ស្លូតបូតក្នុងនាមជាជនរងគ្រោះបែបនេះថា «កុម្ម៉ង់ម្ហូបខ្ញុំ២មុខ អត់យកវិញហើយ អត់ឲ្យលុយខ្ញុំហើយ ជេរខ្ញុំម៉ាឆ្អែតហើយ ទៅបង្ហោះថាខ្ញុំកោរទៀត…»។ ស្រ្តីអ្នកលក់ ក៏បាននិយាយថា គ្រួសារនោះមិនមែនជាពលរដ្ឋដំណាក់ចង្អើរ មិនដឹងមកពីខាងខេត្តណានោះទេ ខណៈគេស្តាប់សំឡេងដឹងថា ជាសំឡេងអ្នកខេត្តកំពតយ៉ាងច្បាស់។
ជាការពិតណាស់ ប្រសិនបើគ្មានភ្លើង ក៏គ្មានផ្សែងនោះដែរ មិនមែនអ្នកទៅចូលហូបណា ចង់ទៅបង្ករឿង និងបង្ខូចបង្កាច់នោះទេ (និយាយនេះមិនមែនកាន់ជើងអ្នកទៅចូលហូបទេ)។ ជាក់ស្តែង បើតាមគណនីហ្វេសប៊ុកឈ្មោះ Tuoch Sreyleak បានប្រាប់ឲ្យដឹងថា៖ «បងអ្នកលក់ម្នាក់មកប្រាប់ថា សាច់តម្លៃមាន6ម៉ឺននិង8ម៉ឺន គេក៏អូខេ តែអ្នកលក់ម្នាក់មកទៀតថា 8ម៉ឺននិង10ម៉ឺន ចឹងមិនអោយគេថាយើងនិយាយខុស? ហើយឆ្លៀតនិយាយថាបើមិនមានលុយខំមកស៊ីដែរ? ប្រើភាសាហ្នឹងដាក់ភ្ញៀវ? សមហេតុសមផលអត់បង? ហើយថាគេតថ្លៃហើយមិនទិញ សុទ្ធតែថាម្ហូបហ្នឹងសល់ចោលអោយគ្នាអោយកូនចៅស៊ីទៅ និងម៉េចវិញ?»៕ រក្សាសិទ្ធិដោយ៖ លឹម ហុង
