រូបថតពីពិធីមង្គលការរបស់គូស្នេហ៍មួយគូនៅក្នុងខេត្ត Yunnan ប្រទេសចិន ដែលបានធ្វើឡើងកាលពីចុងខែមិថុនា ឆ្នាំ២០២៣ បានកំពុងក្លាយជាប្រធានបទបង្កការវែកញែកក្តៅគគុក នៅលើវេទិកាអនឡាញ ព្រោះថាមុខកូនក្រមុំ មើលទៅដូចសិស្សវិទ្យាល័យ។
នៅពីក្រោយរូបរាងរបស់កូនក្រមុំ បានធ្វើឱ្យមនុស្សជាច្រើន មានការព្រួយបារម្ភខ្លាចថា នាងត្រូវបានបង្ខិតបង្ខំឲ្យរៀបការទាំងមិនទាន់គ្រប់អាយុ។ ម្យ៉ាងទៀត ការបញ្ចេញទឹកមុខរបស់នាង ក៏មិនសូវញញឹមដែរ ដែលមើលទៅដូចជានាងមានអារម្មណ៍ខ្មាសអៀន ពេលបង្ហាញក្ដីស្រឡាញ់ចំពោះកូនកំលោះ។
ទោះបីជាយ៉ាងណា ក្រោយមក អ្នកថតរូបរបស់គូស្នេហ៍មួយគូនេះ បានចេញមកឆ្លើយប្រាប់ការពិតថា តាមពិតទៅ កូនក្រមុំមិនមែនត្រូវបង្ខំឱ្យរៀបការដូចដែលគ្រប់គ្នាបារម្ភគិតនោះទេ។ ប៉ុន្តែ អ្វីៗនាំឲ្យមានការយល់ច្រឡំ គឺដោយសារតែកូនក្រមុំមុខក្មេងប៉ុណ្ណោះ។
របាយការណ៍បានបង្ហាញថា ពិធីមង្គលការនេះបានធ្វើឡើងកាលពីឆ្នាំមុន។ ប៉ុន្តែដោយសារតែរូបភាពដែលភ្ញៀវក្នុងពិធីយកមកផ្សព្វផ្សាយ ហើយត្រូវបានគេរកឃើញថា កូនក្រមុំមានមុខក្មេង និងតូចខ្លាំងបែបនេះ បើធៀបនឹងកូនកំលោះខ្ពស់ជាង ធ្វើឱ្យមនុស្សគិតថា នាងប្រហែលជាសិស្សមធ្យមសិក្សារៀបការហើយ។ ទោះជាយ៉ាងណា អ្នកថតរូបក៏បានបញ្ជាក់ឲ្យដឹងថា ឆ្នាំនេះកូនក្រមុំមានអាយុ២០ឆ្នាំហើយ។
តាមរូបភាពក្នុងពិធីនោះ កូនកំលោះក៏ត្រូវបានគេសង្កេតឃើញថា បានមើលថែកូនក្រមុំយ៉ាងយកចិត្តទុកដាក់។ គាត់តែងតែសម្លឹងមើលនាង ជាមួយក្រសែភ្នែកដោយក្តីស្រលាញ់ខ្លាំង។ ម្យ៉ាងវិញទៀត កូនក្រមុំមានចរិតស្លូតបូតទៀតផង ហើយពិតណាស់ នាងមានការខ្មាសអៀន ពេលញញឹមដាក់កាមេរ៉ា។
អ្នកថតរូបនោះក៏បានឲ្យដឹងថា អាពាហ៍ពិពាហ៍នេះមិនមែនជាអាពាហ៍ពិពាហ៍ខុសច្បាប់នោះទេ។ បើទោះបីជាកូនក្រមុំមើលទៅមុខក្មេង ប៉ុន្តែនាងមានអាយុ ២០ ឆ្នាំហើយ ហើយបច្ចុប្បន្នជានិស្សិតសាកលវិទ្យាល័យទៀតផង។ ម្យ៉ាងទៀត គូស្នេហ៍ថ្មីថ្មោងមួយគូនេះស្រឡាញ់គ្នាយ៉ាងល្អ ដោយគ្មានការបង្ខំឱ្យរៀបការពីខាងភាគីណានោះទេ។
ពេលដែលអ្នកនិយមលេងអ៊ីនធឺណិត បានដឹងការពិត អ្នកខ្លះមានការភ្ញាក់ផ្អើលចំពោះរូបរាងកូនក្រមុំ ដែលស្ទើរតែមិនគួរឲ្យជឿ និងបានកោតសរសើរចំពោះរូបរាងដ៏ស្រស់ស្អាត និងក្មេងជាងវ័យរបស់នាងផងដែរ។
គួរបញ្ជាក់ថា យោងតាមច្បាប់របស់ប្រទេសចិន អាយុអាចរៀបការស្របច្បាប់បាន គឺសម្រាប់ស្រ្តីចាប់ពីអាយុ ២០ ឆ្នាំឡើង ខណៈបុរសចាប់ពីអាយុ ២២ ឆ្នាំ ឡើងផងដែរ៕ រក្សាសិទ្ធិដោយ៖ លឹម ហុង
