ក្លាយជាប្រធានបទក្ដៅនៅក្នុងប្រព័ន្ធបណ្ដាញសង្គមរបស់ប្រទេសចិនភ្លាមៗ ក្រោយពីមានការផ្សព្វផ្សាយឃ្លីបវីដេអូហេតុការណ៍ព័ទ្ធចាប់បុរសអ្នកលួចថតស្រីៗអ្នកបម្រើលើយន្តហោះ ខណៈពេលពួកនាងចូលបន្ទប់ទឹក ហើយរឹតតែអស្ចារ្យជាងហ្នឹងទៅទៀត បុរសបង្កហេតុនោះ ការពិតគឺជាអ្នកបើកយន្តហោះរបស់ក្រុមហ៊ុនល្បីឈ្មោះមួយ។
ឃ្លីបវីដេអូដែលផ្សព្វផ្សាយនៅក្នុងវេបសាយ Weibo បានបង្ហាញឱ្យឃើញពីក្រុមស្ត្រីអ្នកបម្រើលើយន្តហោះនៅក្នុងទីក្រុងសៀមីន ស្រែកឡូឡាឡើងថា “មានអ្នកលួចថតក្នុងបន្ទប់ទឹក!!” មុននឹងបណ្ដាអ្នកបម្រើលើយន្តហោះ និងបុគ្គលិកអាកាសយានដ្ឋាន នាំគ្នាព័ទ្ធចាប់បុរសម្នាក់នោះបានភ្លាមៗតែម្ដង។
តមក របាយការណ៍បានបញ្ជាក់ថា បុរសរូបនោះ គឺជាអ្នកបើកយន្តហោះរបស់ក្រុមហ៊ុនអាកាសចរណ៍ល្បីឈ្មោះមួយ អាយុ ២៦ឆ្នាំ ត្រូវបានឃុំខ្លួនពីបទលួចថតរូបខុសច្បាប់។
អ្នកលេងបណ្ដាញសង្គមក្នុងប្រទេសចិនជាច្រើនបាននាំគ្នាផ្ញើសារចូលទៅកាន់ផេចរបស់ក្រុមហ៊ុនអាកាសចរណ៍មួយនោះ ដោយបានសរសេរថា “ខ្ញុំនឹងឈប់ជិះយន្តហោះរបស់អ្នកទៀតហើយ ខ្ញុំខ្លាចបុគ្គលិករបស់អ្នក លួចថត” និង “អ្នកបើកយន្តហោះជាមនុស្សរោគចិត្ត សូមនាំគ្នាឈប់ទិញសំបុត្រយន្តហោះរបស់ក្រុមហ៊ុននោះទៀត ព្រោះអ្នកអាចត្រូវគេលួចថត”។
ទីបំផុត ក្រុមហ៊ុនអាកាសចរណ៍នោះ បានផូស្តសេចក្ដីថ្លែងការណ៍ថា អ្នកបើកយន្តហោះដឹកអ្នកដំណើររូបនោះ ត្រូវបានក្រុមហ៊ុនបណ្ដេញចេញពីការងារហើយ៕
