យោងតាម SCMP ក្មេងស្រីម្នាក់នៅក្នុងប្រទេសចិន បានទទួលការកោតសរសើរជាខ្លាំង ពីអ្នកនិយមលេងអ៊ីនធឺណិត ចំពោះទង្វើដ៏ល្អរបស់នាង ដែលបានជួយឪពុករបស់នាងដែលពិការ (ខ្វិន) ដោយនាំយកគ្រឿងសម្ភារៈប្រើប្រាស់ក្នុងផ្ទះ ពីហាងរបស់នាង យកទៅដល់ផ្ទះអតិថិជន។ ហើយអ្វីដែលមិនធម្មតានោះ គឺជារឿយៗ នាងបានដាក់ទូទឹកកកនៅលើខ្នងរបស់នាង រួចលីឡើងជណ្តើរផ្ទះអតិថិជនផងដែរ។
កាសែត The Paper បានរាយការណ៍ថា យុវតីរូបនេះមានឈ្មោះ Cao Youyuan អាយុ ២០ ឆ្នាំ រស់នៅក្នុងខេត្ត Hubei ភាគកណ្តាលប្រទេសចិន -ទីកន្លែងដែលឪពុកម្តាយរបស់នាង មានហាងលក់សម្ភារៈប្រើប្រាស់ក្នុងផ្ទះតូចមួយ។
ឪពុករបស់នាង លោក Xiangjun ត្រូវបានធ្វើរោគវិនិច្ឆ័យថាមានជំងឺស្វិតដៃជើងកាលពីកុមារភាព ហើយបន្ទាប់ពីបានខ្វិនជើងទាំងពីរនៅអាយុ ១៤ ឆ្នាំ គាត់មានការពិបាកក្នុងការដើរ ដោយសារតែការព្យាបាលមិនត្រឹមត្រូវ។
Cao ដែលបច្ចុប្បន្នជានិស្សិតនៅវិទ្យាស្ថានពហុបច្ចេកទេស Hubei បាននិយាយថា “អតិថិជនជាច្រើនជ្រើសរើសការដឹកជញ្ជូនដល់ផ្ទះ ប៉ុន្តែហាងរបស់ឪពុកម្តាយខ្ញុំ ទទួលបានប្រាក់ចំណេញតិចតួចណាស់ ហេតុនេះគ្រួសាររបស់ខ្ញុំមិនមានលទ្ធភាពជួលអ្នកដឹកជញ្ជូនទេ”។
នាងបាននិយាយថា លើកទីមួយដែលនាងបានជួយឪពុកនាង នាំយកទូទឹកកកឱ្យអតិថិជន គឺកាលពី ៦ឆ្នាំមុន ខណៈនាងនៅជាសិស្សមធ្យមសិក្សា។
Cao បាននិយាយថា “ទូរទឹកកកនោះមិនធ្ងន់ទេ ខ្ញុំបានព្យាយាមលីវានៅលើខ្នងរបស់ខ្ញុំ ហើយឃើញថាវាអាចផ្ទុកទម្ងន់បាន។ ចាប់តាំងពីពេលនោះមក ខ្ញុំតែងតែជួយប៉ារបស់ខ្ញុំ ចែកចាយគ្រឿងសម្ភារៈប្រើប្រាស់ នៅពេលទំនេររបស់ខ្ញុំ”។
Cao ក៏បានឲ្យដឹងថា មកទល់ពេលនេះ នាងបានចែកចាយទូរទឹកកកជាង 1,000 និងគ្រឿងប្រើប្រាស់ក្នុងផ្ទះធ្ងន់ៗផ្សេងទៀតដល់អតិថិជន។ ក្នុងអំឡុងពេលដឹកជញ្ជូនម្តងៗ ឪពុករបស់នាង តែងទៅតាម ដើម្បីធានាសុវត្ថិភាពកូនស្រី។
Cao បាននិយាយថា៖ “ទូទឹកកកធ្ងន់បំផុតដែលខ្ញុំអាចដាក់លើខ្នងបានគឺ ៧០ គីឡូក្រាម ប៉ុន្តែខ្ញុំអាចយកវាឡើងត្រឹមជាន់ទី១ មិនអាចឡើងទៅជាន់ខ្ពស់បន្ទាប់ពីនោះបានទេ”។ នាងបន្តថា៖ “ការងារនេះក៏ទាមទារជំនាញដែរ ដោយសារខ្ញុំដឹកច្រើន ខ្ញុំគិតថាខ្ញុំស៊ាំនឹងវាបន្តិចម្តងៗ។ ជាធម្មតាខ្ញុំនាំយកទូរទឹកកក១ ឬ២គ្រឿង ទៅឲ្យអតិថិជនជារៀងរាល់ថ្ងៃ ប៉ុន្តែខ្ញុំមិនមានអារម្មណ៍ហត់ទេ”។
វីដេអូមួយរបស់ Cao លីទូរទឹកកកដាក់ខ្នងទៅផ្ទះល្វែងរបស់អតិថិជន បានល្បីពេញបណ្ដាញសង្គមចិន។ មនុស្សជាច្រើន បានកោតសរសើរ និងស្រលាញ់ការតស៊ូរបស់នាងខ្លាំងណាស់។
ទន្ទឹមនឹងនេះ Cao ក៏បានឆ្លើយតបថា “ខ្ញុំសូមអរគុណដល់អ្នកទាំងអស់គ្នាដែលបានស្រលាញ់ ចូលចិត្តខ្ញុំ ប៉ុន្តែខ្ញុំមិនមានមោទនភាពចំពោះខ្លួនឯងពេកទេ ព្រោះវាជារឿងធម្មតា និងជាធម្មជាតិក្នុងការជួយឪពុកម្តាយបែបនេះ” ។
នាងបានបន្ថែមថា “ខ្ញុំធំឡើងក្នុងបរិយាកាសបែបនេះ ខ្ញុំឃើញឪពុកម្តាយរបស់ខ្ញុំធ្វើការយ៉ាងលំបាកជារៀងរាល់ថ្ងៃ។ ពេលខ្លះពួកគាត់រវល់ពេក រហូតមិនមានពេលបរិភោគ។ ដូច្នេះការជួយពួកគាត់ គឺជារឿងធម្មតាសម្រាប់ខ្ញុំ”។
ទោះជាយ៉ាងណា ដោយសារមានការព្រួយបារម្ភ អំពីចំនួនការងារដ៏លំបាករបស់កូនស្រី ដែលនាងកំពុងធ្វើរាល់ថ្ងៃ បុរសជាឪពុកក៏បានយក Cao ទៅពិនិត្យកាលពីប៉ុន្មានឆ្នាំមុនផងដែរ។ បន្ទាប់ពីគ្រូពេទ្យកំណត់ថា កូនស្រីរបស់គាត់មានសុខភាពល្អទាំងស្រុងហើយ លោក Xiangjun ក៏បានយល់ព្រមឱ្យកូនស្រីបន្តធ្វើការ។
គាត់បាននិយាយថា៖ “ខ្ញុំធូរចិត្តដែលមានកូនស្រីដែលចេះស្តាប់បង្គាប់ និងយល់ចិត្តបែបនេះ។ ខ្ញុំក៏ចង់ប្រាប់កូនស្រីខ្ញុំឲ្យធ្វើការតាមកម្លាំង ដែលអាចធ្វើបាន ដើម្បីសុខភាព និងខំរៀននៅសាលា”។
រឿងនេះត្រូវបានអ្នកប្រើបណ្ដាញសង្គមចិនទទួលបានការគាំទ្រយ៉ាងខ្លាំង។ ក្នុងនោះ អ្នកប្រើប្រាស់បណ្តាញសង្គមម្នាក់ បានបញ្ចេញមតិសម្តែងការកោតសរសើរថា៖ “នាងជានារីដ៏អស្ចារ្យបំផុត! នាងស្អាតណាស់ ហើយមានចិត្តសប្បុរស!”។ តែទន្ទឹមនឹងនោះ អ្នកលេងម្នាក់បានសម្ដែងការព្រួយបារម្ភថា៖ «ហេ… ស្រីស្អាត លើកលើសទម្ងន់យ៉ាងនេះ ប្រយ័ត្នប៉ះពាល់រាងកាយណា៎ អរគុណ!»៕ រក្សាសិទ្ធិដោយ៖ លឹម ហុង
