ករណីបុរសជនជាតិថៃ ដ៏មានមន្តស្នេហ៍ម្នាក់ មានប្រពន្ធរហូតដល់ទៅ ៨ នាក់ ដែលសុទ្ធសឹងស្អាតៗ និងជឿថា មនុស្សប្រុសជាច្រើនប្រាកដជាលួចច្រណែនមិនស្ទើរនោះទេ គឺបានល្បីខ្លាំងនៅក្នុងពិភពអនឡាញ រហូតមកទល់ពេលនេះ ខណៈពួកគេនៅតែរក្សាចំណងគ្រួសាររួមដំបូលប្តីតែមួយដ៏ល្អនឹងគ្នា។
តែទន្ទឹមនឹងនឹងមានមនុស្សមួយចំនួន បានចោទឡើងថា បុរសរូបនេះដែលមានឈ្មោះ Natthaphong Chiablaem ឬហៅថាលោកគ្រូ Ajarn Ong Dam ដែលជាគ្រូសាក់ដ៏ល្បី ច្បាស់ណាស់ប្រើវិធីដាក់ស្នេហ៍ ឬ អាចប្រើអំណាចទឹកលុយជា «ធ្នាក់» អូសទាញប្រពន្ធទាំង ៨ បានធ្វើឲ្យលោក Natthaphong សម្តែងការហួសចិត្តយ៉ាងខ្លាំង។
លោក Nattapong បង្ហើបថា ចំពោះបញ្ហាមានប្រពន្ធ៨នាក់ គាត់ចង់ពន្យល់ថា គាត់គ្មានវិធីអាក្រក់អ្វីទេ។ ប៉ុន្តែប្រហែលគាត់ជាមនុស្សប្រុសពេញលក្ខណៈសម្បត្តិ គឺនៅពេលដែលណាត់ជួបនារីណាម្នាក់ ពួកគេនឹងបង្ហាញអារម្មណ៍ចូលចិត្តដោយមិនលាក់បាំង។ គាត់ជាមនុស្សច្បាស់លាស់មិនហ៊ានបោកប្រាស់មនុស្សស្រីឡើយ ហើយមុនពេលណាត់ជួបគ្នាជាប្តីប្រពន្ធ គាត់ក៏បានប្រាប់ត្រង់ៗថា គាត់មានប្រពន្ធរួចហើយៗ ហើយគ្រប់គ្នាម្នាក់ៗមិនថាអីទេ ក៏ព្រមព្រៀងគ្នាក្នុងទំនាក់ទំនង គ្មានការលាក់លៀម គ្មានការលួចលាក់សំងាត់ផិតក្បត់អ្វីឡើយ។
លោក Nattapong បានបន្តថា ការមានដៃគូជីវិតដ៏ចម្លែកជាងអ្នកដទៃបែបនេះ ព្រោះមានប្រពន្ធច្រើន ចែះជួយចែករំលែកទុក្ខលំបាកគ្នាទៅវិញទៅមក។ ប៉ុន្តែ គាត់មានលក្ខខណ្ឌជាមួយប្រពន្ធទាំងអស់ថា កុំកុហកគ្នា ត្រូវរស់នៅជាមួយគ្នាដោយបើកចំហ និងរស់នៅជាមួយគ្នាដោយមិនឈ្លោះច្រណែនគ្នា រស់នៅជាមួយគ្នាដោយបេះដូង កុំប្រើអំណាចដើម្បីគាបសង្កត់គ្នា។
“មនុស្សជាច្រើនសង្ស័យថា ខ្ញុំមានអំណាចទឹកលុយ ទៅលើប្រពន្ធទាំង៨? ខ្ញុំចង់សួរថា បើខ្ញុំបង់ឲ្យប្រពន្ធ៨នាក់ តើត្រូវចំណាយប៉ុន្មានសែនលានទៅ? លុយមិនអាចទិញមនុស្សបានទេ មនុស្សគ្រប់រូបមានសេចក្តីថ្លៃថ្នូរ ខ្ញុំគ្មានលុយទេ បើប្រពន្ធមិនធ្វើការរកស៊ីនោះ!។ ជាក់ស្តែង ពេលកូវីដចូលមក ការិយាល័យសាក់ត្រូវបានបិទ គ្មានចំណូល គឺកុំតែបានប្រពន្ធទាំងអស់ ជួយគ្នារកលុយបង់ថ្លៃទឹកភ្លើងទេ កុំអីវីវរធំហើយ!»។
ដោយឡែក នៅពេលមានមនុស្សមួយចំនួននិយាយថា គាត់ធ្វើជាគំរូអាក្រក់សម្រាប់យុវជន សង្គមគ្រួសារ! លោក Nattapong ពន្យល់ថា នេះជានិស្ស័យគាត់ តែនិយាយថាកុំយកតម្រាប់តាម ព្រោះរឿងនេះ គាត់មិនបានធ្វើឲ្យប្រពន្ធរបស់គាត់ពិបាកចិត្ត មិនឲ្យគ្រួសារមានបញ្ហា គ្រប់គ្នាមានសិទ្ធិជ្រើសរើស តើខុសមែន?។ ក្នុងនោះ គាត់មានច្បាប់ថា មិនលេងផិតក្បត់ មិនហាម បើចង់ឈប់ជាប្តីប្រពន្ធត្រូវសួរមុន ដោយគាត់នឹងសួរ៣ដង បើចម្លើយនៅតែដដែល គាត់នឹងបោះបង់ ព្រោះយើងរស់នៅជាមួយគ្នាដោយចិត្ត ចំណែកឯការបែកគ្នា ចាត់ទុកដូចបងប្អូន។
លោក Nattapong ក៏បានបញ្ជាក់ជាចុងក្រោយថា “នៅពេលខ្ញុំធ្វើវា ខ្ញុំមិនរំខាននរណាម្នាក់ទេ។ តើអ្នកនឹងជេរខ្ញុំដើម្បីអ្វី? កុំដាក់ចំណងក្នុងគ្រួសាររបស់អ្នក។ កុំប្រច័ណ្ឌប្រពន្ធខ្ញុំ កុំខឹងប្រពន្ធខ្ញុំអី ទៅថ្ងៃអនាគត ខ្ញុំមិនអាចឆ្លើយថានឹងមានប្រពន្ធទី៩ ឬអត់ទេ ប៉ុន្តែបេះដូងខ្ញុំពេលនេះ ខ្ញុំមិនមានអារម្មណ៍ថាខ្ញុំចង់បន្ថែមនរណាម្នាក់ទៀតទេ។ ឥឡូវពេញចិត្តនឹងអ្វីដែលខ្ញុំមាន តែខ្ញុំក៏មិនអាចឆ្លើយបាននៅថ្ងៃអនាគត ប៉ុន្តែ អ្វីដែលខ្ញុំអាចបំពេញឲ្យពួកគេបាននៅពេលនេះ គឺបែងចែកថ្ងៃតាមលំដាប់លេខ ១-៨ ឆ្លាស់គ្នា»៕ រក្សាសិទ្ធិដោយ៖ លឹម ហុង
