វីដេអូស្រីស្អាតម្នាក់ ដែលបង្ហាញកាយវិការក្នុងទឹកមុខដ៏គួរឲ្យអស់សំណើច ព្រោះតែ «ជើងដ៏ពិសេស» របស់ស្រ្តីអ្នកដំណើរចំណាស់ម្នាក់ ដែលអង្គុយក្បែរនាង នៅលើយន្តហោះ បានទទួលការចាប់អារម្មណ៍យ៉ាងខ្លាំង ពីសំណាក់អ្នកលេងអ៊ីនធើរណែត។
នេះបើតាមអ្នកប្រើប្រាស់ TikTok ឈ្មោះ mmeemojuly បានបង្ហោះវីដេអូ រៀបរាប់យ៉ាងដូច្នេះថា «ខ្ញុំ និងប្អូនស្រី បានជិះយន្តហោះជាលើកទី១ ប៉ុន្តែ ពួកខ្ញុំទាំងពីរពុំបានអង្គុយក្បែរគ្នានោះទេ ព្រោះមានកៅអីចំនួន៣ជួរ ដោយម្ខាងៗអង្គុយតាមច្រកផ្លូវ។ តែក្នុងអំឡុងពេលកំពុងថតឃ្លីប បានធ្វើឲ្យខ្ញុំងឿងឆ្ងល់ជាខ្លាំង ខណៈឃើញប្អូនស្រីដែលអង្គុយម្ខាងទៀត កំពុងធ្វើមុខធ្វើមាត់គួរឲ្យចម្លែក តែនៅពេលពិនិត្យឲ្យដិតដល់ ធ្វើឲ្យខ្ញុំមិនអាចសើចបាននោះទេ»។
តាមរយៈវីដេអូ គេបានឃើញអ្នកដំណើរស្រីវ័យចំណាស់ម្នាក់ ដែលអង្គុយក្បែរកៅអីប្អូនស្រីរបស់នាង កំពុងតែអង្គុយគងទាក់ខ្លាផ្ងារបាតជើង ដែលធ្វើឲ្យប្អូនស្រីរបស់នាង បញ្ចេញកាយវិការមិនសមទំនង ព្រោះពេលនោះនាងកំពុងញ៉ាំបង្អែម តែងាកមកស្តាំដៃ ព្រះអើយស្រ្តីនោះកំពុងតែលើកជើងមកជិតយ៉ាងពេញទំហឹងតែម្តង។
ខណៈនោះ ប្អូនស្រីរបស់នាងបានព្យាយាមពន្យល់ ផ្តល់សញ្ញា តាមរយៈធ្វើភ្នែកក្រឡេកក្រឡាច់ ថាកំពុងមានអ្វីមិនល្អនៅក្បែរនាង។ អ្វីដែលអស់ទាស់ទៀតនោះ វីដេអូក៏បង្ហាញស្រ្តីនោះ បានយកដៃកោសជើងយកហិតធ្វើពុំដឹងទៀតផង។ តាមរយៈឃ្លីប នាងបានបញ្ជាក់ក្នុង Caption ថា៖ «បងប្អូនស្រីឡើងយន្តហោះលើកដំបូង ជួបរឿងឡើងអស់ទាស់តែម្តង»។
បន្ទាប់ពីឃ្លីបនេះត្រូវបានបង្ហោះ ឃើញថាវាបានរីករាលដាល ដោយមានអ្នកចូលមើលរហូតជាង 300k។ ក្នុងនោះ អ្នកលេងបណ្តាញសង្គម បានបញ្ចេញអារម្មណ៍មួយនេះថា «គ្រាន់តែមើលរូបភាព ក៏ធ្វើឲ្យខ្ញុំហត់ជំនួសដែរ មិនក្លិនជះប៉ុណ្ណាទេ?, មានអារម្មណ៍ថា ដូចជិះរថភ្លើងឥតគិតថ្លៃអ៊ីចឹង»។ រីឯអ្នកខ្លះក៏បាននិយាយថា «បើជួបរឿងបែបនេះ ទ្រាំមិនបានទេ ត្រូវជូនដំណឹងជាបន្ទាន់សុំប្តូរកៅអីហើយ»៕ រក្សាសិទ្ធិដោយ៖ លឹម ហុង
