នៅថ្ងៃចុងសប្តាហ៍ថ្មីៗនេះ ពិធីបុណ្យរ៉ាយ៉ា ហាជី បានជំរុញឱ្យគ្រួសារជាច្រើន បានទៅវិស្សមកាលយ៉ាងច្រើនកុះករតែម្តង។ តែដោយសារឃើញការកកស្ទះចរាចរណ៍ ហាក់មានសភាពធ្ងន់ធ្ងរដ៏មិននឹកស្មាន គ្រួសារមួយនៅ Terengganu បានសម្រេចចិត្តជួយអ្នកដែលជាប់គាំងក្នុងចរាចរណ៍ ដោយស្វាគមន៍ពួកគេចូលលេងក្នុងផ្ទះរបស់ពួកគេ ជាពិសេសបើកចំហរបន្ទប់ទឹកប្រើប្រាស់ដោយទឹកចិត្តរីករាយ។
ជាការពិតណាស់ គ្រួសារនោះ មិនបានរៀបចំផ្ទះចំហរ ឬពិធីជប់លៀងទេ ប៉ុន្តែពួកគេបានឲ្យ “ខ្ចី” បង្គន់របស់ពួកគេ សម្រាប់នរណាម្នាក់ដែលត្រូវការប្រើប្រាស់បន្ទាន់ ដោយពួកគេអាចប្រើដោយឥតគិតថ្លៃ! ។
ស្ត្រីជនជាតិម៉ាឡេស៊ីម្នាក់ឈ្មោះ Nik Norkatijah បានចែករំលែកហេតុការណ៍នេះតាមរយៈ Facebook របស់នាង ដែលបានកើតឡើងកាលពីយប់ថ្ងៃសៅរ៍ (១ ខែកក្កដា) ឲ្យដឹងថា ក្រុមគ្រួសារមួយបានរាក់ទាក់ចំពោះបងប្អូនអ្នកដំណើរ ឲ្យប្រើប្រាស់បង្គន់នៅក្នុងផ្ទះរបស់ពួកគេនៅពេលនោះ ដោយបានដាក់សញ្ញាអារម្មណ៍ញញឹមនៅលើក្រដាសកាតុងសរសេរថា “Tandas FREE (បង្គន់ឥតគិតថ្លៃ)”។
Katijah ជាអ្នកដំណើរម្នាក់ បាននិយាយថា នាងកំពុងធ្វើដំណើរត្រលប់ពី Kuala Besut ទៅកាន់ Kuala Terengganu ដែលនៅថ្ងៃចរាចរណ៍ធម្មតា គឺនឹងចំណាយពេលត្រឹមតែ ៩០ នាទីប៉ុណ្ណោះ។ ប៉ុន្តែ ចរាចរណ៍ពិតជាអាក្រក់នៅយប់នោះ វាស្ទើរតែកម្រើកមិនរួច ហើយវាត្រូវចំណាយពេលរហូតដល់ ៦ ម៉ោង ដើម្បីទៅដល់ទីក្រុង Kuala Terengganu។
នាងបានពន្យល់ថា នាងបានចាប់ផ្តើមធ្វើដំណើរចេញពី Kuala Besut នៅម៉ោង ៥ ល្ងាច ហើយទើបតែទៅដល់គោលដៅនៅម៉ោង ១១ យប់។
Katijah ក៏បានប្រាប់ថា «ខ្ញុំបានឆ្លងកាត់ផ្ទះគ្រួសារមួយ បានឃើញអ្នកបើកបរជាច្រើន នាំគ្នាចុះទៅប្រើប្រាស់បង្គន់ព្រោងព្រាត ពិតជាអរគុណខ្លាំងណាស់ ដល់ក្រុមគ្រួសារដែលមានចិត្តសប្បុរស»៕ រក្សាសិទ្ធិដោយ៖ លឹម ហុង
