នៅថ្ងៃទី២៥ ខែមិថុនា ឆ្នាំ២០២៣ ថ្មីៗនេះ ស្រ្តីអ្នកទេសចរឈ្មោះ Monica Humphries បានចែករំលែកបទពិសោធន៍ដ៏ស្លុតមួយ នៅលើ Insider ខណៈទៅលេងប្រទេសជប៉ុន រយៈពេល២សប្តាហ៍ ហើយនាងបានដឹងពីរឿងចម្លែកនេះដែលមនុស្សជាច្រើនមិនចាប់អារម្មណ៍ ដែលបន្ទប់សណ្ឋាគារភាគច្រើននៅទីនោះត្រូវបានបំពាក់ដោយពិល។
Monica និយាយថា៖ «វាជាអ្វីដែលខ្ញុំមិនធ្លាប់ឃើញក្នុងបន្ទប់សណ្ឋាគារ ក្នុងប្រទេសផ្សេងពីមុនមក»។ ប៉ុន្តែ ក្រោយពីរកឃើញមូលហេតុ អ្នកយកព័ត៌មានស្រីរបស់ក្រុមហ៊ុន Insider ពិតជាមានការភ្ញាក់ផ្អើលខ្លាំងតែម្តង។
នៅក្នុងការបង្ហោះរបស់នាង Monica បានឲ្យដឹងថា៖ «ខ្ញុំបានរកឃើញអ្វីៗគ្រប់យ៉ាង តាំងពីឧបករណ៍ដេរខ្នាតតូច រហូតដល់ឧបករណ៍ដើរលេងកាត់ព្រៃភ្នំ នៅក្នុងសណ្ឋាគារជុំវិញពិភពលោក។ ដូច្នេះ ខ្ញុំសប្បាយចិត្ត ដែលបានរកឃើញអ្វីដែលថ្មី ក្នុងកំឡុងពេលស្នាក់នៅសណ្ឋាគារក្នុងប្រទេសជប៉ុនជាលើកដំបូង គឺពិល»។
នៅសណ្ឋាគារ BnA Art ក្នុងទីក្រុងតូក្យូ ពិលតូចមួយត្រូវបានតំឡើងនៅលើជញ្ជាំងក្បែរកុងតាក់ពន្លឺ។ នាងក៏បានគិតថា វាប្រហែលត្រូវបានគេប្រើដើម្បីការពារភ្ញៀវពីការបុកជញ្ជាំង នៅពេលចូលបន្ទប់ទឹកនៅពេលយប់ ឬប្រហែលជាវាជាវិធីដ៏ងាយស្រួលមួយ ក្នុងការរំកិលវ៉ាលីដោយមិនចាំបាច់បើកភ្លើង និងដាស់អ្នកផ្សេងនៅក្នុងបន្ទប់។
ពីរបីថ្ងៃក្រោយមក នាងបានចាកចេញពីសណ្ឋាគារនោះ ហើយទៅសណ្ឋាគារមួយទៀត ហើយនាងក៏បានរកឃើញពិលដូចគ្នានេះ ត្រូវបានដាក់នៅជិតគ្រែផងដែរ។
ក្រោយមក ពេលស្នាក់នៅក្នុងទីក្រុងរីយ៉ូកាន ដែលជាផ្ទះសំណាក់បែបប្រពៃណីរបស់ជប៉ុន នាងបានរកឃើញពិលតូចមួយទៀត។ និយាយរួមទៅ គឺស្ទើរតែគ្រប់ទីកន្លែងដែលនាងស្នាក់នៅ មានពិលតូចមួយនៅលើជញ្ជាំងតែម្តង។
តែទីបំផុត Monica បានស្វែងយល់ និងដឹងច្បាស់ថា តាមពិតទៅភ្លើងពិលជាច្រើន ដែលនាងបានជួបប្រទះ គឺពួកវាមិនត្រឹមតែជាឧបករណ៍សម្រាប់បំភ្លឺពេលចូលបន្ទប់ទឹកនៅពេលយប់ប៉ុណ្ណោះទេ តែវាក៏ជាភ្លើងពិលនៅទីនោះ សម្រាប់ក្នុងករណីមានគ្រោះអាសន្នដូចជារញ្ជួយដីផងដែរ។
យោងតាមការស្ទាបស្ទង់ភូគព្ភសាស្ត្រអាមេរិក ប្រទេសជប៉ុនគឺជាកន្លែងដែលបន្ទះប្លាកែតទ្វីប និងមហាសមុទ្រជួបគ្នា ដែលមានន័យថាការរញ្ជួយដីកើតឡើងញឹកញាប់។ ប្រភពដដែលក៏បានបញ្ជាក់ឲ្យដឹងថា ជប៉ុនជាប្រទេសដែលងាយរងគ្រោះរញ្ជួយដីខ្លាំងបំផុត ក្នុងពិភពលោក។
លោក Andres Zuleta ស្ថាបនិកទីភ្នាក់ងារទេសចរណ៍ប្រណិត Boutique Japan បាននិយាយថា «ចាប់តាំងពីការរញ្ជួយដីកើតឡើងជាញឹកញាប់នៅក្នុងប្រទេសជប៉ុន ការត្រៀមខ្លួនសម្រាប់ការរញ្ជួយដី គឺជាអ្វីដែលបង្កប់យ៉ាងជ្រៅនៅក្នុងជីវិតប្រចាំថ្ងៃរបស់ប្រជាជនជប៉ុន»។ .
Zuleta និយាយថា៖ «សណ្ឋាគារជប៉ុនមានពិលក្នុងបន្ទប់របស់ពួកគេ ជាផ្នែកមួយនៃការត្រៀមខ្លួនសម្រាប់ការរញ្ជួយដី។ ប្រសិនបើការរញ្ជួយដីកើតឡើង វាអាចប៉ះពាល់ដល់ហេដ្ឋារចនាសម្ព័ន្ធក្នុងតំបន់ ដែលមានន័យថា អគ្គិសនី និងពន្លឺអាចនឹងត្រូវបាត់បង់ភ្លាមៗ។ ភ្លើងពិលត្រូវបានដាក់នៅគ្រប់បន្ទប់ ដូច្នេះមនុស្សនឹងមានប្រភពពន្លឺមួយ ដើម្បីជួយពួកគេចេញពីសណ្ឋាគារក្នុងករណីមានអាសន្ន»។
ចំណែក Monica វិញ នាងមានអារម្មណ៍រំភើបជាខ្លាំង បន្ទាប់ពីបានដឹងពីអត្ថន័យពិតនៃភ្លើងពិល នៅក្នុងបន្ទប់សណ្ឋាគារជប៉ុន។
នាងបានចែករំលែកថា៖ «បន្ទាប់ពីឆែកឆេរបន្ទប់ជាច្រើនក្នុងប្រទេសជប៉ុន ខ្ញុំមិនត្រឹមតែឃើញភ្លើងពិលជាចង្កៀងសម្រាប់អានពេលយប់ប៉ុណ្ណោះទេ ប៉ុន្តែខ្ញុំក៏មានអារម្មណ៍ធូរស្រាលក្នុងគោលបំណងធំជាងនេះផងដែរ។ សំណាងហើយដែលខ្ញុំមិនត្រូវការវាក្នុងអំឡុងពេលពួកខ្ញុំទាំងពីរសប្តាហ៍នៅទីនេះ»៕ រក្សាសិទ្ធិដោយ៖ លឹម ហុង
