កូនកំលោះត្រូវបានចងជាប់នឹងដើមឈើនៅស្រុក Pradapgarh នៃរដ្ឋ Uttar Pradesh ដោយសារតែរូបគេត្រូវបានចោទប្រកាន់ពីបទ «ទាមទារថ្លៃបណ្ណាការ» ហើយក្រោយមក ក៏ត្រូវបានប៉ូលិសមូលដ្ឋានដោះលែងវិញ។
យោងតាមគេហទំព័រ India Today ពិធីមង្គលការមួយត្រូវបានធ្វើឡើង កាលពីថ្ងៃអង្គារ ទី១៤ ខែមិថុនា នៅទីក្រុង Thauttar Pradesh ប្រទេសឥណ្ឌា។ ប៉ុន្តែ កូនកំលោះស្រាប់តែត្រូវបានចងភ្ជាប់ទៅនឹងដើមឈើអស់រយៈពេលជាច្រើនម៉ោង ដោយសារតែទាមទារថ្លៃបណ្ណាការពីគ្រួសារកូនក្រមុំ។
រឿងហេតុនេះបានផ្តើមឡើង គឺនៅពេលមិត្តភក្តិរបស់កូនកំលោះដែលមានគំនិតមិនល្អ នាំឱ្យមានការឈ្លោះប្រកែកគ្នា រវាងគ្រួសារកូនកំលោះ និងកូនក្រមុំ ហើយភាពតានតឹងកាន់តែខ្លាំងឡើង នៅពេលកូនកំលោះទាមទារថ្លៃបណ្ណាការពីគ្រួសារកូនក្រមុំ។
ជាលទ្ធផល គឺកូនកំលោះត្រូវបានគ្រួសារកូនក្រមុំ ចាប់ចងជាប់នឹងដើមឈើអស់ជាច្រើនម៉ោង បន្ទាប់ពីការចរចាម្តងហើយម្តងទៀត គ្រួសារទាំងពីរមិនអាចចុះសម្រុងគ្នាបាន។
ក្រោយមក សមត្ថកិច្ចនគរបាលប៉ុស្តិ៍ បានចុះដល់កន្លែងកើតហេតុ និងបានដោះលែងកូនកំលោះ រួចនាំយកទៅប៉ុស្តិ៍ប៉ូលិស។ ការចរចាកំពុងដំណើរការរវាងគ្រួសារទាំងពីរ ដើម្បីឈានដល់កិច្ចព្រមព្រៀងមួយ និងសំណងសម្រាប់ការចំណាយលើអាពាហ៍ពិពាហ៍ សម្រាប់គ្រួសារកូនក្រមុំ៕ រក្សាសិទ្ធិដោយ៖ លឹម ហុង
