ប្រិយមិត្តជាច្រើន បានស្គាល់រួចហើយ ពីកីឡាការិនីឆ្នើមរបស់កម្ពុជា អ្នកនាង ស្រួង ភាវី ដែលពុំត្រឹមតែបានលើកមុខមាត់ជាតិ បន្ទាប់ពីដណ្តើមមេដាយមាស លើប្រភេទកីឡាស្នូកឃ័រ ក្នុងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះប៉ុណ្ណោះទេ តែអ្នកនាងក៏ជាសប្បុរសជនដ៏មានទឹកចិត្តសប្បុរសធម៌មួយរូបផងដែរ។
ជាក់ស្តែង ក្រោយឈ្នះមេដាយជូនជាតិ វីរៈការិនីមានសណ្ដានចិត្តដ៏ល្អប្រពៃរូបនេះ បានយកថវិកាពីការប្រកួតទាំងអស់ ដាក់ក្នុងមូលនិធិសប្បុរសធម៌ ដើម្បីជួយដល់ជនក្រីក្រនៅក្នុងប្រទេសកម្ពុជា ជាពិសេសក្មេងៗដែលត្រូវការជំនួយជាចាំបាច់ ក្នុងការស្វែងរកការរៀនសូត្រក្រេបយកចំណេះដឹង។
ដោយឡែក ថ្មីៗនេះទៀត អ្នកនាង ស្រួង ភាវី បានធ្វើឲ្យមហាជនសម្តែងនូវការកោតសរសើរ ចំពោះទឹកចិត្តលះបង់ដ៏ធំធេងរបស់អ្នកនាងជាខ្លាំង បន្ទាប់ពីបានប្រកាសនឹងបង្វិលប្រាក់ទាំងអស់បន្ថែមទៀត ដែលអ្នកនាងទទួលបាន ក្នុងនាមជាទូតសុច្ឆន្ទៈរបស់ក្រុមហ៊ុនអាកាសចរណ៍ដ៏ធំមួយ។
តាមរយៈគណនីផ្ទាល់របស់ខ្លួន អ្នកនាង ស្រួង ភាវី បានបង្ហោះសារឲ្យបងប្អូនប្រជាជនកម្ពុជាបានដឹងយ៉ាងដូច្នេះថា៖ «សូមជម្រាបពុកម៉ែបងប្អូន! នាងខ្ញុំបានចុះកុងត្រាជាមួយក្រុមហ៊ុនអាកាសចរណ៍ ស្កាយអង្គរ SKY ANGKOR ក្នុងនាមជាទូតសុច្ឆន្ទៈរបស់ក្រុមហ៊ុន។ ការចុះកុងត្រានេះខ្ញុំមិនយកប្រាក់សម្រាប់ខ្លួនឯងទេ គឺខ្ញុំបានបង្វិលទៅជាកិច្ចការសប្បុរសធម៌វិញ។ គឺថាប្រសិនបើខ្ញុំត្រូវមានកិច្ចការសប្បុរសធម៌ត្រូវធ្វើ ឬមានប្អូនៗ ក៏ដូចជាប្រជាជនខ្មែរយើងដែលមានជីវភាពខ្វះខាត ហើយត្រូវបានអង្គការសប្បុរសធម៌របស់នាងខ្ញុំ ធានាពួកគាត់មកព្យាបាលជំងឺនៅប្រទេសកូរ៉េ គឺមិនតម្រូវឱ្យយកប្រាក់ពីពួកគាត់ឡើយ។
អ្នកនាង ភាវី ក៏បានបញ្ជាក់ថា «ការស្នើលក្ខខណ្ឌរបស់នាងខ្ញុំនេះ គឺបានខាងក្រុមហ៊ុនទទួលយល់ព្រមដោយសេចក្ដីសោមនស្សរីករាយទាំងអស់គ្នា។ ខ្ញុំមានខ្លួនតែមួយ រាល់កិច្ចការដែលខ្ញុំទទួលធ្វើទាំងអស់គឺជាអម្រែកដ៏ធំធេង ប៉ុន្តែការលះបង់ទាំងប៉ុន្មានរបស់ខ្ញុំវាមានតម្លៃធំធេងពេកសម្រាប់ប្រទេសក៏ដូចជាប្រជាជនខ្ញុំ ទើបធ្វើឱ្យខ្ញុំញញឹមទទួលធ្វើទាំងដឹងថាវាជាអម្រែកដ៏ធំធេង»។
សូមបញ្ជាក់ថា អ្នកនាង ស្រួង ភាវី កើតនៅថ្ងៃឆ្នាំ១៩៩០ ជាអ្នកខេត្តកំពង់ចាម ដែលបច្ចុប្បន្ននេះ ក្លាយជាខេត្តត្បុងឃ្មុំ។ អ្នកនាង ភាវី បានចាកចេញពីប្រទេសកម្ពុជា មករស់នៅប្រទេសកូរ៉េខាងត្បូងតាំងពីអាយុ ២០ ឆ្នាំ ដើម្បីរៀបការជាមួយស្វាមីជាជនជាតិកូរ៉េ។ ភាវី បានចំណាយរយៈពេល ៧ ឆ្នាំ ដើម្បីវិវឌ្ឍខ្លួនឲ្យក្លាយជាកំពូលកីឡាការិនីស្នូកឃ័រ ដោយការចាប់ផ្តើមដំបូងរបស់នាង គឺគ្រាន់តែទៅមើលស្វាមីលេងប៉ុណ្ណោះ ប៉ុន្តែ បន្ទាប់សាកលេងយូរៗទៅ អ្នកនាងក៏ទទួលបានការសរសើរពីអ្នកទៅលេងជុំវិញ ថាមានស្នាដៃល្អ ។ ដោយឃើញគ្រប់គ្នាជម្រុញលើកទឹកចិត្តបែបនេះ ស្វាមីរបស់អ្នកនាងក៏បានបង្រៀនអំពីរបៀបលេង និងនាំយកកីឡាករល្អៗមកបង្ហាត់បន្ថែម ធ្វើឲ្យការលេងរបស់អ្នកនាងកាន់តែរីកចម្រើនដ៏មិននឹកស្មាន។ ដោយមានការជឿជាក់លើសមត្ថភាព អ្នកនាងក៏ត្រូវបានស្វាមីជម្រុញឲ្យចូលរួមប្រជែងកីឡាស្នូកឃ័រដំបូងបំផុត ក្នុងប្រទេសកូរ៉េខាងត្បូង ហើយបានជាប់ចំណាត់លេខ១ ដ៏អស្ចារ្យ នៅក្នុងខែមករា ឆ្នាំ២០១៧ និងបានជាប់ចំណាត់ថ្នាក់លេខ៣ លើប្រភេទកីឡាស្នូកឃ័រ ក្នុងការប្រកួតលំដាប់ពិភពលោក កាលពីឆ្នាំ២០២១៨ ផងដែរ៕ រក្សាសិទ្ធិដោយ៖ លឹម ហុង
