ដូចដែលបានដឹងហើយថា គ្រោះថ្នាក់ចរាចរណ៍ និងបណ្តាលឲ្យមនុស្សស្លាប់ បានកើតឡើងគ្មានលោះថ្ងៃនោះទេ។ ពិតណាស់ គ្រោះថ្នាក់ទាំងនោះ បានកើតឡើង គឺគ្មានអ្វីក្រៅពីបើកបរមិនគោរពច្បាប់ ដូចជាបើកលើសល្បឿនកំណត់ បើកព្រហើន និងបើកបរស្ថិតក្រោមឥទ្ធិពលគ្រឿងស្រវឹងជាដើម។
តួយ៉ាង ដូចបុរសវ័យចំណាស់ម្នាក់នេះ ដែលហៅថាចាស់ទំនើង និងជាគំរូដ៏អាក្រក់ បានធ្វើឲ្យគ្រប់គ្នានៅលើបណ្តាញសង្គម បានសម្តែងការហួសចិត្តយ៉ាងខ្លាំង ក្រោយពីបានជំនះបើកឡានទាំងស្ថានភាពស្រវឹង បើទោះជាសាច់ញាតិ និងអ្នកជិតខាង ឃាត់មិនឲ្យបើកបរយ៉ាងក៏ដោយ ហើយជាលទ្ធផលនៃការយកភាពខ្លាំង និងទង្វើស៊ីជោរដាក់ខ្លួន បានបំផ្លាញរថយន្តខ្លួនឯងយ៉ាងដំណំ។
ជាក់ស្តែង តាមរយៈវីដេអូដែលកំពុងល្បីនៅលើបណ្តាញសង្គមថ្មីៗនេះ បានបង្ហាញឲ្យឃើញបុរសវ័យចំណាស់ម្នាក់នោះ កំពុងស្ថិតក្នុងរថយន្តឡិចស៊ីសស៊េរីទំនើប ទាំងស្ថានភាពស្រវឹងខ្លាំង និងមិនដឹងថាខឹងរឿងអ្វី ខណៈស្រ្តីម្នាក់ពរកូន (ប្រហែលជាប្រពន្ធ) បានទាញដៃឃាត់ ប៉ុន្តែ បុរសនោះមិនស្តាប់អ្នកណានោះទេ។ ទោះជាយ៉ាងណា ភ្លាមៗនោះ ស្រាប់តែធ្វើខ្លួនអស្ចារ្យជាន់ហ្គារោទ៍មួយទំហឹង បាត់បង់ការគ្រប់គ្រង បណ្តាលឲ្យស្ទុះទៅបុកជញ្ជាំងផ្ទះ បណ្តាលឲ្យផ្នែកក្បាលរថយន្តឡើងខ្ទេចតែម្តង។
ទោះជាយ៉ាងណា នេះចាត់ទុកជាសំណាងហើយ ដែលបានត្រឹមបង្កការបំផ្លិចបំផ្លាញសម្រាប់រថយន្តខ្លួនឯង ប្រសិនបើបង្កគ្រោះថ្នាក់ដល់មនុស្ស គឺដឹងតែធ្ងន់កហើយ៕ រក្សាសិទ្ធិដោយ៖ លឹម ហុង
