ពិតណាស់ មនុស្សជាច្រើនតែងតែជ្រើសរើសបង្កើតមិត្តភាព តាមរយៈកម្មវិធីអនឡាញ ដើម្បីពង្រីកទំនាក់ទំនងរបស់ពួកគេ សូម្បីតែស្វែងរកដៃគូស្នេហាតាមអ៊ីនធឺណិត។ ប៉ុន្តែអ៊ិនធឺណិតមិនមែនជាពិភពពិតទេ ដូច្នេះតែងតែមានឧបទ្ទវហេតុ និងការបោកប្រាស់ជាច្រើន រូបភាព និងព័ត៌មានដែលយើងឃើញនៅលើអ៊ីនធឺណិត គឺមិនច្បាស់ដូចនៅក្នុងជីវិតពិតនោះទេ។
ជាក់ស្តែង ដូចរឿងមួយនេះជាឧទាហរណ៍ ស្ត្រីឈ្មោះ Zhengmei អាយុ ៣២ឆ្នាំ រស់នៅក្នុងទីក្រុង Nanjing ខេត្ត Jiangsu ប្រទេសចិន បានប្រើប្រាស់កម្មវិធីណាត់ជួបដើម្បីស្វែងរកស្នេហា និងអាពាហ៍ពិពាហ៍។ នៅក្នុងការពិពណ៌នារបស់នាង, Zhengmei ក៏បានសរសេរថា៖ “ខ្ញុំសង្ឃឹមថានឹងរៀបការ នៅក្នុងឆ្នាំនេះ”។ នេះបង្ហាញថា នាងហាក់មានភាពជឿជាក់ខ្លាំងក្នុងរឿងស្នេហា ហើយចង់រៀបការ ប្រសិនបើរកបានមនុស្សប្រុសដែលខ្លួនពេញចិត្ត។
ក្នុងគណនីបណ្ដាញសង្គមរបស់នាង, Zhengmei តែងតែបង្ហោះរូបថត Selfie ដែលបង្ហាញថា នារីម្នាក់នេះស្អាត និងទាក់ទាញ មានស្បែកសស្អាត មុខស្អាតគួរឲ្យស្រលាញ់។ កន្លែងដែលមានលក្ខណៈពិសេសបន្ថែមនោះ គឺរូបរាងក៏ស្អាត និងស្ដើងផងដែរ។ បើមើលតែរូបថតតាមអនឡាញ គ្រប់គ្នាស្មានថា នាងមានអាយុជាង ២០ ឆ្នាំប៉ុណ្ណោះ ដោយជឿថានាងមានអាយុ ៣២ ឆ្នាំ នោះទេ។
ពេលនោះ បុរសម្នាក់ក៏បានជួប Zhengmei នៅលើកម្មវិធីណាត់ជួប។ គូស្នេហ៍មួយគូនេះបានជជែកសាសងគ្នាលេង រហូតមានអារម្មណ៍ថាចុះសម្រុងគ្នាខ្លាំង ជាពិសេសនៅពេលដែលបុរសនោះបានរកឃើញរូបរាងរបស់ Zhengmei ដូច្នេះគាត់ក៏ប្រញាប់សុំស្នេហ៍តែម្តង។
ក្រោយស្រឡាញ់គ្នាតាមប្រព័ន្ធអ៊ីនធឺណិតមួយរយៈ បុរសរូបនេះអន្ទះសាចង់ជួបនាង Zhengmei ក្នុងជីវិតពិតជាខ្លាំង ហើយអ្នកទាំងពីរក៏គិតចង់រៀបការដូចគ្នាផងដែរ។ ដូច្នេះហើយ អ្នកទាំងពីរបានណាត់ជួបគ្នានៅភោជនីយដ្ឋានមួយក្នុងទីក្រុង Nanjing។
នឹកស្មានមិនដល់ ពេលឃើញមុខគ្នាលើកដំបូង ខាងប្រុសពិតជាមានការភ្ញាក់ផ្អើលយ៉ាងខ្លាំង ទៅនឹងរូបសម្រស់ពិតរបស់ Zhengmei ព្រោះថា ជំនួសឱ្យស្រីស្អាតគួរឱ្យស្រលាញ់នៅក្នុងរូបថត គឺរូបរាងរបស់ Zhengmei បង្ហាញថាជាមនុស្សស្រីធម្មតាម្នាក់ ដែលមិនត្រឹមតែមានរូបរាងធាត់ប៉ុណ្ណោះទេ តែថែមទាំងមានស្បែកខ្មៅ ច្រមុះធំទៀតផង ពោលគឺលក្ខណៈពិសេសនៅលើមុខរបស់នាង ក៏ខុសប្លែកឆ្ងាយពីក្នុងរូបថត ដែលធ្វើឲ្យបុរសនោះលាន់មាត់ថា “នាងមើលទៅចាស់ជាង១០ឆ្នាំ”។
ទោះជាយ៉ាងណា បុរសនោះ នៅតែបង្ហាញការអត់ធ្មត់ បន្តការណាត់ជួបគ្នារហូតចប់ ប៉ុន្តែ បន្ទាប់ពីបែកគ្នា វិលត្រឡប់ទៅផ្ទះវិញរៀងៗខ្លួន បុរសនោះ ក៏បានឈប់ទាក់ទងជាមួយនាង Zhengmei ព្រោះតែគាត់មិនអាចទទួលយកភាពខុសគ្នាដ៏ខ្លាំង រវាងរូបរាងរបស់នាងតាមអ៊ីនធឺណិត និងក្នុងជីវិតពិតបែរជាបែបនេះទៅវិញ។
រឿងរ៉ាវខាងលើបានធ្វើឱ្យផ្ទុះកក្រើកក្នុងសង្គមអនឡាញ ដោយមានមតិចម្រុះ។ មនុស្សជាច្រើន បានរិះគន់នាង Zhengmei បោកប្រាស់ និងចំអកថា៖ «ចាញ់បោកគ្រប់បែបយ៉ាង», «ខ្ញុំអាយុ៣២ឆ្នាំទេ តែក្នុងជីវិតពិតខ្ញុំអាយុដូចអ្នកមីងអាយុ ៥២ឆ្នាំ» «នាងមិនមែនអាក្រក់មែន តែប្លែកពីរូបភាពលើអ៊ីនធឺណិត មិននឹកស្មានថា បុរសម្នាក់នេះតក់ស្លុតដល់ថ្នាក់នេះ «លើលោកនេះ អ្វីៗមិនគួរទុកចិត្តបំផុត គឺរូបភាពមនុស្សស្រីនៅលើអ៊ីនធឺណិតហ្មង…»។
តែយ៉ាងណា ក្នុងនោះ ក៏មានអ្នកការពារ Zhengmei ដោយបាននិយាយថា៖ «ពិតជាមានភាពខុសគ្នា ប៉ុន្តែមិនច្រើនទេ សំខាន់គឺដោយសារពន្លឺ និងមុំនៃការថត» «មនុស្សស្រីគ្រប់រូបឥឡូវប្រើកម្មវិធីជំនួយ ព្រោះតែចង់ស្អាតជាង», «រឿងស្នេហាសំខាន់បំផុត គឺចរិត និងគុណតម្លៃ មិនមែនរូបរាងនោះទេ…»៕ រក្សាសិទ្ធិដោយ៖ លឹម ហុង
