អ្នកស្រី លូលី រស់នៅក្នុងទីក្រុង Guangzhou ខេត្ត Guangdong ប្រទេសចិន គឺជាមិត្តភ័ក្តិជាមួយលោក លីវ ហ៊ុយ តាំងពីកុមារភាព។ អ្នកទាំងពីរធំឡើង ក៏មានអារម្មណ៍ស្នេហាកាន់តែស៊ីជម្រៅ រហូតរៀបការក្លាយខ្លួនជាប្តីប្រពន្ធនឹងគ្នា។ ទោះបីជាយ៉ាងណា បន្ទាប់ពីរៀបការបាន ៨ ឆ្នាំ ប្ដីប្រពន្ធអ្នកទាំងពីរមិនអាចបង្កើតកូនបានទេ។
ពិតណាស់ រស់នៅជនបទ អ្នកស្រី លូលី បានរងសម្ពាធចំអកពីពីមនុស្សជុំវិញ ដោយមនុស្សជាច្រើន បានពោលពាក្យអសុរសថា «មាន់មិនចេះពង» បើទោះបីជាមិនដឹងថា រវាងអ្នកស្រី លូលី ឬ លោក លីវ ហ៊ុយ អ្នកណាអសមត្ថភាពក៏ដោយ។ បន្តិចម្ដងៗ រឿងនេះក៏ធ្វើប៉ះពាល់ដល់អារម្មណ៍របស់ប្តីប្រពន្ធជាខ្លាំង។
ក្នុងនាមជាស្ត្រីរឹងមាំ អ្នកស្រី លូលី ពិតជាមានការសោកស្ដាយ ចំពោះពាក្យសម្តីមនុស្សជុំវិញខ្លួន ហើយអ្នកស្រីក៏បារម្ភខ្លាចប្តីធុញទ្រាន់ និងបោះបង់នាងចោល។ ដោយសារតែរងសម្ពាធពីអ្នកជិតខាង ប្តីប្រពន្ធមួយគូនេះ ក៏បានគិតចង់ធ្វើ IVF ផងដែរ ប៉ុន្តែស្ថានភាពហិរញ្ញវត្ថុរបស់គ្រួសារមិនធ្វើទៅបានទេ។
ដោយសារតែរកដំណោះស្រាយ ខណៈមិនអាចពឹងលើប្តីបាន អ្នកស្រី លូលី ក៏ចាប់ផ្តើមមានគំនិតដ៏មិនគួរឲ្យជឿ ដោយនាងត្រូវរកវិធីសម្រាប់ខ្លួនឯង គឺ “សុំទាន” ពីបុរសម្នាក់ទៀត ក្រែងអាចមានផ្ទៃពោះបាន។ ទីបំផុត អ្នកស្រី លូលី ក៏សម្រេចជ្រើសរើសគំនិតឆ្កួតៗនេះ ដោយរកឃើញបុរសម្នាក់។
អ្នកស្រី លូលី បានលួច “បង្កើតស្នេហា” ជាមួយបុរសចម្លែកម្នាក់ ដែលនាងមិនស្គាល់។ បន្ទាប់ពីនៅជាមួយគ្នាបានចំនួន ២ ដង នាងក៏មានផ្ទៃពោះដូចក្តីប្រាថ្នា។ បន្ទាប់នសម្រេចគោលដៅហើយ នាងក៏បានកាត់ផ្តាច់ទំនាក់ទំនងជាមួយបុរសនោះផងដែរ។ នាង លូលី គិតថា ធ្វើបែបនេះនឹងជួយឲ្យនាងរក្សាចំណងប្តីប្រពន្ធ និងគ្មាននរណាអាចរិះគន់ និងចំអកឲ្យនាងបានទៀតទេ។ មិនយូរប៉ុន្មាន នាងបានសម្រាលបានកូនប្រុសដ៏ស្រស់ស្អាត និងមានសុខភាពល្អ ដែលធ្វើឲ្យគ្រួសារទាំងមូលរីករាយជាងខ្លាំង។
អ្នកស្រី លូលី បានតាំងចិត្តលាក់រឿងនេះរហូតដល់ស្លាប់ ព្រោះកូនរបស់នាង មិនមែនជាឈាមរបស់លោក លីវ ហ៊ុយ។ ទោះជាយ៉ាងណា នាង បានធ្វើឲ្យគ្រួសារប្តីមានការសង្ស័យថា កូននោះមិនមែនជាកូនបង្កើតរបស់លោក លីវ ហ៊ុយ ពួកគេក៏ទាមទារពិនិត្យទំនាក់ទំនងឈាម ហើយទីបំផុត ក៏ធ្លាយការពិតតែម្តង។
លោក លីវ ហ៊ុយ ពេលបានដឹងរឿងនេះ ក៏ខឹងយ៉ាងខ្លាំង ដែលធ្វើអ្នកស្រី លូលី មានការភ័យខ្លាចជាខ្លាំង ក៏ប្រញាប់ដឹកកូនទៅផ្ទះម្តាយ។ នាងមិនហ៊ាននិយាយការពិតប្រាប់ឪពុកម្តាយទេ តែកុហកថានាងនិងប្តីកំពុងមានជម្លោះផ្លូវចិត្ត។
ទោះជាយ៉ាងណា លោក លីវ ហ៊ុយ បានទៅផ្ទះឪពុកម្តាយខាងប្រពន្ធ ដើម្បីលាតត្រដាងទង្វើផិតក្បត់របស់ប្រពន្ធ ដោយអះអាងថា អ្នកស្រី លូលី មានទំនាក់ទំនងស្នេហា រួចហើយនាំកូនមក ដើម្បី «ដោះសារ» បែបនេះ។
ប្រឈមនឹងការចោទប្រកាន់ អ្នកស្រី លូលី បានយំយ៉ាងជូរចត់ ដោយនិយាយថា នាងមិនបានក្បត់ចិត្តប្តីទេ គ្រាន់តែប្តីប្រពន្ធមិនអាចបង្កើតកូនបាន ទើបរូបនាង «សុំទាន» ពីបុរសផ្សេង ដើម្បីចង់រក្សាចំណងគ្រួសារយូរអង្វែងជាមួយគ្នាប៉ុណ្ណោះ។ ទោះជាយ៉ាងណា ការគិតខុសនេះធ្វើឲ្យឪពុកម្ដាយរបស់ លូលី ក៏មិនអាចទទួលយកបានដែរ។
ជាលទ្ធផល អ្នកស្រី លូលី ត្រូវទៅជួបលោក លីវ ហ៊ុយ នៅតុលាការ។ ចៅក្រមបានសម្រេចថា អាកប្បកិរិយារបស់អ្នកស្រី លូលី បានរំលោភសិទ្ធិប្តីប្រពន្ធរបស់លោក លីវ ហ៊ុយ ដូច្នេះអ្នកទាំងពីរត្រូវបានអនុញ្ញាតឲ្យលែងលះគ្នា។ អ្នកស្រី លូលី ត្រូវទទួលបន្ទុកចិញ្ចឹមកូនខ្លួនឯង និងព្រមទាំងបន្ថែមពីលើសំណងមួយចំនួន ដែលបង្កការខូចខាតផ្លូវចិត្តដល់លោក លីវ ហ៊ុយ ផងដែរ៕ រក្សាសិទ្ធិដោយ៖ លឹម ហុង
