វីដេអូឃ្លីបមួយ ដែលកំពុងរីករាលនៅលើបណ្តាញសង្គម TikTok បានធ្វើឲ្យមហាជនជាច្រើន នាំគ្នាផ្ទុះសំណើចព្រោងព្រាតតែម្តង ដែលបង្ហាឲ្យឃើញស្រ្តីជាប្រពន្ធម្នាក់ បានរកឃើញកន្លែងលាក់លុយថ្មីរបស់បុរសជាប្តី គឺនៅពេលដែលនាងបានយកទូរស័ព្ទរបស់ប្តីមកពិនិត្យ បន្ទាប់ពីបានឃើញទូរស័ព្ទប៉ោងខុសពីធម្មតា សង្ស័យថ្មមានបញ្ហាអាចផ្ទុះបង្កគ្រោះថ្នាក់។
ជាក់ស្តែង តាមរយៈវីដេអូបានបង្ហាញស្រ្តីជាប្រពន្ធ ខណៈកំពុងជិះនៅក្នុងរថយន្តសុខៗ ស្រាប់តែក្រឡេកឃើញទូរស័ព្ទរបស់ប្តី មើលទៅហាក់ដូចជាថ្មកំពុងមានបញ្ហា ព្រោះឡើងប៉ោងសំបកទូរស័ព្ទខ្លាំងតែម្តង។ បន្ទាប់ពីបានឃើញបែបនេះ និងក៏មានការព្រួយបារម្ភខ្លាចថា ថ្មនោះនឹងផ្ទុះនៅពេលណាមួយ ដែលវានឹងបង្កគ្រោះថ្នាក់ដល់ប្តី ដូច្នេះ នាងក៏បានទាញយកវាមកពិនិត្យមើល។
តែអ្វីដែលធ្វើឲ្យនាងភ្ញាក់ផ្អើល និងស្រឡាំងកាំងនោះ គឺបន្ទាប់ពីដោះសំបកចេញ ដើម្បីពិនិត្យមើលស្ថានភាពថ្ម ពុទ្ធោ! គឺកន្លែងដែលប៉ោងនោះ មិនមែនជាថ្មហើមជិតផ្ទុះទេ តែវាបែរជាក្រដាសលុយទៅវិញ។ ក្រោយពីបានឃើញបែបនេះ នាងបានគិតក្នុងចិត្តថា លុយទាំងនោះ គឺប្រាកដណាស់បុរសជាប្តីលាក់ទុកមិនឲ្យនាងដឹងតែម្តង។
យ៉ាងណាមិញ តាមរយៈឃ្លីបដ៏ហួសចិត្តនេះ អ្នកលេងអ៊ីនធើរណែតជាច្រើន បានចូលបញ្ចេញមតិបែបកំប្លែងលេងសើចថា៖ «ចប់ហើយ ថ្មមិនហើម… តែសង្ស័យក្បាលមនុស្សហើមជំនួសទេ!, គិតថាកន្លែងនេះ មានសុវត្ថិភាពហើយ តែទីបំផុត នៅតែគេចមិនរួច ជឿហើយមនុស្សស្រី, សូមដល់ផ្ទះចិត្តត្រជាក់ណែចែ!…»៕ រក្សាសិទ្ធិដោយ៖ លឹម ហុង
