ថ្មីៗនេះ វីដេអូផ្សាយផ្ទាល់នៃព្រឹត្តិការណ៍ “ការប្រកួតកីឡាកាយវប្បកម្ម និងកាយវប្បកម្មខេត្ត Jiangsu 2023 វគ្គផ្តាច់ព្រ័ត្រ” បានកំពុងរីករាលដាលនៅលើបណ្តាញសង្គមចិនដីគោក។ វីដេអូបានបង្ហាញថា បន្ទាប់ពីការប្រកួត បេក្ខនារីបានថ្លែងអំណរគុណដល់ទស្សនិកជនរួមគ្នា ស្រាប់តែបេក្ខនារីម្នាក់ ខឹងសម្បារយ៉ាងខ្លាំង បានដោះស្បែកជើងកែង មកគប់លើចៅក្រមតែម្តង។
កាសែត The Paper នៅថ្ងៃទី២២ ខែមិថុនា បានរាយការណ៍ថា ករណីដ៏កម្រនេះ ដែលបានកើតឡើងក្នុងព្រឹត្តិការណ៍ប្រកួតកីឡាកាយវប្បកម្មនារី ក្នុងខេត្ត Jiangsu ប្រទេសចិន គឺនៅពេលដែលបេក្ខនារីម្នាក់ បន្ទាប់ពីឮលទ្ធផល ក៏ផ្ទុះកំហឹង និងបញ្ចេញអាកប្បកិរិយាដ៏មិនសមរម្យ គប់ស្បែកជើងកែង ទៅលើគណៈវិនិច្ឆ័យនៅខាងក្រោម។ បន្ទាប់មក បេក្ខនារីនោះ ក៏ត្រូវបានសន្តិសុខបណ្តេញចុះពីលើឆាកយ៉ាងលឿន រួមជាមួយបេក្ខនារីទាំង៥រូបដទៃទៀតផងដែរ។
យោងតាម Paper បេក្ខនារីផ្ទុះកំហឹងរូបនោះ បាននិយាយថា កាលពីវគ្គជម្រុះកន្លងមក នាងបានជាប់លេខ១ សម្តែងបានល្អ ប៉ុន្តែ បែរបច្ចុប្បន្នមិនបានជាប់ Top 6 បន្ទាប់ពីការប្រកួតឈុតប៊ីគីនី។ ហេតុនេះ នាងមានអារម្មណ៍ថា ការប្រលងចំណាត់ថ្នាក់នេះអយុត្តិធម៌ ហើយបានប្តឹងទៅអ្នករៀបចំ ប៉ុន្តែមិនមានការឆ្លើយតបទេ។ ដូច្នេះហើយ នាងមិនអាចរក្សាសណ្ដាប់ធ្នាប់របស់នាងបានទេ។
យោងតាមក្រុមហ៊ុន HK01 ការប្រកួតកីឡាកាយវប្បកម្មស្ត្រី ដែលរៀបចំដោយមជ្ឈមណ្ឌលគ្រប់គ្រងកីឡាសង្គម Jiangsu សហការជាមួយអង្គភាពមួយចំនួន គឺមានអ្នកចូលរួមប្រហែល ២០០ នាក់។ បន្ទាប់ហេតុការណ៍នេះ ដែលបានកើតឡើងកាលពីថ្ងៃទី១៨ ខែមិថុនា បង្កឲ្យមានភាពចម្រូងចម្រាស អ្នករៀបចំបានបង្កើតក្រុមមួយ ដើម្បីស៊ើបអង្កេតច្បាប់ និងបទប្បញ្ញត្តិនៃការប្រកួត ដោយសន្យាថានឹងចាត់វិធានការយ៉ាងម៉ឺងម៉ាត់ ប្រសិនបើមានករណីបំពានច្បាប់។
អ្នកតំណាងសម្រាប់ការប្រកួតបាននិយាយថា “យើងតែងតែអនុញ្ញាតិឱ្យបេក្ខជនបេក្ខនារី ធ្វើការតវ៉ា ប្រសិនបើពួកគេមានអារម្មណ៍ថា មានសញ្ញានៃការបំពានច្បាប់នៃការប្រកួត។ ប្រសិនបើមិនពេញចិត្តនឹងពិន្ទុនោះ គឺអាចផ្តល់យោបល់ទាំងស្រុងបាន។ ទោះជាយ៉ាងណាក៏ដោយ រហូតមកដល់ពេលនេះ យើងនៅមិនទាន់មានពាក្យបណ្តឹងរបស់បេក្ខនារីផ្ទុះកំហឹងនោះនៅឡើយទេ”៕ រក្សាសិទ្ធិដោយ៖ លឹម ហុង
