គេហទំព័រ China Press បានបញ្ចេញរឿងរ៉ាវដ៏ញាក់សាច់មួយ គ្រាដែលស្រ្តីម្នាក់បានឡើងលើក្បាលរថយន្ត Mercedes ពណ៌ខ្មៅមួយគ្រឿង រួចយកជើងធាក់ និងវាយកម្ទេចកញ្ចក់ បានបង្កឲ្យមានការភ្ញាក់ផ្អើលពេញដងផ្លូវ និងកកស្ទះចរាចរណ៍ជាខ្លាំង។ ហេតុការណ៍នេះបានកើតឡើងនៅកណ្តាលផ្លូវក្នុងទីក្រុង Huaibei ខេត្ត Anhui ប្រទេសចិន កាលពីថ្ងៃទី២៣ ខែមិថុនា ឆ្នាំ២០២៣។
ប្រព័ន្ធផ្សព្វផ្សាយក្នុងស្រុក បានបញ្ចេញវីដេអូនៃហេតុការណ៍នេះ ដែលបង្ហាញស្ត្រីពាក់អាវស ស្លៀកខោជើងខ្លីពណ៌ខ្មៅ បានឡើងទៅវាយរថយន្ត Mercedes ដោយមិនខ្វល់ពីអ្នកដទៃ និងមិនមានការឈឺចាប់ឡើយ ទោះបីដៃនាងហូរឈាមក៏ដោយ។ ក្នុងរថយន្តគេបានឃើញមានស្ត្រីម្នាក់បើកបរនោះ ប៉ុន្តែបើទោះជារថយន្តខូច ឬបែកកញ្ចក់ក៏ដោយ ក៏ស្ត្រីក្នុងរថយន្តមិនព្រមចុះចេញមកក្រៅទេ ដោយនៅតែសម្ងំដែលធ្វើឲ្យមានការសង្ស័យថា តើអ្វីស្ថិតនៅពីក្រោយជម្លោះនេះ? ឬស្ត្រីពាក់អាវស ជាម្ចាស់បំណុលមកទារលុយ?។
ខណៈពេលនោះ អ្នកធ្វើដំណើរឆ្លងកាត់ ក៏បានឈប់ប្រមូលផ្តុំគ្នាមើល និងថតរូប ហើយប្រជាពលរដ្ឋខ្លះក៏បានណែនាំឱ្យហៅប៉ូលីស មកដោះស្រាយបញ្ហានេះ ព្រោះបង្កការកកស្ទះណាស់។ តែនៅពេលឮដូច្នេះ ស្ត្រីរូបនោះក៏ស្រែកតបវិញថា “ហេតុអ្វីបានជាត្រូវទូរស័ព្ទទៅប៉ូលិស? នេះជារថយន្តរបស់ខ្ញុំ”។
បើតាមសេចក្តីរាយការណ៍បានឲ្យដឹងថា ស្ត្រីរូបនោះដែលជាប្រពន្ធរបស់បុរសម្នាក់ បានចាប់ប្ដីរបស់នាងដែលមិនស្មោះត្រង់ អស់រយៈពេលជាង ៣ ឆ្នាំ មកហើយ។ កន្លងមក ប្តីបានសន្យាថានឹងបែកគ្នាជាមួយមនុស្សផិតក្បត់។ តែទោះជាយ៉ាងណា បុរសជាប្តីនៅតែលួចមានទំនាក់ទំនងសម្ងាត់នៅពីក្រោយខ្នង។ ដូច្នេះហើយ ប្រពន្ធបានស្វែងរករថយន្តនេះអស់រយៈពេល ៣ ឆ្នាំ រហូតដល់ថ្ងៃដែលនាងរង់ចាំ…។
ស្រ្តីជាប្រពន្ធដែលពោរពេញដោយកំហឹង ក៏បានស្រែកខ្លាំងៗថា “ខ្ញុំតាមរកឡាននេះ៣ឆ្នាំហើយ ទីបំផុតរកឃើញហើយ បើខ្លាំងហ៊ានចេញពីឡានទៅ!”។
ស្ត្រីរូបនោះបានបន្ថែមថា រថយន្ត Mercedes-Benz បើទោះជាមានចុះបញ្ជីឈ្មោះប្តីក៏ពិតមែន ប៉ុន្តែជាកម្មសិទ្ធិរួមរបស់ប្តីប្រពន្ធ អ៊ីចឹងហើយបានជានាងហ៊ានវាយកម្ទេចឡាននៅទីសាធារណៈ។
ហេតុការណ៍នេះបានធ្វើឱ្យមានមតិចម្រុះក្នុងសហគមន៍អនឡាញចិន៖ “ខ្ញុំមិនការពារស្រីកំណាន់ទេ តែប្រពន្ធមិនគួរធ្វើអ៊ីចឹង? មិនចាំបាច់ធ្វើបាបខ្លួនឯងទេ”, “អ្នកដែលស័ក្តិសមនឹងការប្រច័ណ្ឌបំផុតមិនមែនជាមនុស្សទីបីទេ តែជាប្ដីមិនស្មោះត្រង់”។
ទោះជាយ៉ាងណា នៅទីបញ្ចប់ ប៉ូលីសមកដល់កន្លែងកើតហេតុ និងបានបញ្ចុះបញ្ចូលឱ្យស្រ្តីនោះចាកចេញពីការបិទផ្លូវ ដែលមិនអាចធ្វើអ្វីលើសពីនេះបានទេ៕ រក្សាសិទ្ធិដោយ៖ លឹម ហុង
