បុរសម្នាក់នៅតៃវ៉ាន់ បានបង្កឲ្យមានការភ្ញាក់ផ្អើល និងអស់សំណើចយ៉ាងខ្លាំង ពីសំណាក់អ្នកនិយមលេងអ៊ីនធើរណែត ចំពោះទង្វើដ៏ប្លែករបស់គាត់ ដែលបានស្ទួចយករថយន្តទៅចតលើដំបូលផ្ទះ ដោយសារតែខឹងអាជ្ញាធរក្នុងមូលដ្ឋាន តែងផាកពិន័យគាត់ រឿងថតរថយន្តតាមផ្លូវ ធ្វើឲ្យប៉ះពាល់សណ្ឋាប់ទីក្រុង។
យោងតាមសារព័ត៌មានមួយរបស់តៃវ៉ាន់ បានឲ្យដឹងថា ដោយមានការខកចិត្ត ទៅនឹងអាជ្ញាធរ បុរសធ្វើការជាអ្នកម៉ៅការម្នាក់ បានសម្រេចចិត្តជួលរថយន្តស្ទូច ដើម្បីលើករថយន្តឡើងលើដំបូលអគារផ្ទះល្វែងដែលគាត់តែម្តង។
តែយ៉ាងណាមិញ នៅពេលអ្នកជិតខាង ប្រាប់ពីកង្វល់របស់ពួកគេ ទៅបុរសនោះ អំពីហានិភ័យសុវត្ថិភាពដល់អគារ ដោយសារមានរថយន្ត២គ្រឿង មកចតលើដំបូលអាគាររួមបែបនេះ បុរសនោះបានប្រាប់ថា គាត់នឹងធានាថា មិនធ្វើឲ្យប៉ះពាល់នោះទេ ព្រោះអគារនេះធ្វើពីបេតុង និងដែក។
ជាងនេះទៅទៀត នៅពេលដែលមន្ត្រីសាលាក្រុង និងប៉ូលីស សុំឲ្យគាត់យករថយន្តដាក់ចុះមកក្រោមវិញ គាត់បាននិយាយយ៉ាងចាក់ដោតថា «វានឹងមិនប៉ះពាល់ដល់អគារនោះទេ កុំមករំខាន ពីមុនខ្ញុំចតតាមចិញ្ចើមផ្លូវ ពួកលោកផាកពិន័យខ្ញុំ ហេតុនេះ ខ្ញុំគ្មានជម្រើសអ្វីផ្សេង ក្រៅលើកឡានមកចតនៅទីនេះទេ»។
បុរសរូបនេះ ក៏បាននិយាយឲ្យអ្នកសារព័ត៌មានដឹងទៀតថា ដោយសារគ្មានកន្លែងចត ពេលខ្លះ គាត់ត្រូវយកឡានទៅចតនៅលើភ្នំ Taoyuan នៅក្នុងខែតុលា កន្លងមក៕ រក្សាសិទ្ធិដោយ៖ លឹម ហុង
