ភ្នំពេញ៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា បាន ជម្រុញលើការកែសម្រួលមជ្ឈមណ្ឌលសង្គមកិច្ចព្រៃស្ពឺអោយបានល្អ ហើយលោកគ្រោងនឹងលើកស្ត្រីភេទ ធ្វើជាប្រធានមន្ទីរសង្គមកិច្ចអោយបានច្រើន ខណៈមកដល់ពេលនេះប្រធានមន្ទីរសង្គមកិច្ចអតីតយុទ្ធជននិងយុវនីតិសម្បទាមានចំនួនត្រឹមតែ៣នាក់ប៉ុណ្ណោះ។
លោក វង សូត បានលើកឡើងបែបនេះក្នុង ពិធីប្រកាសតែងតាំងជាប្រធានមន្ទីរសង្គមកិច្ច អតីតយុទ្ធជននិងយុវនីតិសម្បទារាជធានីភ្នំពេញាគឺលោកស្រីមុំ ចាន់ដានី ជំនួសលោកសន សុផល សម្រួលទៅកាន់ភារកិច្ចថ្មីកាលពីរសៀលថ្ងៃទី១៤ វិច្ឆិកា ឆ្នាំ២០១៧នៅសាលារាជធានីភ្នំពេញ។
លោករដ្ឋមន្ត្រីបានមានប្រសាសន៍ថា “កន្លងមកនេះអង្គការសង្គមស៊ីវិល តែងវាយប្រហារយ៉ាងខ្លាំងចំពោះមជ្ឈមណ្ឌលសង្គមកិច្ចព្រៃស្ពឺ ដោយគេចោទយើងថា គ្រប់គ្រងមិនបានល្អ មានបញ្ហាច្រើន។ ដូច្នេះទេលោកជម្រុញអោយប្រធានមន្ទីរថ្មីត្រូវយកចិត្តទុកដាក់និងកែសម្រួលអោយបានល្អជាងមុន។ វាជារឿងមិនធម្មតាពេកទេចំពោះការគ្រប់គ្រងមនុស្សបាត់បង់សតិនោះ ប៉ុន្តែទោះបីជាយ៉ាងណាក្តីត្រូវតែខិតខំ ពិសេសត្រូវសហការអោយបានល្អជាមួយអាជ្ញាធរមានសមត្ថកិច្ច ក្នុងការដើរប្រមូលជនអាណាថា នៅតាមដងផ្លូវក្នុងរាជធានីភ្នំពេញ ។បើទុកអោយពួកគាត់ដើរពាសវាលពាសកាល វាមិនល្អភ្នែកភ្ញៀវទេសចរណ៍ជាតិនិងអន្តរជាតិនោះទេ ហើយវាក៏ធ្វើអោយរាជធានីភ្នំពេញយើងបាត់បង់សណ្តាប់ធ្នាប់និងសោភណ្ឌភាពផងដែរ ។ដូច្នេះទេយើងត្រូវរួមគ្នាធ្វើកិច្ចការងារនេះបានល្អ”។
លោកវង សូត បានមានប្រសាសន៍បន្តថា នរណាម្នាក់ក៏រត់មិនរួចពីសង្គមកិច្ចដែរ មានន័យថា កាលបើចូលនិវត្តន៍ហើយ គឺពួកគាត់ចូលច្រកក្រោមក្រសួងសង្គមកិច្ច និងបើកលុយពីសង្គមកិច្ចហើយ ។ដូច្នេះក្នុងនាមយើងជាមន្ត្រីដែលបំរើលើការងារនេះត្រូវយកចិត្តទុកដាក់ចំពោះពួកគាត់ ដោយហេតុថា នេះជាជីវិតចុងក្រោយរបស់ពួកគាត់ជាមន្ត្រីរាជការហើយ។
លោករដ្ឋមន្ត្រីក៏បានបញ្ជាក់ពីគម្រោងរបស់ក្រសួងសង្គមកិច្ច អតីតយុទ្ធជននិងយុវនីតិសម្បទាផងដែរថា ចំពោះទិសដៅខាងមុខ ក្រសួងនឹងជ្រើសរើសប្រធានមន្ទីរសង្គមកិច្ច អតីតយុទ្ធជននិងយុវនីតិសម្បទា ជាស្ត្រីអោយបានច្រើន ៕ ដោយ៖កូឡាប
