អូននឹងតាមចាប់បងមកវិញឱ្យបាន! កូនក្រមុំឥណ្ឌាស្លៀកឈុតអាពាហ៍ពិពាហ៍ ដេញតាមចាប់កូនកំលោះរត់គេចពីពិធីសែនព្រេន ២០គីឡូម៉ែត្រ អូសកមកឱ្យអង្គុយស្បថស្បែក្នុងពិធីសែនព្រេនវិញ។
តាមរបាយការណ៍របស់ Indiatoday បានឱ្យដឹងថា ហេតុការណ៍នេះបានកើតឡើងនៅក្នុងរដ្ឋ អ៊ុតដនប្រាថេត ប្រទេសឥណ្ឌា បុរស-ស្ត្រី ១គូដែលមានសម្ព័ន្ធភាពស្នេហ៍ជាមួយគ្នាជាង ២ឆ្នាំមកហើយនោះ នៅទីបំផុត ថ្ងៃសែនព្រេនក៏ត្រូវបានកំណត់ឡើងក្រោយពីការចរចាគ្នារវាងក្រុមគ្រួសារទាំង២ រួចរាល់ហើយ តែយ៉ាងណាក្ដី លុះដល់ថ្ងៃធ្វើពិធី ស្រាប់តែកូនកំលោះបែរជាមិនមកបង្ហាញខ្លួន…។
កូនក្រមុំដែលតែងខ្លួនទ្រង់គ្រឿងយ៉ាងស្អាតនោះ ត្រូវអង្គុយរង់ចាំយ៉ាងគ្មានទីបញ្ចប់។ លុះរង់ចាំយូរពេក ក៏នឹកចម្លែកចិត្ត រហូតដល់ត្រូវទូរស័ព្ទតាម តែខាងកូនកំលោះក៏ដោះសាថា កំពុងតែទៅទទួលយកម្ដាយមកចូលរួមពិធី។ គ្រាន់តែកូនក្រមុំបានឮបែបហ្នឹងភ្លាម ក៏នឹកសង្ស័យថា កូនកំលោះច្បាស់ជាកំពុងរៀបផែនការរត់គេចពីពិធីសែនព្រេននេះហើយ…មិនបង្អង់យូរ នាងក៏ចេញតាមប្រមាញ់កូនកំលោះភ្លាមតែម្ដង។
ដេញតាម រហូតទៅចាប់បាន ខណៈកូនកំលោះកំពុងឡើងឡានក្រុងនៅជិតប៉ុស្តប៉ូលិស ដែលស្ថិតនៅឆ្ងាយពីកន្លែងធ្វើពិធីសែនព្រេនដល់ទៅ ២០គីឡូម៉ែត្រ។ ពេលនោះរឿងដ្រាម៉ា ក៏កើតឡើងយ៉ាងក្ដៅគគុករវាងអ្នកទាំង២។ តែទីបំផុត កូនក្រមុំក៏នាំកូនកំលោះត្រឡប់ទៅធ្វើពិធីស្បថស្បែសែនព្រេនបានសម្រេចដូចបំណង នៅមុខមេបាទាំង ២គ្រួសារយ៉ាងស្ងៀមស្ងាត់៕
