ប្រទេសជប៉ុន និងអាមេរិច បានចាប់ផ្តើមធ្វើសមយុទ្ធជើងទឹករួមគ្នា នៅថ្ងៃព្រហស្បតិ៍នេះ ដើម្បីបង្ហាញកំលាំង ដាក់ប្រទេសកូរ៉េខាងជើង។ នេះបើតាមការចេញផ្សាយរបស់សារព៌តមានសិង្ហបុរី (Channel News Asia)
បើតាមសេចក្តីប្រកាសរបស់កងទ័ពអាមេរិចបានឲ្យដឹងថា សមយុទ្ធជើងទឹករយៈពេល ១០ថ្ងៃនឹងធ្វើឡើងនៅក្នុងដែនទឹកជុំវិញកោះអូគីណាវា ស្ថិតនៅភាគខាងត្បូងប្រទេសជប៉ុន។ សមយុទ្ធនឹងមានការចូលរួមដោយទាហ៊ានជើងទឹកអាមេរិច ១៤.០០០នាក់ នាវាផ្ទុកយន្តហោះអាមេរិច USS Ronald Reagan និង នាវាពិឃាតបំពាក់មីស៊ីលជាច្រើនផងដែរ។
ប្រទេសកូរ៉េខាងជើងតែងតែធ្វើការប្រឆាំងទៅនឹងសមយុទ្ធរបស់អាមេរិច ដោយរបបកុម្មុនិស្តនេះចាត់ទុកថា វាគឺជាការហាត់សមដើម្បីធ្វើការឈ្លានពានកូរ៉េខាងជើង។
សេចក្តីប្រកាសនិយាយទៀតថា សមយុទ្ធប្រចាំឆ្នាំនេះគឺធ្វើឡើងដើម្បីបង្កើនការត្រៀមការពារខ្លួនរបស់កងកំលាំងអាមេរិច និងជប៉ុន តាមរយៈការហ្វឹកហាត់តាមដែនអាកាស និងដែនទឹក។
សមយុទ្ធរួមនេះកើតឡើង ក្រោយពេល នាវាផ្ទុកយន្តហោះអាមេរិចចំនួន ៣គ្រឿងទើបតែបញ្ចប់ការធ្វើសមយុទ្ធដ៍កំរនៅតំបន់ប៉ាស៊ីភិចខាងលិច ជាមួយនឹងកងនាវាជើងទឹកជប៉ុន និងនាវាចំបាំងកូរ៉េខាងត្បូងកាលពីសប្តាហ៍កន្លងទៅ៕ សុភ័ក្ត្រ
